Alkitab Mobile SABDA
[VER] : [NIAS]     [PL]  [PB] 
 <<  1 Timotius 2 >> 

1Si fõfõna, u'andrõ sibai ena'õ angandrõw̃a, fangandrõ, ba fangandrõ salahi si fao fangandrõ saohagõlõ mufa'ema khõ Lowalangi salahi niha fefu;

2fangandrõ salahi razo ba fefu lolohe famatõrõ. Mi'andrõ ena'õ tola falukha ita wa'ahono ba fa'ohahau dõdõ ba khõ Lowalangi si fao amuata si sõkhi.

3Da'õ zi sõkhi zomasi Lowalangi Sangorifi ya'ita.

4Omasi Ia na te'orifi fefu niha, ba aboto ba dõdõra zindruhu.

5Me ha samõsa Lowalangi, ba ha samõsa zangiaigõ otalua Lowalangi niha, ya'ia Yesu Keriso.

6No Itehegõ mboto-Nia ba wangefa'õ fefu niha moroi ba horõra. Ba da'õ, ba ginõtõ si faudu sibai Iforoma'õ Lowalangi, wa omasi Ia te'orifi fefu niha.

7Ba da'õ mbõrõ wa tefatenge ndra'o ba niha si tenga Yahudi ba wangombakha khõra turia wamati Niha Keriso sindruhu. No sindruhu niw̃a'õgu andre, lõ ulau waya.

8Ba gofu heza, ena'õ mangandrõ ndra matua khõ Lowalangi si fao tõdõ si lõ sinegu, si lõ fõnu ba fa'udusa.

9Omasido gõi ena'õ lahaogõ mbotora ira alawe ba lafaigi zinangeania na lafake nukha soadu. Bõi lahaogõ khõra mbu si fatuwu ba hõrõ, ba ma famake gamagama ana'a ba ma manimani, ba ma nukha sebua bõli.

10Ya muhaogõ mbotonia ira alawe faoma buabua si sõkhi molo'õ sinangeania ba ndra alawe sangata'ufi Lowalangi.

11Ya sahono ndra alawe ba wamahaõ andrõ si fao folo'õ.

12Lõ utehe ba ndra alawe mamahaõ awõ wamatõrõ ira matua; lõ tola lõ sahono ba tebai muhede ira.

13No Adamo zi fõfõna tefazõkhi, ba awena Khawa.

14No ira alawe zi telimo, ba tenga Adamo, irege isawõ goroisa Lowalangi.

15Ba hew̃a'ae si manõ, ni'orifi sa ndra alawe andrõ wadono, asala mamati ia khõ Keriso si fao fangidengide'õ, awõ wa lõ mamalõ la'omasi'õ niha bõ'õ, ba la'oniagõ wa'aurira khõ Lowalangi.



Download Audio MP3 (1 Timotius 2):
Mobile (Low Quality) - CD (High Quality)

 <<  1 Timotius 2 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran