1Ba Kaizarea so samõsa zotõi Koronelio. Ya'ia samõsa kafite zaradadu ba "Zaradadu Gitalia".
2Sangata'ufi Lowalangi ia ba samosumange Lowalangi ira si sambua omo. Ato nitolonia niha Yahudi si numana, ba lõ mamalõ wangandrõnia khõ Lowalangi.
3Samuza ma'õkhõ mato bõzi tõlu tanõ owi i'ila ba gangilata samõsa mala'ika Lowalangi si tohare ba sogaoni ya'ia, "He Koronelio!"
4Ifaigi mala'ika andrõ Koronelio si fao fa'ata'u ba imane, "Hana Tuha?" Ba itema li mala'ika, "No itema wangandrõu ba fa'ebua dõdõu Lowalangi ba Itõrõ tõdõ Lowalangi ndra'ugõ.
5Fatenge niha ba Yofe wogaoni Simoni sotõi Fetero.
6Torõi ia ba nomo duka guli sotõi Simoni, si torõi ba zinga nasi."
7Me no mofanõ mala'ika si fahuhuo khõnia andrõ, maoso Goronelio ikaoni darua ngoningoninia ba samõsa ba gotalua zaradadu sanaro sangata'ufi So'aya.
8Itutunõ khõra Koronelio hadia zi no alua, ba ifatenge ira we'amõi ba Yofe.
9Mahemolu da'õ, me so ira na ba dalu lala ahatõ ba Yofe, numalõ miyaw̃a ba nomo Wetero ba wangandrõ.
10Olofo sibai ia ba omasi ia wemanga. Gasagasa wama'anõ gõ, isõndra sambua gangilata.
11I'ila teboka mbanua ba so zi hulõ nukha sebolo nidada mitou ba danõ, no mufotaw̃itaw̃i.
12No so yaw̃a ngawalõ gurifõ si õfa ahe, ba ngawalõ gurifõ sanana ba fofo.
13Ba so li si hede khõnia sanguma'õ, "He Fetero, faoso, faoso! Taba, ba a!"
14Imane Fetero, "Tebai, So'aya! Lõ irai u'a ngawalõ zi lõ sõkhi ba si ra'iõ."
15Ifuli imane khõnia li si hede andrõ, "Hadia zi sõkhi khõ Lowalangi, bõi bali'õ si lõ sõkhi."
16Medõlu mangandrauli gangilata andrõ, aefa da'õ tefazaw̃a nukha andrõ miyaw̃a ba zorugo.
17Abu dõdõ Wetero wangerangera hadia geluaha gangilata andrõ. Fatua mangerangera Wetero, lasõndra nomo Wetero niha nifatenge Goronelio, ba no so ira fõna mbawa ndruhõ.
18Lakaoni niha ba lasofu lamane, "Hadia so dome ba da'e, sotõi Simoni Fetero?"
19Ifatoutou manõ tõdõnia Fetero gangilata andrõ, ba muhede khõnia Geheha Lowalangi sanguma'õ, "He Fetero, so datõlu niha sangalui ya'ugõ.
20Alio'õ ae'e mitou ba bõi manufa dõdõu wolo'õ ya'ira, bõrõ me Ya'odo zamatenge ya'ira."
21Numalõ mitou Wetero ba imane ba niha andrõ, "Ya'odo ni'aluimi andrõ. Hana wa so ami?"
22Latema li lamane, "Kafite Koronelio zamatenge ya'aga ba da'e. Niha si sõkhi ia ba sangata'ufi Lowalangi, nifosumange niha Yahudi. Samõsa mala'ika Lowalangi zango'ou ya'ia wangandrõ ena'õ mõi'õ ba nomonia, bõrõ me si tobali fanema li wangandrõnia, me no tew̃a'õ khõnia wamondrondrongo hadia ia niw̃a'õu khõnia."
23I'ohe ira yomo Fetero ena'õ momõrõ ba da'õ. Mahemolu da'õ, me aefa maoso Wetero, mofanõ ia fao khõra; so õsa zamati ba Yofe si fao gõi.
24Sara wongi aefa da'õ larugi Kaizarea. No ibalobaloi ira Koronelio ba ira talifusõnia awõ ndra si fahuwu khõnia si no ikaoni.
25Me tohare Wetero, ifaondragõ ia Koronelio ba mangalulu ia fõna Wetero.
26Itolo ia wemaoso Fetero ba imane, "Faoso! Niha gõi ndra'odo."
27Fatua fahuhuo ira Goronelio, numalõ bakha ba nomo Wetero. Ba da'õ i'ila ato niha sowulo.
28Ifaigi ira ba imane, "No mi'ila ya'ami ira talifusõ wa tebai molo'õ agama niha Yahudi we'amõi ba fariawõ ba niha soi bõ'õ. Ba hiza no I'oroma'õ khõgu Lowalangi ena'õ bõi ubali'õ si lõ sõkhi ba si ra'iõ gofu haniha.
29Da'õ mbõrõ me õ'andrõ mõido ba da'e lõ fatimba khõgu. Iada'e omasi ndra'o u'ila hana wa õkaoni ndra'odo."
30Itema li Koronelio imane, "Tõlu ngaluo ba zi lalõ, me si mane wa'alaw̃a luo, mangandrõ ndra'o ba nomo mato bõzi tõlu tanõ owi. I'anema'õ so niha si zizio fõnagu. No takitakile nukhania.
31Imane, 'He Koronelio! No Itema Lowalangi wangandrõu ba Itõrõ tõdõ-Nia wa'ebua dõdõu andrõ.
32Fatenge niha ba Yofe wogaoni niha sotõi Simoni Fetero. Torõi ia ba nomo duka guli zaw̃i sotõi Simoni gõi; ba zinga nasi so nomo andrõ.'
33Da'õ wa ufatenge niha wogaoni ya'ugõ. Ba ha wa'asõkhi dõdõu we'amõi ba da'e. No owulo ndra'aga iada'e fõna Lowalangi ba wamondrongo fefu niw̃a'õ Lowalangi nifa'emau khõma."
34Imane Fetero, "Awena aboto ba dõdõgu wa lõ Ifaehusi niha Lowalangi.
35Sangata'ufi Lowalangi ba solau satulõ, da'õ nitema-Nia gofu hadia soi ira.
36Tatu no aboto ba dõdõmi Duria soroi Lowalangi nifa'ema Lowalangi ba soi Gizera'eli. Turia andrõ no Turia Somuso Dõdõ sanandrõsa ba wa'ohahau dõdõ khõ Yesu Keriso, So'aya ba niha fefu.
37Aboto ba dõdõmi hadia zalua ba zi sagõrõ Yudea, soroi Galilea me no aefa i'o'ou wamayagõ idanõ andrõ Yohane.
38Mi'ila ya'ami ira talifusõ wa no Ifili Yesu moroi ba Nazareta andrõ Lowalangi ba no Ibe'e khõ-Nia Geheha Lowalangi ba kuaso. Mi'ila gõi wa no Itõrõi misa Yesu andrõ wolau si sõkhi; Ifadõhõ nira'u mbekhu, bõrõ me fao khõ-Nia Lowalangi.
39Ya'aga samõsa no ma'ila hadia nilau-Nia ba danõ niha Yahudi awõ ba Yeruzalema. Ba hew̃a'ae si manõ laforõfa sa'atõ Ia ba labunu.
40Ba hiza ba ngaluo si tõlu ifuli I'orifi Ia Lowalangi moroi ba wa'amate ba Iforoma'õ Ia ba niha;
41tenga ba niha fefu, ha ba khõma si no Ifili Lowalangi mbõrõta tobali samaduhu'õ khõ-Nia; manga ba mabadu nidanõ awõ-Nia ndra'aga me no auri Ia mangawuli moroi ba wa'amate.
42Ifatenge ndra'aga wanuriaigõ Turia Somuso Dõdõ ba niha ba mafaduhu'õ wa Ya'ia nifataro Lowalangi tobali Sanguhuku ba niha sauri awõ zi no mate.
43Fahuhuo ndra sama'ele'õ sanandrõsa khõ-Nia. Lamane fefu si faduhu tõdõ khõ Yesu, te'efa'õ horõ bõrõ kuaso Yesu."
44Fatua fahuhuo Wetero, mõi tou Geheha Lowalangi ba Ifatõrõ fefu niha samondrongo turia andrõ.
45Ahõlihõli dõdõ niha Yahudi si no faduhu tõdõ khõ Yesu solo'õ Fetero moroi ba Yofe. Ahõli dõdõra wamaigi, me Ibe'e gõi Geheha-Nia Lowalangi ba soi bõ'õ si tenga niha Yahudi.
46Bõrõ me larongo fahuhuo niha andrõ ba ngawalõ li bõ'õ ba lasuno wa'ebua Lowalangi. Imane Fetero,
47"Faigi atõ, latema Geheha Lowalangi si mane ya'ita. Hadia tola itenaw̃a ira niha ba wamayagõ ya'ira idanõ?"
48Ifabayagõ'õ ira idanõ Fetero ba dõi Yesu Keriso. Aefa da'õ la'andrõ ena'õ torõi khõra Wetero nasa mato ha'uga ngaluo tõ.
Download Audio MP3 (Kisah Para Rasul 10):
Mobile (Low Quality) - CD (High Quality)
<< Kisah Para Rasul 10 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel