1Ba ginõtõ andrõ gõi ibõrõtaigõ Herode wamakao banua Niha Keriso.
2Bõrõ waretania wa labunu Yakobo talifusõ Yohane fõda.
3Me i'ila Herode omuso dõdõ ndra niha Yahudi ba nilaunia andrõ, ifuli ilau nasa zi manõ; ifatenge niha wondra'u Fetero gõi. Alua da'õ me luo Gowasa Roti Si Lõ Mu'aisõni.
4Me no aefa lara'u ba labe'e ba gurunga Wetero, õfa ngenoli zaradadu nibe'e sanaro Fetero ba da'õ -- daõfa zaradadu ero sambua ngenoli. Me no aefa Wasa, awena i'etu'õ huku khõ Wetero Herode fõna niha sato.
5Lataha manõ Wetero ba gurunga; ba hiza lõ mamalõ la'osindruhugõ wangandrõ salahi Wetero khõ Zo'aya ira ndrotondroto Mbanua Niha Keriso.
6Mõrõ Wetero awõ mbilagu ba dangania ba gotalua darua zaradadu sanaro bongi andrõ, ya'ia mahemolunia dania i'ohe Wetero fõna niha sato Herode. Ba mbawa ndruhõ gurunga, so zanaro tanõ bõ'õ.
7I'anema'õ muzizio ba da'õ mala'ika Zo'aya ba so zi haga bakha ba gurunga andrõ. Ifadõgõdõgõ Wetero mala'ika andrõ irege maoso ia. Imane mala'ika, "Alio'õ faoso!" I'anema'õ atoru rate si'õli ba danga Wetero.
8Imane mala'ika, "Onukha ba bõbõ mbadagaheu." Monukha Wetero ba ibõbõ mbadagahenia. Imane zui mala'ika andrõ, "Fake mbarumõ sebua ba o'õ ndra'o."
9I'o'õ Fetero mala'ika andrõ numalõ baero moroi ba gurunga. Ba hiza lõ aboto ba dõdõ Wetero wa hadia ia nilau mala'ika andrõ, sindruhundruhu alua. Iwalinga angilata da'õ Fetero.
10Me no aefa ira ba nahia zanaro si fõfõna ba si mendrua, larugi mbawa ndruhõ si'õli, si numalõ ba mbanua. Teboka manõ mbawa ndruhõ andrõ, numalõ ira baero latõrõ newali. Ba i'anema'õ irõi Wetero mala'ika andrõ.
11Aefa da'õ awena aboto ba dõdõ Wetero zalua khõnia, ba imane, "Awena aboto ba dõdõgu iada'e wa sindruhu no ifatenge mala'ika-Nia So'aya ba wangefa'õ ya'o moroi ba kuaso Herode ba moroi ba nilau ndra niha Yahudi khõgu dania."
12Me aboto ba dõdõ Wetero da'õ, numalõ ia ba nomo Maria, ina Yohane nifotõi gõi Mareko. Ato niha sowulo ba da'õ mangandrõ.
13Itoko mbawa ndruhõ moroi baero, tohare Rode sawuyu ira alawe ba wamokai bawa ndruhõ.
14I'anema'õ irongo li Wetero. Ba bõrõ wa'omuso dõdõnia, i'alio'õ ifuli ia si bakha, lõ nibokainia mbawa ndruhõ, ba i'ombakha'õ ba niha si so ba da'õ wa so baero Wetero.
15Lamane, "Owõhõ'õ!" Ba aro dõdõ Rode wa sindruhu Fetero da'õ. Ba lamane, "Mala'ikania da'õ!"
16Gasagasa da'õ lõ ibato wanoko bawa ndruhõ Fetero. Ba me labokai mbawa ndruhõ, ba ahõlihõli dõdõra me la'ila Wetero.
17Ibe'e kode Fetero faoma tangania ena'õ lahonogõ ira, ba itutunõ hewisa wolohe Zo'aya ya'ia numalõ baero moroi ba gurunga. Ba imane, "Mi'ombakha'õ da'e khõ Yakobo ba khõ ndra talifusõ tanõ bõ'õ." Aefa da'õ irõi nahia andrõ Fetero numalõ ba nahia tanõ bõ'õ.
18Alua wa'akaliru ba gotalua ndra saradadu sanaro mahemolunia. Abu sibai dõdõra ba zalua andrõ khõ Wetero.
19Ifatenge niha Herode wangalui Fetero, ba hiza lõ lasõndra ia. Bõrõ da'õ ibe'e wareta Herode ena'õ la'etu'õ huku ndra saradadu sanaro andrõ ba labunu ira. Aefa da'õ numalõ ba Yudea Herode ba torõi ia ba da'õ.
20Mofõnu sibai Herode ba niha ba Diro awõ ba Zidona. Bõrõ da'õ fao ira fefu wangondrasi ya'ia. Si fõfõna lafawe'e Mbalasito, mandru ba nomo Herode ena'õ fao ia awõra. Aefa da'õ la'ondrasi Herode, la'andrõ ena'õ te'atulõ'õ ira, me moroi ba danõ Herode mbalazora.
21Samuza ma'õkhõ ba ngaluo si no muhonogõi, ifake mbaru wa'asalaw̃a Herode dumadao ia ba dadaoma wa'arazo, ba ibõrõtaigõ fahuhuo fõna niha sato.
22Mu'ao niha sato samondrongo lamane, "Fehede lowalangi da'õ, tenga fehede niha!"
23Ba ginõtõ da'õ gõi ihuku Herode andrõ mala'ika Zo'aya bõrõ me lõ ifosumange Lowalangi. I'a elew̃azi Herode ba mate ia.
24Itugu teboloso Daroma Li Lowalangi ba itugu mofa'abõlõ.
25Me no la'asiwai halõw̃õra ira Baranaba ba Saulo, mangawuli ira moroi ba Yeruzalema ba la'ohe awõra Yohane ba Mareko.
Download Audio MP3 (Kisah Para Rasul 12):
Mobile (Low Quality) - CD (High Quality)
<< Kisah Para Rasul 12 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel