Alkitab Mobile SABDA
[VER] : [NIAS]     [PL]  [PB] 
 <<  Kisah Para Rasul 28 >> 

1Me no auri ndra'aga ba me no marugi danõ, awena ma'ila wa tõi hulo andrõ ya'ia Malata.

2Sõkhi sibai dõdõ zowanua ba hulo andrõ khõma. Latema'õ ndra'aga fefu ba la'ewua'õ galitõ khõma, bõrõ me ibõrõtaigõ moteu ba no okafukafu danõ.

3I'owuloi geu Faulo, ba ibe'e geu andrõ yaw̃a ba galitõ. Me ihalõhalõ geu, idou dangania ulõ si mõi baero bõrõ wa'aukhu galitõ.

4Me la'ila niha mbanua andrõ no manaw̃anaw̃a gulõ ba danga Waulo, faoma lamane khõ nawõra, "Tatu samunu niha ia andre, bõrõ hew̃a'ae aefa ia ba wa'amate ba nasi, lõ sa'atõ itehe auri ia lowalangi wa'atulõ."

5Ifazaumba gulõ andrõ Faulo bakha ba galitõ ba ma'ifu lõ irasoi wa'afõkhõ.

6Lamane dõdõra, tatu lõ aratõ abao dangania ba i'anema'õ alau ia tou ba mate. Ba me no ara labaloi lõ hadõi sahõli dõdõ zalua khõnia, tebulõ gera'erara ba lamane lowalangi Waulo andrõ.

7Lõ arõu moroi ba da'õ danõ khõ Wubelio, salaw̃a mado ba hulo andrõ. Itema'õ ndra'aga faoma fa'asõkhi dõdõ, tobali tomenia tõlu ngaluo wa'ara.

8Me inõtõ da'õ mofõkhõ namania, fõkhõ fa'aukhu ba fendro dalu. Mõi Waulo wamaigi ama sofõkhõ andrõ ilau mangandrõ ba itufa tangania irege dõhõ.

9Bõrõ zalua andrõ fefu zofõkhõ ba hulo la'ondrasi Waulo, ba tefadõhõ ira.

10Oya labe'e mbuala khõma, ba me moloyo ndra'aga, la'ohe khõma ba gõfa fefu zoguna khõma ba lala.

11Me no tõlu waw̃a ndra'aga ba da'õ, mofanõga matõrõ gõfa moroi ba Alesandria sanao ba labua andrõ me inõtõ wa'okafukafu. So dandra ba gõfa andrõ, "Lowalangi Si Faero Kosotori ba Foluki".

12Ba manao ndra'aga ba Zirakusa, torõi ndra'aga tõlu ngaluo ba da'õ.

13Moroi ba da'õ moloyo ndra'aga ma'osisi zinga nasi irugi mbanua Regiu. Mahemolu da'õ so nangi moroi raya, bõrõ da'õ marugi mbanua Wutioli ba zi dua ngaluo.

14Ba da'õ falukha ndra'aga õsa zamati khõ Yesu, bõrõ wogaonira wa torõi ndra'aga khõra samigu wa'ara. Aefa da'õ mofanõga numalõ ba Roma.

15Larongo duriama ira talifusõ si faduhu tõdõ khõ Yesu ba Roma. Tohare ira irugi mbanua Afioso awõ Fasagaraha Tõlu, wamaondragõ ya'aga. Me falukha khõra Waulo, i'andrõ saohagõlõ khõ Lowalangi ba tobali terara dõdõnia.

16Ba me marugi Roma, latehegõ khõ Waulo sambua nahiania ba samõsa zaradadu sanaro ya'ia.

17Me no irugi tõlu ngaluo, ikaoni Faulo ndra satua niha Yahudi ba nahia andrõ. Me no owulo ira imane khõra, "He ya'ami ira talifusõ! Ma'ifu lõ salagu ba soida, ma zui no ulaw̃a hukuhuku nitemada moroi khõ ndra tuada. Ba hew̃a'ae si manõ lara'u ndra'o ba Yeruzalema ba labe'e ndra'o ba danga niha Roma.

18Me no aefa lafareso warakarogu, omasi ira la'efa'õ ndra'o, bõrõ me oroma wa lõ nilaugu hadia ia zi tola mu'etu'õ huku famunu.

19Ba hiza bõrõ me lõ fao dõdõ niha Yahudi, u'andrõ ena'õ la'etu'õ hukumagu ba rafe zanguhuku Kaizaro ba Roma. Tenga da'õ wa ulau zi manõ bõrõ me so wangadugu ba soigu samõsa.

20Ba da'õ mbõrõ wa omasi ndra'o falukha khõmi wahuhuosa; bõrõ me no labe'e mbilagu ba dangagu, ha bõrõ Zangorifi andrõ nidõnadõna niha Gizera'eli."

21Ba lasofu khõnia lamane, "Ma'ifu lõ nitemama sura moroi ba Yudea sanandrõsa khõu. Ba samõsa lõ si tohare moroi sa ba da'õ wame'e turia sanandrõsa khõu ma zui turia si lõ sõkhi khõu.

22Ba hiza omasi gõi ndra'aga wamondrongo si faduhu dõdõu, bõrõ me no marongo no la'o'aya niha sato fefu wamahaõ nifatimõ andrõ."

23Bõrõ da'õ lahonogõi samuza ma'õkhõ wa'owulo. Ba ngaluo da'õ ato niha sangondrasi nahia Waulo. I'otarai zahulõwongi irugi tanõ owi i'ombakha'õ ba ituriaigõ khõra duria sanandrõsa ba wamatõrõ Lowalangi. I'oigõ dõdõnia Faulo ena'õ faduhu dõdõra khõ Yesu, ihalõ ayati moroi ba Mbuku Moze awõ Mbukubuku ndra Sama'ele'õ.

24So zi faduhu tõdõ ba niw̃a'õ Waulo, ba so gõi zi lõ faduhu tõdõ.

25Larõi nahia andrõ lõ fahasara dõdõ, me no aefa ibotokhi khõra Faulo si mane da'e, "Atulõ sibai niw̃a'õ Geheha Lowalangi, nifa'ema Yesaya sama'ele'õ khõ ndra tuami!

26Imane Eheha Lowalangi andrõ, 'Ae'e w̃a'õ ba soi andre: Lõ mamalõ mirongo, ba hiza lõ aboto ba dõdõmi; lõ mamalõ mifaigi, ba hiza lõ oroma khõmi.

27Bõrõ me no abe'e dõdõ soi andre, no laduhõ dõgi dalingara, ba no laduhõ hõrõra. Imane Lowalangi, na tenga si manõ, tatu la'ila hõrõra ba larongo tõgi dalingara aboto ba dõdõra ba mangawuli ira khõ-Gu, ba Ufadõhõ ira.'"

28Ba gafuriata imane Faulo, "Lõ tola lõ'õ aboto ba dõdõmi ira talifusõ wa no teturiaigõ ba soi tanõ bõ'õ si tenga niha Yahudi duria wangorifi andrõ soroi Lowalangi. Ba la'o'õ ya'ira andrõ dania."

29[Me no aefa iw̃a'õ da'õ Faulo, larõi nahia andrõ niha Yahudi faoma fasoso ira khõ nawõra.]

30Dua fakhe wa'ara torõi Waulo ba Roma, ba nomo nisew̃ania. Omuso dõdõnia wanema fefu niha sangondrasi ya'ia.

31Faoma fa'abarani ituriaigõ khõra zanandrõsa ba wamatõrõ Lowalangi ba sanandrõsa khõ Yesu Keriso. Lõ aiw̃õ Waulo wamalua da'õ ba lõ sanenaw̃a ya'ia.



Download Audio MP3 (Kisah Para Rasul 28):
Mobile (Low Quality) - CD (High Quality)

 <<  Kisah Para Rasul 28 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel