1Fatua fahuhuo Wetero ba Yohane ba niha sato andrõ, la'ondrasi ira ere sebua ba komandra sanaro ba Nomo Zo'aya awõ ndra Sadukai'o.
2Mofõnu ira bõrõ me law̃a'õ ira Fetero ba Yohane wa no auri mangawuli Yesu moroi ba wa'amate.
3Lara'u ndra sinenge si darua andrõ ba labe'e ba gurunga. Ba me no bongi, lataha Wetero ba Yohane ba da'õ irugi mahemolu.
4Ba ato zamondrongo famahaõ ndra sinenge andrõ zi faduhu tõdõ. Itugu ato ira so mato lima ribu niha.
5Mahemolu da'õ owulo ba Yeruzalema ndra satua sanguhuku ba agama, ba ira salaw̃a niha Yahudi ba ira guruguru agama.
6Falukha ira khõ Gere Sebua Hanasi, awõ Gayafa, Yohane ba Alesandro awõ fefu zo'amakhaita ba gere sebua andrõ.
7La'ohe fõnara Wetero ba Yohane. Lasofu khõra lamane, "Hewisa wamadõhõmi niha sombuyumbuyu andrõ? Moroi ha'õkhõ kuaso awõ wa'abõlõ wolaumi da'õ?"
8Itema li Fetero, nifatõrõ Geheha Lowalangi, imane, "Ya'ami sondrõnia'õ soi awõ ndrotondroto zanguhuku nifosumange!
9Lahuku ndra'aga ma'õkhõ bõrõ me no malau zi sõkhi wamadõhõ niha sombuyumbuyu. Ba hiza, omasi ami mi'ila hewisa lala wamadõhõ niha andrõ.
10Bõrõ da'õ, ya'aboto ba dõdõmi awõ fefu soi Gizera'eli, wa si zizio fõnami iada'e no si lõ fõkhõ, bõrõ wa'abõlõ ba kuaso moroi khõ Yesu Keriso banua Nazareta andrõ. No miforõfa Yesu andrõ, ba hiza no I'orifi Ia mangawuli Lowalangi.
11Da'õ Yesu andre niw̃a'õ ba ayati Mbuku Ni'amoni'õ, 'Kara nitibo'õmi ya'ami sotomo, tobali kara sabõlõ moguna.'
12Ha khõ Yesu tola te'orifi niha. Bõrõ ba zi sagõrõ ulidanõ lõ niha bõ'õ si no manema kuaso moroi khõ Lowalangi ba wangorifi ya'ita."
13Ahõli dõdõ ndrotondroto rafe andrõ wangila fa'abarani Wetero ba Yohane, mendrua manõ me aboto ba dõdõra wa sinenge si darua andrõ no niha si to'õlõ manõ si lõ sekola. Ba awena aboto ba dõdõra wa solo'õ Yesu ira andrõ.
14Ba lõ hadia ia zi tola law̃a'õ, bõrõ me so fõnara niha si no mufadõhõ andrõ si fao khõ Wetero ba Yohane.
15Lafofanõ baero moroi ba nahia rafe zinenge andrõ si darua, aefa da'õ mamagõlõ ira.
16Lamane, "Hadia nilauda ba niha andrõ? No aboto ba dõdõ niha si so ba Yeruzalema wa niha si darua andre zolau sahõlihõli dõdõ andrõ. Tebai ta'osilõ'õgõ da'õ.
17Ba hiza fabõi tehõngõ ba niha sato, da tafeta'u ira fabõi sa'ae fahuhuo ira gofu ha'õkhõ ba dõi Yesu."
18Lakaoni mangawuli ndra sinenge andrõ. La'ombakha'õ khõra wa tebai sa'ae latõtõi ma zui lafahaõ niha ba dõi Yesu.
19Ba hiza lamane wanema li Fetero ba Yohane, "Mi'angeragõ hadia zatulõ fõna Lowalangi: folo'õ niw̃a'õmi ma folo'õ niw̃a'õ Lowalangi.
20Bõrõ me tebai mabato wangombakha si no ma'ila ba marongo samõsa."
21Ma'ifu lõ lasõndra ndrotondroto rafe andrõ danedane wanguhuku Fetero ba Yohane. Lafeta'u ndra sinenge andrõ si darua ba aefa da'õ la'efa'õ ira, me lasuno Lowalangi fefu niha bõrõ zalua andrõ.
22Niha nifadõhõ da'õ, no tõra õfa wulu fakhe ndrõfinia.
23Me no aefa Wetero ba Yohane, mangawuli ira khõ nawõra. Latutunõ fefu niw̃a'õ ndra ere sebua ba ira salaw̃a niha Yahudi andrõ khõra.
24Me larongo da'õ awõra, lalau mangandrõ ba ha sara dõdõra khõ Lowalangi. Lamane, "He So'aya, no sombõi banua si yaw̃a, ulidanõ ba asi awõ nõsinia Ndra'ugõ.
25No fahuhuo Ndra'ugõ khõ duama Dawido, sawuyu-Mõ andrõ ba Geheha-Mõ; no Õmane, 'Hana mofõnu niha si lõ mangila So'aya; Hana wa lafakhoi zi lõ guna soi andrõ fefu?
26Mama'anõ razo ba gulidanõ wanuwõ, ba ha sara dõdõ zalaw̃a wolaw̃a So'aya Razo Sangorifi andrõ.'
27No lafalua walukhata ira Herode ba Fondrio Filato awõ niha si lõ aboto ba dõdõ So'aya ba ira niha Gizera'eli si so ba mbanua andre. Lalau walukhata ba wolaw̃a Yesu, Enoni-U si lõ farõi andrõ, si no tobali Razo Sangorifi.
28Ha sara dõdõra wolau hadia ia fefu, si no Õhonogõi mbõrõta wa alua dania. Ba Õhonogõigõ da'õ ba kuaso awõ ba zomasi'Õ samõsa.
29Faigi iada'e So'aya no fahõ'õ ira khõma. Ba tehegõ khõma ira enoni-Mõ andre, fa bõi ata'u ndra'aga wangombakha turia-Mõ.
30Be'e wanolo ena'õ tola tefadõhõ zofõkhõ ba tefalua zagahõlihõli dõdõ awõ zi lõ harumani ba kuaso ba fa'abõlõ ba dõi Yesu, Enoni-Mõ andrõ ni'amoni'õ."
31Me no awai lalau mangandrõ, ba mudõgõ nahia sowulo ira andrõ. Ifatõrõ ira fefu Eheha Lowalangi, ba ibõrõtaigõ barani sibai ira wangombakha turia soroi Lowalangi.
32Fefu niha si faduhu tõdõ andrõ ha sara dõdõ ba ha sambua gera'era. Lõ ba gotaluara sanguma'õ wa ha khõnia manõ hadia ia zi so khõnia. Fefu zi so khõra faoma la'oguna'õ.
33Si fao kuaso sebua, lafaduhu'õ ira sinenge andrõ wa no ifuli auri Yesu. Ba ifahowu'õ sibai ira Lowalangi.
34Lõ ba gotaluara zambõ hadia ia. Bõrõ me lafamawa mbenua ba omora si so omo awõ mbenua; ba la'ohe gefe bõlinia
35labe'e ba danga ndra sinenge. Aefa da'õ labagibagi gefe andrõ ba niha sangoguna'õ ya'ia.
36Si manõ gõi Yosefo. No ifamawa mbenuania, i'ohe gefe bõli mbenua andrõ ba ibe'e ba danga ndra sinenge. Yosefo no nga'õtõ Lewi; lafotõi gõi ia Baranaba ira sinenge (eluahania Fondrara Dõdõ).
37(4:36)
Download Audio MP3 (Kisah Para Rasul 4):
Mobile (Low Quality) - CD (High Quality)
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel