Alkitab Mobile SABDA
[VER] : [NIAS]     [PL]  [PB] 
 <<  Kisah Para Rasul 8 >> 

1Ba omuso dõdõ Zaulo wangi'ila famunu andrõ. Me luo da'õ gõi, ibõrõtaigõ lagohi zamati ba Yeruzalema, irege fefu ira muzawili ba zi sagõrõ tanõ Yudea ba Samaria baero ndra sinenge andrõ.

2Lako'o Zitefano ya'ira sangata'ufi Lowalangi ba mege'ege sibai ira.

3Ba itohugõ wamakao banua Yesu Saulo andrõ. Idõdõrõdõrõi nomo ba idõni baero niha samati, ba ibe'e ira bakha ba gurunga.

4Laturiaigõ Duria Somuso Dõdõ soroi Lowalangi gofu heza niha samati si zawili andrõ.

5Numalõ Wilifo ba mbanua Zamaria ba ituriaigõ ba niha si so ba da'õ zanandrõsa khõ Razo Sangorifi nifabu'u Lowalangi.

6Me larongo fahuhuo Wilifo ba la'ila dandra sahõlihõli dõdõ nilaunia, ba ato zanõngõni hadia niw̃a'õ Wilifo.

7Oya wa'abõlõ zi lõ sõkhi so'ira'ira, me tefofanõ ira moroi ba niha si no ira'u fa'abõlõ zi lõ sõkhi andrõ. Oya gõi niha sombuyumbuyu ba niha sakelakela nifadõhõ.

8Ba oi omuso dõdõ niha si so ba Zamaria andrõ.

9Ba mbanua da'õ so samõsa zotõi Simoni, no ara tehõngõ ia ba niha Zamaria bõrõ wa'ebua gelemunia. Imane ba niha sato. Niha si lõ harumani wa'ebua ndra'odo andre.

10Oi ahõli dõdõ niha fefu wamaigi ya'ia. Lamane, "Fa'abõlõ Lowalangi niha andre, nifotõi 'Fa'abõlõ Sebua'."

11No ara sibai ibe'e ahõlihõli dõdõ niha irege lafaigifaigi sibai ia.

12Ba hiza ituriaigõ khõra Filifo Duria Somuso Dõdõ sanandrõsa ba wamasindro Lowalangi famatõrõ-Nia ba gulidanõ andre awõ zanandrõsa khõ Yesu Keriso, Razo Sangorifi andrõ. Ba faduhu dõdõra ba duria nifa'ema Wilifo, ba tebayagõ idanõ ira -- he ira matua ba si manõ gõi ndra alawe.

13Faduhu gõi dõdõ Zimoni. Ba me no aefa labayagõ idanõ ia, maoso ia i'o'õ Wilifo. Ahõli dõdõ Zimoni ba zagahõlihõli dõdõ andrõ salua.

14Larongo ira sinenge ba Yeruzalema wa no latema Daroma Li Lowalangi niha Zamaria. Bõrõ da'õ lafatenge ndra Fetero ba Yohane ba da'õ.

15Me tohare ndra Fetero ba Yohane, mangandrõ ira ena'õ latema Geheha Lowalangi niha Zamaria,

16bõrõ me samõsa lõ ba gotaluara nifatõrõ Geheha Lowalangi, me ha ba dõi Yesu So'aya labayagõ idanõ ira.

17Latufa tanga ira Yohane ba Fetero hõgõ ndra niha Zamaria andrõ; ba latema Geheha Lowalangi.

18I'ila Simoni wa bõrõ me latufa hõgõ niha Zamaria andrõ ira sinenge wa manema Eheha Lowalangi ndra niha andrõ. Maoso Zimoni i'ohe gefe khõ ndra sinenge, khõ Wetero ba Yohane,

19imane, "Mibe'e khõgu kuaso andrõ gõi ena'õ na utufa hõgõ niha, latema Geheha Lowalangi."

20Imane Fetero, "Ya mõi ndra'ugõ si fao ana'au andrõ! Hadia õwalinga tola ni'õli faoma kefe mbuala Lowalangi andrõ?

21Lõ moguna ndra'ugõ wefao ba halõw̃õma, bõrõ me lõ atulõ dõdõu khõ Lowalangi.

22Bõrõ da'õ rõi gera'era dõdõu si lõ sõkhi andrõ, ba angalulu ba wangandrõ khõ Zo'aya ena'õ I'efa'õ khõu gera'era si lõ sõkhi andrõ!

23Bõrõ me afõnu fa'alege dõdõu ba i'osawuyu ndra'ugõ si lõ sõkhi."

24Ba imane Simoni khõ Wetero ba Yohane, "Mitolo, mi'andrõ khõ Zo'aya ena'õ ma'ifu bõi alua khõgu niw̃a'õmi andrõ."

25Me no aefa mamaduhu'õ ira ba laturiaigõ Daroma Li Zo'aya, mangawuli Wetero ba Yohane ba Yeruzalema. Ba dalu lala laturiaigõ Duria Somuso Dõdõ ba mbanubanua ba danõ Zamaria.

26Muhede samõsa mala'ika Zo'aya khõ Wilifo imane, "Ae'e ofanõ! Ae'e tanõ miyõu ba lala sanõrõ Yeruzalema numalõ ba Gaza." Lõ nihaniha ba lala andrõ.

27Mofanõ Wilifo. Ba ginõtõ da'õ so fagaw̃e sebua ba nomo Razo Etiofia mangawuli ia ba mbanuara. Fagaw̃e sebua niha andrõ sololohe fefu okhõta Kandrake, ratu ba Getiofia. No mõi niha andrõ ba Yeruzalema wangandrõ khõ Lowalangi ba iada'e mangawuli ia ba guretania. Ba wedadaonia ba gureta ibaso Mbuku Yesaya Sama'ele'õ.

28(8:27)

29Imane Eheha Lowalangi khõ Wilifo, "Ae'e hatõ'õgõ ba gureta andrõ."

30Ihatõ'õ ia ba gureta Filifo ba irongo mombaso Buku Yesaya niha andrõ. Isofu khõnia Filifo imane, "Hadia aboto ba dõdõu nibasomõ andrõ?"

31Itema li niha andrõ imane, "Hewisa wa tola aboto ba dõdõgu, na lõ niha samobawa lala khõgu?" Ikaoni Wilifo we'amõi yaw̃a ba gureta awõnia.

32Da'e ayati andrõ nibasonia, "Hulõ mbiribiri ni'ohe ba wanaba ia, hulõ nono mbiribiri si lõ hedehede na laguti mbu-Nia, si manõ Ia lõ hedehede.

33La'o'aya Ia ba lalau khõ-Nia zi lõ atulõ. Teheta noso-Nia moroi ba gulidanõ irege samõsa lõ si tola manutunõ nga'õtõ-Nia."

34Imane fagaw̃e sebua andrõ khõ Wilifo, "Tandraigõ ombakha'õ khõgu haniha niw̃a'õ zama'ele'õ andre? Hadia ya'ia samõsa ma zui niha bõ'õ?"

35Ibõrõtaigõ fahuhuo Wilifo; i'oguna'õ ayati'ayati andrõ ba wamõbõrõ fanuriaigõ Turia Somuso Dõdõ sanandrõsa khõ Yesu khõ fagaw̃e sebua andrõ.

36Ba dalu lala larugi nahia si so idanõ. Imane fagaw̃e andrõ, "Faigi hiza nidanõ! Hadia nasa zambõ fa tola tebayagõ idanõ ndra'o?"

37[Imane Filifo, "Na moroi ba dõdõu wa'afaduhu dõdõ, tola mubayagõ ndra'ugõ idanõ." Imane fagaw̃e sebua moroi ba Getiofia andrõ, "Faduhu dõdõgu wa Yesu Keriso no Ono Lowalangi."]

38Ifolombase guretania; fao ira Wilifo fagaw̃e andrõ, darua ira we'amõi ba nidanõ, ba ibayagõ ia idanõ Filifo.

39Ba me mõi ira yaw̃a moroi ba nidanõ, ihalõ Wilifo Eheha Lowalangi moroi ba nahia andrõ. Lõ sa'ae i'ila ia fagaw̃e banua Getiofia andrõ. Itohugõ wofanõnia fagaw̃e sebua andrõ fao fa'omuso dõdõ.

40I'anema'õ ba Gasoto so Wilifo. Ba me itohugõ wofanõnia, ituriaigõ Duria Somuso Dõdõ sanandrõsa khõ Yesu ba mbanua misa irugi Kaizarea.



Download Audio MP3 (Kisah Para Rasul 8):
Mobile (Low Quality) - CD (High Quality)

 <<  Kisah Para Rasul 8 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel