Alkitab Mobile SABDA
[VER] : [NIAS]     [PL]  [PB] 
 <<  Lukas 15 >> 

1Samuza ma'õkhõ, ato zangozara beo awõ niha si lõ sõkhi molo'õ fanguma'õ niha sato, si tohare ba wamondrondrongo famahaõ Yesu.

2Ibõrõtaigõ mukõkõkõkõ ndra Farizai'o awõ ndra sangila amakhoita. Lamane, "E, Itema niha si lõ sõkhi niha andre, ba manga Ia awõra!"

3Bõrõ da'õ Itutunõ khõra gamaedola andre Yesu,

4"Na so ba gotaluami zokhõ otu nga'eu mbiribiri ba taya sageu -- hadia nilaunia? Tatu irõi mbiribiri si siw̃a wulu a siw̃a nga'eu andrõ ba mbenua, ba mõi ia wangalui selungu andrõ irege isõndra.

5Ba na isõndra mangawuli mbiribiri andrõ, ba i'angalisigõ si fao fa'omuso dõdõ,

6i'ohe mangawuli ba nomo. Aefa da'õ ikaoni nawõ'awõnia awõ zi fahatõ omo khõnia, imane khõra, 'Mi'aine, ta'omusoi'õ dõdõda. No usõndra mangawuli mbiribirigu si taya andrõ!'

7Si manõ gõi, so wa'omuso dõdõ sabõlõbõlõ ba zorugo bõrõ niha samalalini era'era he ha samõsa, moroi ba niha si siw̃a wulu a siw̃a niha si sõkhi si lõ moguna mamalalini era'era."

8"Ma zui na samõsa ndra alawe sokhõ fulu ngawua gefe firõ, atoru sambua, hadia nilaunia? Tatu itunu wandru ba ibõzini nomonia, ihaogõ wangalui kefe andrõ irege isõndra.

9Na no isõndra, ikaoni nawõnia awõ zi faola omo khõnia ba imane khõra, 'Omuso sibai dõdõgu me no usõndra gefegu satoru. Mi'aine, ta'omusoi'õ dõdõda!'

10Si manõ gõi mala'ika ba zorugo na mangesa dõdõ zi samõsa niha moroi ba horõnia."

11Fahuhuo zui Yesu, Imane, "So niha si so darua nono matua.

12Imane siakhi khõ namania, 'He Ama, be'e iada'e dana khõgu moroi ba haratoda.' Ba ibagibagi harato andrõ ba ndraononia si darua.

13Lõ ara aefa da'õ, ifamawa fefu harato nitemania siakhi ba ilau mofanõ ba danõ sarõu. Ba da'õ ihorigõ gefenia andrõ ba zi lõ boto.

14Me no ahori gefenia fefu, alua lofo sebua ba danõ andrõ, irege ibõrõtaigõ numana ia.

15Mõi ia mohalõw̃õ ba zowanua ba da'õ, ba lafatenge ia wokubaloi bawi ba mbenua.

16Olofo sibai ia, irege omasi ia ifo'õsi dalunia lõlõ mbanio õ mbawi andrõ. Ba he si manõ, samõsa lõ same khõnia õ.

17Ba gafuriata awena maniasa ia ba imane, 'Lasõndra gõ ira sohalõw̃õ khõ namagu, ba hiza arakhagõ mate ndra'o wa'olofo ba da'e!

18Mofanõdo ba mõido khõ namagu ba umane khõnia: He Ama, no ufazõkhi horõ fõna Lowalangi ba fõnau.

19Tenga sinangea sa'ae latõtõi onou ndra'odo. Akha hulõ zohalõw̃õ khõu ndra'o, Ama!'

20Ba mofanõ ia mangawuli khõ namania. Me arõu ia nasa moroi ba nomo, ba no i'ila ia amania. Ba ahakhõ sibai dõdõ namania ia, fagohi namania ba wamaondragõ ya'ia, italagui ba i'ago mbawa.

21Imane ono siakhi khõ namania, 'He Ama, no ufazõkhi horõ fõna Lowalangi ba fõnau. Tenga sinangea sa'ae latõtõi onou ndra'odo.'

22Ikaoni zohalõw̃õ khõnia amania imane, 'Mi'alio'õ mihalõ nukha sabõlõ sõkhi ba mibe'e khõnia. Mibe'e laeduru ba durunia ba badagahe ba gahenia.

23Aefa da'õ mihalõ nono zaw̃i satabõ ba mitaba, talau manga ba ta'omusoi'õ dõdõda.

24No mate nonogu andre ba no ifuli auri iada'e; no elungu, ba no musõndra mangawuli.' Ba labõrõtaigõ la'omusoi'õ dõdõra.

25Gasagasa da'õ ba nowi so nono sia'a. Ba mangawuli ia. Me no ahatõ ba nomo, irongo li sanunõ awõ wolaya.

26Isofu ba zohalõw̃õ khõra, imane, 'Hadia da'õ ba nomo?'

27Imane sohalõw̃õ andrõ, 'No mangawuli nakhiu! Ba no itaba zaw̃i sabõlõ atabõ amau bõrõ me no ifuli isõndra mangawuli nononia!'

28Mofõnu sibai nono sia'a andrõ, irege lõ omasi ia mõi bakha ba nomo. Mõi namania baero wondrara tõdõnia.

29Imane khõ namania, 'Hiza, no ha'uga fakhe mohalõw̃õ ndra'o khõu, Ama. Lõ irai ufadaõ niw̃a'õu. Ba hadia nibe'eu khõgu? Lõ irai na'i õbe'e khõgu nambi ena'õ ulau gowuloa si fao ira awõ'awõgu!

30Onou andrõ si no mangohori haratomõ ba ndra alawe sohorõhorõ, no mangawuli ia, ba õtaba nono zaw̃i satabõ khõnia!'

31Itema linia amania, 'He onogu, ba da'e so ndra'ugõ awõgu. Fefu zi so khõgu ba no khõu.

32Ba iada'e talau manga ba ta'owuawua'õ dõdõda, me akhiu si no mate andrõ no ifuli auri iada'e; no elungu ia, ba no musõndra mangawuli.'"



Download Audio MP3 (Lukas 15):
Mobile (Low Quality) - CD (High Quality)

 <<  Lukas 15 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel