Alkitab Mobile SABDA
[VER] : [NIAS]     [PL]  [PB] 
 <<  Lukas 20 >> 

1Samuza ma'õkhõ, mamahaõ Yesu ba wanuriaigõ Turia Somuso Dõdõ soroi Lowalangi ba niha sato si so ba Nomo Zo'aya. Tohare ndra ere sebua awõ ndra guruguru agama niha Yahudi, si fao ira salaw̃a niha Yahudi.

2Lamane khõ Yesu, "Tandraigõ ombakha'õ khõma, he moroi Õsõndra kuaso wamalua da'e. Haniha zame'e khõ-U?"

3Itema li Yesu, "Omasido gõi Ube'e wanofu khõmi. Ombakha'õ khõ-Gu,

4haniha zame'e kuaso khõ Yohane wamayagõ idanõ niha. Hadia Lowalangi ma zui niha?"

5Mamagõlõ ira. Faoma lamane khõ nawõra, "Hewisa wanemada li-Nia? Na tamane, 'Moroi ba Lowalangi,' Imane khõda dania, 'Ba hana wa lõ faduhu dõdõmi khõ Yohane?'

6Ba hiza, na tamane, 'Moroi ba niha.' Latebu ita fefu niha sato andre, bõrõ me faduhu sibai dõdõra wa sama'ele'õ Yohane Samayagõ Idanõ andrõ."

7Andrõ lamane wanema li, "Lõ ma'ila."

8Imane khõra Yesu, "Na si manõ lõ'õ gõi U'ombakha'õ khõmi heza moroi kuaso wolau-Gu fefu da'e."

9Itutunõ Yesu ba niha sato gamaedola andre, "Samõsa niha sokhõ kabu nagu. Ifasew̃a'õ kabu andrõ ba zangahalõ, aefa da'õ numalõ ia ba nahia tanõ bõ'õ ba ara sibai ia ba da'õ.

10Me no irugi inõtõ waneteu bua nagu, ifatenge zawuyunia khõ zangahalõ ba kabu nagu andrõ, ba wanema tana khõnia ba kabu andrõ. Ba labõbõzi zawuyu sangahalõ ba kabu andrõ ba lafofanõ ia lõ zaozao.

11Ifuli ifatenge zawuyu bõ'õ; ba labõbõzi zui zawuyu andrõ, la'o'aya ba la'ailasi, ba lafofanõ lõ zaozao.

12Aefa da'õ ifatenge zawuyunia ganete zi darua andrõ. Labõbõzi zawuyu andrõ ba latibo'õ baero kabu.

13Ba gafuriata imane sokhõ kabu andrõ, 'Hadia nasa nilaugu? Ufatenge nono andre ni'omasi'õgu. Tatu manõ wa lafosumange ia!'

14Ba hiza me la'ila ira sangahalõ ba kabu nononia, faoma lamane khõ nawõra, 'Ya'e ia nono zokhõ kabu andre. Da tabunu ia, ena'õ mõi khõda haratonia.'

15Lasõbi ia baero kabu ba labunu ia." Isofu Yesu ba niha samondrongo amaedola andrõ, "Iada'e, hadia nilau zokhõ kabu andrõ khõ zangahalõ ba kabunia?

16Tatu tohare ia ba ibunu fefu zangahalõ ba kabu andrõ, ba ibe'e kabu andrõ ba zangahalõ tanõ bõ'õ." Me larongo niha sato zi manõ, lamane khõ Yesu, "Tebai zi manõ!"

17Ifaigi ira Yesu imane, "Na si manõ, hadia geluaha Mbuku Ni'amoni'õ andre? 'Kara nitibo'õ tuka, da'õ zi tobali kara sabõlõ moguna.'

18Salau ba gara andrõ afufu; ba nilangõnia, akhõkhõ tobali awu."

19Aboto ba dõdõ ndra guruguru agama niha Yehuda awõ gere sebua wa khõra Itandrõsaigõ gamaedola andrõ. Omasi ira wondra'u Yesu ba da'õ, ba hiza ata'u ira niha sato.

20Andrõ la'alui ginõtõ si sõkhi. Lasõlõ niha ba wama'ala Yesu, ba lafawe'e niha andrõ ena'õ la'osatulõ ira ba wamesu li Yesu ba zinofura, ena'õ tola labe'e Yesu ba danga gubernur.

21Lamane khõ Yesu ira niha nifatenge ndra guruguru agama awõ ndra ere sebua andrõ, "He Amagu Guru, ma'ila gõi wa lõ ebua dõdõ-U ba zi samõsa niha; õfahaõ zindruhu sanandrõsa ba zomasi Lowalangi.

22Tandraigõ ombakha'õ khõma, molo'õ agamada, hadia tola tabu'a beo khõ Kaizaro Roma ma zui lõ'õ?"

23I'ila Yesu gera'era dõdõra. Andrõ wa Imane,

24"Mitandraigõ miforoma'õ khõ-Gu sambua gefe firõ. Haniha ba ha'õkhõ dõi si so ba gefe andrõ?" Lamane, "Kaizaro!"

25Imane khõra Yesu, "Na si manõ, fuli khõ Kaizaro dana khõ Kaizaro ba fuli khõ Lowalangi dana khõ Lowalangi."

26Lõ hadõi nisõndrara sala Yesu fõna niha sato andrõ. Lõ hedehedera ba ahõlihõli dõdõra ba wanema-Nia lira.

27So ndra Sadukai'o sangondrasi Yesu. (Ya'ira andrõ, lõ faduhu dõdõra wemaoso moroi ba wa'amate.) Lasofu khõ Yesu,

28"He Amagu Guru, no isura huku andre khõda Moze. Na mate zi samõsa ira matua, ba irõi ndrongania lõ ono, mangowalu ndra alawe andrõ ba dalifusõ wo'omonia, ena'õ tola lasõndra ndraono ba niha si no mate andrõ.

29So dafitu zi fatalifusõ. Mangowalu zia'a, ba mate ia lõ ono.

30Aefa da'õ mangowalu dalifusõ ndra matua andrõ khõ ndra alawe lakha mbanua da'õ, ba lõ gõi onora.

31Aefa da'õ mangowalu zui dalifusõnia ganete da'õ, ba irege dafitu: ba dafitu manõ ira no lahalõ fo'omora ndra alawe andrõ, ba mate ira lõ ono.

32Afuriatania mate gõi ndra alawe andrõ.

33Na luo wangorifi zi no mate, ha fo'omo ndra alawe andrõ dania? Bõrõ me dafitu manõ ira no irai lahalõ ia tobali fo'omora."

34Imane wanema li Yesu, "Mangowalu niha sauri iada'e,

35ba lõ fangowalu ba niha ni'orifi dania moroi ba wa'amate ba sauri ba ginõtõ si so fõna.

36Hulõ mala'ika ira, bõrõ me lõ mate ira sa'ae. Tobali ira ono Lowalangi, bõrõ me no te'orifi ira moroi ba wa'amate.

37No iw̃a'õ sibai gõi Moze wa lõ tola lõ'õ te'orifi mangawuli zi no mate. Ba nisurania sanandrõsa ba za'asa'a mao si hola andrõ itõtõi Zo'aya 'Lowalangi Gaberahamo, Lowalangi Giza'aki ba Lowalangi Yakobo.'

38Tenga Lowalangi zi mate Lowalangi andrõ, no Lowalangi zauri! Bõrõ me khõ Zo'aya auri fefu niha."

39Lamane õsa guruguru agama niha Yehuda, "Wa'asõkhi wanema-U li Ama."

40Lõ barani ira sa'ae wanofu hadia ia khõ Yesu.

41Isofu Yesu khõra, "Hewisa wa law̃a'õ Razo Sangorifi nifabu'u Lowalangi andrõ nga'õtõ Dawido?

42Dawido samõsa zanguma'õ ba mbuku Zinunõ, 'Imane So'aya khõ Zo'aya ya'o: Dadao ba gambõlõ-Gu,

43Irege Ube'e barõ mbawau-U nudu-Mõ!'

44Na ikaoni 'So'aya', khõnia Dawido, hewisa wa tola nga'õtõ Dawido Razo Sangorifi andrõ?"

45Fatua lafondrondrongo huhuo Yesu, Imane khõ ndra solo'õ Ya'ia,

46"Mi'angelama khõ ndra guruguru agama niha Yehuda. Omasi ira mowaõwaõ ba lafake mbaru gere sanau, ba omasi ira nifosumasumange ba fasa. Omasi ira lafili nahia soadu ba gosali awõ gurusi solakhõmi ba gowuloa.

47Lalimo ndra lakha mbanua ba larabu nomora, ba la'anau'õ wangandrõra ena'õ la'ila niha! Lõ tola lõ'õ nihuku sabõlõbõlõ ira!"



Download Audio MP3 (Lukas 20):
Mobile (Low Quality) - CD (High Quality)

 <<  Lukas 20 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel