Alkitab Mobile SABDA
[VER] : [NIAS]     [PL]  [PB] 
 <<  Lukas 5 >> 

1Samuza ma'õkhõ, me muzizio Yesu ba zinga mbaw̃a Genesare, ato niha si fadegedege ba wamondrongo turia soroi Lowalangi.

2I'ila Yesu dua rozi dundraha ba zinga mbaw̃a andrõ; no mõi tou zi fadiala moroi ba dundraha ba wangehao dialara.

3Mõi yaw̃a Yesu ba dundraha si sara, tundraha Zimoni, ba Iw̃a'õ khõ Zimoni ena'õ ilulugõ dundraha andrõ ba mbaw̃a, arõu ma'ifu moroi ba zinga mbaw̃a. Ba mudadao Yesu yaw̃a ba dundraha da'õ mamahaõ niha sato.

4Me no aefa fahuhuo Ia, Imane khõ Zimoni, "Misola ba zabakha ba milau ndriala ba wama'u'u i'a."

5Itema li-Nia Simoni, "He Guru, sara wongi manõ no ma'eregesi tõdõ, ba lõ nisõndrama hadia ia! Ba me no Õw̃a'õ, ba ulau ndriala."

6Me no lalau zi mane niw̃a'õ-Nia, ba oya sibai lasõndra gi'a, irege arakhagõ asika ndrialara.

7Andrõ la'andrõ tolo ba nawõra ba dundraha bõ'õ. Ba tohare nawõra moroi ba dundraha bõ'õ, ba lafo'õsi ma'adua dundraha andrõ i'a afõnu, irege ahõndrõhõndrõ dundrahara.

8Me i'ila da'õ Simoni, mangalulu ia fõna Yesu, imane, "Heta'õgõ khõgu, So'aya! No niha sebua horõ ndra'odo!"

9Ba ahõlihõli dõdõ Zimoni awõ niha si fao khõnia me la'ila wa'oya gi'a nisõndrara.

10Si manõ gõi nawõ Zimoni, ya'ia Yakobo ba Yohane, ono Zebedai'o. Imane Yesu khõ Zimoni, "Bõi ata'ufi! I'otarai da'e ba tobali sama'u'u niha ndra'ugõ."

11Ba ladõni baene dundraha andrõ, aefa da'õ ba larõi fefu hadia ia, la'o'õ Yesu.

12Samuza ma'õkhõ, so Yesu ba zi sambua banua. Ba da'õ gõi so samõsa ndra matua si no afõnu bou auri, sageu ya'ia manõ, sata'u ita. Me i'ila Yesu, ituhi danõ wangalulu fõna-Nia fao wa ibe'e gangandrõw̃a khõ Yesu, Imane, "He Ama, na'omasi'Õ ba tola Õfadõhõ ndra'odo!"

13Ba I'oro'õ danga-Nia Yesu ba wombambaya niha andrõ Imane, "Omasi-Do ya dõhõ ndra'ugõ!" Ba'i'a nema'õ dõhõ niha andrõ, taya mbou auri ba mbotonia.

14Ba Itenaw̃a ia Yesu ena'õ bõi i'ombakha'õ da'õ gofu ha'õkhõ, Imane, "Ae foroma'õ ndra'ugõ khõ gere, andrõ khõnia ena'õ ifareso ndra'ugõ, ba be'e zumange si mane ni'oroi'õ Moze, ba wangoroma'õ ba niha fefu wa no dõhõ ndra'ugõ."

15Ba tedou wa'atehõngõ duria Yesu gofu heza, ato niha sangondrasi ba wamondrongo fangombakha-Nia awõ wamadõhõ fõkhõra.

16Aefa da'õ Isaw̃a nahia si lõ nihaniha, mangandrõ Ia.

17Samuza ma'õkhõ me mamahaõ Yesu, so ndra Farizai'o awõ zangila amakhoita si dadao ba da'õ. La'otarai Yeruzalema, ba moroi ba mbanua ba Galilea ba ba Yudea. So wa'abõlõ Zo'aya khõ Yesu ba wamadõhõ sofõkhõ.

18Me inõtõ da'õ so zolohe niha sombuyumbuyu si tolea yaw̃a ba naha wemõrõ. La'oigõ dõdõra wolohe sofõkhõ andrõ yomo ba nomo ena'õ latou'õ ia fõna Yesu.

19Ba hiza, bõrõ wa'ato niha, tebai la'ohe yomo. Andrõ wa la'ohe ia yaw̃a ba dete zagõ nomo. Latõla'õ zagõ nomo andrõ, ba ladada zofõkhõ fabaya naha wemõrõnia fõna Yesu ba gotalua niha sato.

20Me I'ila Yesu hawa'ebua wamatira, Iw̃a'õ ba niha sofõkhõ andrõ, "He talifusõ, no te'efa'õ khõu horõu."

21Ba faoma lamane khõ nawõra ira Farizai'o awõ ndra sangila amakhoita, "Haniha da'e zi lõ aiw̃õ wango'aya Lowalangi? Haniha zi tola mangefa'õ horõ baero Lowalangi samõsa?"

22Ba I'ila gera'erara Yesu. Andrõ Imane khõra, "Hana wa manofunofu si manõ da'õ ami bakha ba dõdõmi?

23Hezo zabõlõ aoha fanguma'õ, 'No te'efa'õ khõu horõu,' ba ma fanguma'õ, 'Faoso ba owaõwaõ!'

24Iada'e Uforoma'õ khõmi wa mofa'abõlõ Nono Niha ba gulidanõ andre ba wangefa'õ horõ." Imane Yesu ba niha sombuyumbuyu andrõ, "Uw̃a'õ khõu; Faoso, fazaw̃a gasomõ, ba angawuli ba khõmi!"

25Ba i'anema'õ maoso niha andrõ fõnara fefu, ifazaw̃a gasonia, ba ifuli ia ba khõra fao fanuno Lowalangi.

26Oi ahõlihõli dõdõra fefu, irege lasuno Lowalangi. Ba oi so wa'ata'ura, lamane, "Fondrege zahõlihõli dõdõ zalua ni'ilada ma'õkhõ andre!"

27Aefa da'õ mõi baero Yesu, I'ila samõsa niha sangozara beo, Lewi dõinia, no mudadao ba gõdonia. Imane khõnia Yesu, "O'õ Ndra'o."

28Muzizio Lewi ba irõi fefu hadia ia, i'o'õ Yesu.

29Aefa da'õ ilau gowuloa Lewi ba nomonia bõrõ Yesu. Ato zanema beo awõ niha bõ'õ si fao ba wemanga khõra.

30So õsa ndra Farizai'o awõ ndra sangila amakhoita si lõ fao tõdõ, ba lamane ba nifahaõ Yesu, "Hana wa orudu manga ami fefu si fao ira sangozara beo awõ niha si lõ sõkhi andrõ?"

31Itema lira Yesu, "Tenga ba zi lõ fõkhõ moguna zame'e daludalu.

32Tenga ba wogaoni niha satulõ tõdõ mõi Ndra'o, no ba wogaoni niha si so horõ, ena'õ lafalalini gera'erara ba larõi horõra."

33Lamane niha sato khõ Yesu, "Ira nifahaõ Yohane awõ ndra nifahaõ Warizai'o andrõ asese fuasõ ba mangandrõ. Ba hiza, ira nifaha'õ-U andrõ mangamanga ba mamadumadu hadia ira."

34Imane khõra Yesu, "Hadia fuasõ dome ba gowuloa walõw̃a, fatua awõra zangowalu? Tatu lõ'õ!

35Ba hiza, so ginõtõnia laheta zangowalu andrõ moroi khõra. Ba luo da'õ dania fuasõ ira."

36Aefa da'õ Itutunõ khõra gamaedola Yesu, "Lõ hadõi niha so mbalo nukha satua faoma nukha si bohou. Na ilau zi manõ, isika nukha si bohou andrõ. Ba lõ gõi fabõbõ mbalobalo si bohou andrõ ba nukha satua.

37Si manõ gõi, lõ samaduwa agu si bohou ba nahia nagu satua, bõrõ me agu si bohou andrõ dania zamobõrõ fa'are'a nahia nagu satua andrõ. Aduwa nagu, ba tekiko gõi nahiania.

38Lõ tola lõ'õ la'irõ'õ nagu si bohou ba nahia si bohou!

39Si manõ gõi lõ somasi mamadu agu si bohou na no aefa ibadu nagu sara. Iw̃a'õ, 'Abõlõ sõkhi nagu si tohõna andrõ.'"



Download Audio MP3 (Lukas 5):
Mobile (Low Quality) - CD (High Quality)

 <<  Lukas 5 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel