Alkitab Mobile SABDA
[VER] : [NIAS]     [PL]  [PB] 
 <<  Matius 10 >> 

1Samuza ma'õkhõ Ikaoni nifahaõ-Nia andrõ si felendrua Yesu ena'õ owulo. Ibe'e khõra wa'abõlõ ba wamofanõ fa'abõlõ zi lõ sõkhi awõ wamadõhõ fefu ngawalõ wõkhõ ba fa'atebai.

2Tõitõi zi felendrua andrõ: si fõfõna, Simoni (nifotõi gõi Fetero), awõ dalifusõnia Andrea, aefa da'õ Yakobo ba talifusõnia Yohane, ono Zebedai'o ira.

3Filifo ba Batolomai'o, Toma ba Matai'o sanema beo, awõ Yakobo ono Galifai'o ba Tadai'o,

4Simoni niha si barani andrõ ba Yuda banua Gariota si manga mbõli Yesu.

5Ifatenge Yesu ndra nifahaõ si felendrua andrõ, ba latema moroi khõ-Nia menemene, "Bõi mi'ae'e ba mbanua niha si tenga Yahudi. Bõi gõi mi'ae'e ba mbanua niha Zamaria.

6Mi'ae'e ba niha Gizera'eli, mendrua manõ ba zi no elungu.

7Mi'ombakha'õ khõra wa no Ibõrõtaigõ iada'e wamatõrõ Lowalangi.

8Mifadõhõ zofõkhõ; mi'orifi niha si mate; mifadõhõ niha sobou auri; ba mifofanõ wa'abõlõ zi lõ sõkhi. No mitema da'õ fefu tenga ni'õli. Bõrõ da'õ, mibe'e gõi ba niha.

9Bõi mi'ohe gana'a, ma firõ, ma zui kefe loga.

10Bõi gõi mi'ohe mbolabola naha gefe buala. Bõi mi'ohe dua nga'õrõ mbarumi ba wofanõ, he badagahe ma si'o bõi mi'ohe. Bõrõ me sohalõw̃õ, no sinangeania tebõnõkhi mbalazonia.

11Na mirugi nina mbanua ba ma banua, mi'alui ba da'õ niha sanema ya'ami. Mi'iagõ khõnia irugi mofanõ zui ami moroi ba da'õ.

12Na mirugi nomo andrõ ba mimane, 'Ya Itolo ami So'aya.'

13Na latema'õ ami niha so'omo andrõ, ba akha torõi wangowaimi andrõ khõra. Ba na lõ omasi ira latema ami, akha mihalõ mangawuli howuhowu andrõ.

14Na so nomo ma zui banua si lõ manema ya'ami ma lõ latema duria andrõ nifa'emami, mirõi nahia andrõ ba mi'anotogõ gawugawu ba gahemi.

15Mitõngõni! Ba Luo Safuria, aoha I'efa'õ horõ mbanua Zodoma awõ Gomora Lowalangi moroi ba niha mbanua andrõ!"

16"Mitõngõni da'e: Ufatenge ami hulõ mbiribiri si lõ fa'abõlõ ba gotalua nasu gatua samu'i. Mi'angelama hulõ gulõ ba ya atulõ dõdõmi hulõ marafadi.

17Mi'angelama, so niha sondra'u ya'ami ba la'ohe ami fõna zanguhuku ba agama. Lafakao ami ba nahia wangandrõ.

18La'ohe ami fõna zamatõrõ ba razo bõrõ Ndra'o. Da'õ ginõtõ khõmi ba wamaduhu'õ Ya'o ba niha si lõ aboto ba dõdõ Lowalangi.

19Na la'ohe ami ba wanguhuku, bõi ata'u ami hadia niw̃a'õmi, ma hemiwisa wehede. Hadia zinangea miw̃a'õ, la'ombakha'õ khõmi dania faudu ba ginõtõnia.

20Bõrõ me si hede dania ba ginõtõ da'õ tenga ya'ami, no Eheha Nama si so ba zorugo.

21Alua dania wa si fatalifusõ samõsa zame'e talifusõnia nibunu. Si manõ gõi zalua ba gotaluara nama faoma ononia. Ilaw̃a nama awõ ninania iraono, ba ibe'e nibunu zatuania andrõ.

22La'afõkhõi tõdõ ami fefu niha bõrõ me mi'o'õ Ndra'o. Ba hiza, si lõ farõi irugi gamozua, da'õ ni'orifi.

23Na lafakao ami ba zi sambua banua, mi'oloi ba mbanua bõ'õ. U'ombakha'õ khõmi: Lõ nasa dania sawai mi'ohalõw̃õgõi halõw̃õmi ba mbanua niha Gizera'eli fefu, i'anema'õ tohare Nono Niha.

24Lõ ebua nifaha'õ moroi ba zamaha'õ, ba enoni lõ ebua moroi khõ zangoni ya'ia.

25Na samõsa nifahaõ tobali samahaõ ba samõsa enoni tobali sangoni, no tobõnõ khõra da'õ. Na no labe'e tõi zatua baomo Mbelesebu, lõ mendrua manõ nõsi nomonia. Labe'e khõra dõi sabõlõ lõ sõkhi gõi!"

26"Bõi mi'ata'ufi niha. Hadia zi tobini, lõ tola lõ'õ oroma, ba hadia nibini'õ lõ tola lõ'õ tefa'ele'õ dania.

27Hadia niw̃a'õ-Gu khõmi ba zogõmigõmi, miw̃a'õ ba zohaga. Hadia ningõngõgõ-Gu ba dalingami, mituriaigõ ena'õ oi larongo niha!

28Bõi mi'ata'ufi niha samunu boto, bõrõ me lõ fa'abõlõra wamunu noso. Mi'ata'ufi Lowalangi si tola mamunu boto ba he gõi noso bakha ba narako.

29Tola mu'õli dombua ziliw̃i, ha sambua se mbõli. Ba hew̃a'ae si manõ tebai atoru tou ba danõ zambua wofo na lõ ofõna Itehegõ Amami andrõ.

30No mu'erai wa'oya rozi mbu ba hõgõmi.

31Bõrõ da'õ bõi mi'ata'ufi! Abõlõ ebua mbõlimi khõ Lowalangi moroi ba mbõli ziliw̃i andrõ!"

32"Haniha zamaduhu'õ fõna niha sato, wa nifahaõ-Gu ia, si manõ gõi Ufaduhu'õ ia fõna nama-Gu andrõ si so ba zorugo.

33Ba haniha zangosilõ'õgõ fõna niha wa nifahaõ-Gu ia, U'osilõ'õgõ gõi ia dania fõna Nama-Gu andrõ si so ba zorugo."

34"Bõi miw̃a'õ tõdõmi wa ba wolohe fa'atulõ mõi Ndra'o ba gulidanõ. Tenga fa'atulõ ni'ohe-Gu no fa'udusa.

35Tohare Ndra'o irege fa'udu nono matua khõ namania, ba ono alawe fa'udu ia khõ ninania, umõnõ ira alawe fa'udu ira ninania matuania.

36Si tobali udu sebua no õsi nomo samõsa.

37Niha sangomasi'õ amania ba inania tõra moroi wangomasi'õnia Ya'o, tenga sinangea nifahaõ-Gu. Si manõ gõi zangomasi'õ ononia matua ma ononia alawe tõra moroi wangomasi'õnia Ya'o, tenga sinangea nifahaõ-Gu ia.

38Niha si lõ omasi molu'i rõfania ba wolo'õ Ya'o tenga sinangea tobali nifahaõ-Gu.

39Haniha zobelegõ nosonia, da'õ zaetu noso, ba haniha zaetu noso bõrõ Ndra'o, no ibelegõ nosonia dania niha andrõ."

40"Haniha zanema ya'ami, no latema Ndra'odo. Ba haniha zanema Ya'o, no gõi itema zamatenge Ya'o.

41Niha sanema'õ tengetenge Lowalangi bõrõ me no tengetenge Lowalangi ia, itema luonia si mane luo niha tengetenge Lowalangi. Niha sanema'õ samalua somasi Lowalangi, bõrõ me samalua somasi Lowalangi ia, itema luonia si mane nibe'e ba niha samalua somasi Lowalangi.

42Gofu haniha zamabadugõ he ha sambawa idanõ ba gotalua niha side'ide andre, bõrõ me no nifahaõ-Gu ia, itema luonia -- mi'amati ba wehede andre!"



Download Audio MP3 (Matius 10):
Mobile (Low Quality) - CD (High Quality)

 <<  Matius 10 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel