Alkitab Mobile SABDA
[VER] : [NIAS]     [PL]  [PB] 
 <<  Matius 9 >> 

1Mõi yaw̃a ba dundraha Yesu, I'õtõ mbaw̃a mangawuli Ia ba mbanua-Nia.

2Ba da'õ la'ohe khõ-Nia samõsa niha sombuyumbuyu si no tolea yaw̃a ba naha wemõrõ. I'ila wamati niha andrõ Yesu. Andrõ wa Iw̃a'õ ba niha sombuyumbuyu andrõ, "Bõi ata'ufi, ono-Gu! No te'efa'õ horõu!"

3Ira sangila amakhoita si so ba da'õ lamane khõ nawõra, "I'o'aya Lowalangi Niha andrõ!"

4I'ila gera'erara andrõ Yesu, andrõ wa Iw̃a'õ, "Hana wa lõ sõkhi gera'erami?

5Heza zabõlõ aoha wanguma'õ, 'No te'efa'õ horõu', ma zui 'Faoso ba owaõwaõ?'

6Ba iada'e U'oroma'õ khõmi wa Ono Niha, mofa'abõlõ ba gulidanõ andre ba wangefa'õ horõ." Aefa da'õ Imane Yesu ba niha sombuyumbuyu andrõ, "Faoso, fezaw̃a dufou ba fuli'õ!"

7Maoso niha sombuyumbuyu andrõ mangawuli ia ba nomonia.

8Me la'ila niha sato zalua andrõ, ba ata'u ira ba lasuno Lowalangi same'e fa'abõlõ sebua andrõ ba niha.

9Aefa da'õ Irõi Yesu nahia andrõ. Fatua mowaõwaõ Ia nasa, I'ila samõsa niha sanema beo, sotõi Matai'o, si dadao ba gõdonia. Imane Yesu khõnia, "Aine o'õ Ndra'o!" Ba muzizio Matai'o andrõ i'o'õ Yesu.

10Ba me manga Yesu ba nomo Matai'o, tohare zanema beo sato ba niha si so horõ fao manga khõ Yesu ba ira nifahaõ-Nia.

11So ndra Farizai'o sangila da'õ. Andrõ lasofu khõ ndra nifahaõ Yesu, "Hana wa manga gurumi ba gotalua niha si so horõ awõ zanema beo?"

12Irongo Yesu wanofu da'õ, ba Imane wanema li, "Lõ moguna zame'e daludalu ba niha si lõ fõkhõ, ha ba niha sofõkhõ.

13Mifareso hadia geluaha ayati Mbuku Ni'amoni'õ andre: 'Fa'ahakhõ dõdõ zomasi-Do, tenga sumange.' Bõrõ me mõi Ndra'o tenga ba wogaoni niha sanguma'õ no sõkhi ia, no ba wogaoni niha ni'o'aya."

14Aefa da'õ tohare ndra nifahaõ Yohane Samayagõ Idanõ khõ Yesu. Lasofu khõ-Nia, "Hana ndra'aga awõ ndra Farizai'o andrõ malau wuasõ, ba hana ndra nifahaõ-Mõ lõ'õ?"

15Itema li Yesu, "Hewisa gera'erami? Hadia tola abu dõdõ zi mõi ba walõw̃a na fatua so awõra marafule? Tatu lõ'õ! Hiza so ginõtõ dania wa tehalõ marafule andrõ moroi khõra. Awena dania fuasõ ira ba ginõtõ da'õ.

16Lõ hadõi niha sombalo nukha si bohou ba mbaru satua. Bõrõ me asika dania mbaru andrõ bõrõ mbalobalo da'õ irege itugu ebua zasikania.

17Si manõ gõi lõ hadõi niha samaduwa agu si bohou ba naha nagu satua nifazõkhi moroi ba guli gurifõ si no atua. Na ilau zi manõ ba asika nahia nagu andrõ. Aduwa nagu ba tebai gõi nifake sa'ae nahia andrõ. Agu si bohou ena'õ labe'e ba naha nagu si bohou gõi, ena'õ sõkhi ma'afefu."

18Me fahuhuo na Yesu khõ ndra nifahaõ Yohane Samayagõ Idanõ, ba tohare zondrõnia'õ ba gosali andrõ mangalulu fõna Yesu, imane, "No mate nonogu alawe. Tolodo, ae'e ba nomo wombambaya ya'ia ena'õ ifuli auri."

19Mofanõ Yesu fao Ia ba zondrõnia'õ naha wangandrõ andrõ. Fao gõi ndra nifahaõ-Nia.

20Gasagasa da'õ so ndra alawe si no felendrua fakhe mofõkhõ sendro talu. Ihatõ'õ ia ba ibabaya gahe mbaru Yesu.

21Imane dõdõnia, "He ha ubabaya gahe mbaru-Nia, ba tatu dõhõ ndra'o."

22Ifaigi furi Yesu. Ba me I'ila ndra alawe andrõ, Imane Yesu khõnia, "Bõi busi dõdõu ono-Gu! Me faduhu dõdõu khõ-Gu, ba dõhõ ndra'ugõ!" Ba i'anema'õ dõhõ ndra alawe andrõ.

23Irugi Yesu nomo zondrõnia'õ ba gosali andrõ. Bada'õ I'ila so zolau sinunõ ba zi mate awõ niha sato si faguagua.

24"Mi'ae'e baero fefu!" Imanõ khõra Yesu, "Ono alawe andre tenga si mate; si mõrõ ia." Ba la'igi'õ Yesu ba niw̃a'õ-Nia andrõ.

25Me momõi ira baero, mõi si bakha Yesu ba Igogohe danga nono alawe andrõ. I'anema'õ maoso nono alawe andrõ ba ilau muzizio.

26Tehõngõ duria andrõ ba zi fasui banua da'õ.

27Me mofanõ Yesu, ba so darua niha sau'a solo'õlo'õ Ya'ia. Mu'ao ira lamane, "He ma'uwu Dawido, hakhõsi tõdõ ndra'aga!"

28Me mõi Yesu ba nomo, ba la'ondrasi Ia niha sau'a andrõ. Isofu khõra Yesu, "Hadia faduhu dõdõmi wa tola Ufadõhõ ami?" "Faduhu dõdõma, Ama!" lamanõ wanema li.

29Ibabaya hõrõra Yesu ba Imane, "Bõrõ me mamati ami, ba ya alua nidõnadõnami andrõ."

30I'anema'õ la'ila niha. Aefa da'õ Itenaw̃a sibai ira Yesu ena'õ lõ la'ombakha'õ zalua andrõ gofu ha'õkhõ.

31Ba mofanõ ira, la'ombakha'õ duria Yesu ba danõ andrõ ma'asagõrõ.

32Me mofanõ ndra nifahaõ andrõ, so zolohe khõ Yesu samõsa niha si lõ hede, nifa'u'u wa'abõlõ zi lõ sõkhi.

33Me Ifofanõ wa'abõlõ zi lõ sõkhi andrõ Yesu, i'anema'õ tola muhede niha andrõ. Oi ahõli dõdõ niha sangila da'õ. Lamane wanguma'õ, "Lõ irai ma'ila zi mane da'e ba niha Gizera'eli!"

34Ba hiza, lamane ira Farizai'o, "Salaw̃a wa'abõlõ zi lõ sõkhi zame'e khõnia fa'abõlõ ba wamofanõ fa'abõlõ zi lõ sõkhi andrõ."

35Ifasui Yesu wanõrõ i'otarai nina mbanua si sambua numalõ ba mbanua tanõ bõ'õ, ba moroi ba zi sambua banua numalõ ba mbanua tanõ bõ'õ. Mamahaõ Ia ba gosali, ba wangombakha Turia Somuso Dõdõ sanandrõsa ba wamatõrõ Lowalangi. Ifadõhõ gõi zofõkhõ ba fefu ngawalõ wa'atebai.

36Me I'ila niha sato andrõ, ahakhõ dõdõ-Nia ira, bõrõ me sabu tõdõ ba si tebai. Hulõ mbiribiri si lõ kubalo ira.

37Imane Yesu khõ ndra nifahaõ-Nia, "Ebolo sibai mbasitõ, ba lõ ato zohalõw̃õ.

38Bõrõ da'õ mi'andrõ khõ zokhõ kabu andrõ ena'õ ifatenge niha samasi ba mbolo nowinia."



Download Audio MP3 (Matius 9):
Mobile (Low Quality) - CD (High Quality)

 <<  Matius 9 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel