1Lõ ara aefa da'õ mangawuli Yesu ba Gafana'uma.
2Ato niha sangondrasi Ya'ia. Owulo ira ba da'õ irege lõ hadõi sa'ae nahia. Fasõsõ niha irugi ba mbawa ndruhõ. I'ombakha'õ duria soroi Lowalangi khõra Yesu.
3Me mangombakha nasa Yesu, ba la'ohe khõ-Nia samõsa niha sombuyumbuyu, daõfa zamabea.
4Bõrõ wa'ato niha ba tebai la'ohe niha sombuyumbuyu andrõ ba zinga Yesu. Bõrõ da'õ labokai zagõ gamaudu nahia Yesu. Aefa da'õ ladada niha sombuyumbuyu andrõ si fao tufonia.
5Me I'ila Yesu wa no faduhu sibai dõdõra, muhede Ia ba niha sombuyumbuyu andrõ, "He ono-Gu, no te'efa'õ khõu horõu."
6Ba so õsa ndra sangila amakhoita si dadao ba da'õ, manofunofu bakha dõdõra, lamane,
7"Ha lõ barani niha andre wango'aya Lowalangi! Haniha zi tola mangefa'õ horõ, baero Lowalangi samõsa!"
8Me I'ila gera'erara andrõ Yesu, Imane khõra, "Hana wa si manõ wangerangerami?
9Heza zabõlõ aoha wanguma'õ ba niha sombuyumbuyu andre, 'No te'efa'õ horõu', ma zui 'Faoso, fezaw̃a dufou ba owaõwaõ'?
10Iada'e Uforoma'õ khõmi wa Ono Niha, mofa'abõlõ ba wangefa'õ horõ ba gulidanõ andre." Aefa da'õ Imane Yesu ba niha sombuyumbuyu andrõ,
11"Uw̃a'õ khõu, faoso, fazaw̃a dufomõ ba angawuli!"
12Fõna niha sato muzizio niha sombuyumbuyu andrõ, ifazaw̃a dufonia ba ilau mofanõ. Fefu niha oi ahõlihõli dõdõra ba lasuno Lowalangi. Lamane, "Lõ irai ma'ila zalua si mane da'e!"
13Mangawuli Yesu ba zinga Mbaw̃a Galilea. Ato niha sangondrasi Ya'ia ba Ifahaõ ira.
14Me mowaõwaõ Yesu ba da'õ, I'ila samõsa zangozara beo sotõi Lewi, ono Galifai'o. Me inõtõ da'õ no mudadao Matai'o ba gõdonia. Imane khõnia Yesu, "O'õ Ndra'o!" Maoso Lewi, i'o'õ Yesu.
15Me manga Yesu ba nomo Lewi, ato zangozara beo awõ niha niw̃a'õ lõ sõkhi molo'õ niha sato, si fao manga khõ Yesu ba ira nifahaõ-Nia.
16So õsa ndra sangila amakhoita moroi ba ngasi Warizai'o zangila me manga Yesu awõ ndra sangozara beo ba niha si lõ sõkhi molo'õ fanguma'õra andrõ. Lasofu ba nifahaõ Yesu, "Hana wa manga Yesu si fao ira sangozara beo awõ ndra niha si lõ sõkhi andrõ?"
17Irongo Yesu wanofura andrõ ba Imane wanema li, "Tenga ba niha si lõ fõkhõ moguna zame'e daludalu, ha ba niha sofõkhõ. Tenga ba wogaoni niha satulõ mõi Ndra'o, no ba wogaoni niha si so horõ."
18Samuza inõtõ lafalua wuasõ ira nifahaõ Yohane ba nifahaõ Warizai'o. Ba so niha sangondrasi Yesu ba wanofu, lamane, "Hana wa fuasõ ndra nifahaõ Yohane Samayagõ Idanõ awõ nifahaõ Warizai'o, ba hana wa lõ fuasõ ndra nifahaõ-Mõ?"
19Itema li Yesu, "Hadia, lõ manga dome ba walõw̃a? Na so nasa zangowalu ba gotaluara, tatu manga ira.
20Ba hiza so ginõtõnia dania lahalõ zangowalu andrõ moroi khõra. Ba ginõtõ da'õ dania lõ manga ira.
21Samõsa lõ niha samake nukha si bohou ba wombalo nukha satua. Na ilau zi manõ, ba balobalo si bohou andrõ zanika nukha satua, irege itugu ebua zasikania.
22Si manõ gõi, lõ samaduwa agu si bohou ba nahia nagu satua. Na ilau zi manõ, ba asika nahia nagu andrõ ba aduwa nagu. Ba tekiko nagu fabaya nahania. Agu si bohou lõ tola lõ'õ ba nahia nagu si bohou labe'e gõi!"
23Me luo Sabato, Itõrõ zinga nowi gandru Yesu. Fatua mowaõwaõ ira, ba labõrõtaigõ ladõdõni ngalai gandru andrõ ira nifahaõ-Nia.
24Ba lamane ira Farizai'o khõ Yesu, "Hana wa lasawõ huku agama khõda ira nifahaõ-Mõ, ba wolau nitenaw̃a ba luo Sabato?"
25Itema li Yesu, "Hadia lõ irai mibaso hadia nilau Dawido, me luo ere sebua Gabiataro. Me olofo Dawido awõ zi fao khõnia, ba lõ hadõi õ khõra, mõi Dawido ba Nomo Zo'aya, i'a roti si no mube'e sumange khõ Lowalangi. Ba ibe'e gõi roti andrõ khõ ndra si fao khõnia. Ba molo'õ huku agama khõda, ha ira ere zi tola manga roti andrõ."
26(2:25)
27Ifuli zui Imane Yesu, "Te'a'asogõ luo Sabato soguna ba niha; ba tenga niha zoguna ba luo Sabato.
28Tobali, si so fa'abõlõ Nono Niha andrõ, he gõi ba luo Sabato."
Download Audio MP3 (Markus 2):
Mobile (Low Quality) - CD (High Quality)
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel