Alkitab Mobile SABDA
[VER] : [NIAS]     [PL]  [PB] 
 <<  Markus 6 >> 

1Moroi ba nahia andrõ mangawuli Yesu awõ ndra nifahaõ-Nia ba mbanuara.

2Me luo Sabato Ibõrõtaigõ mamahaõ Ia ba gosali. Ato niha ba da'õ. Ba me lafondrondrongo wamahaõ Yesu, oi ahõlihõli dõdõra. Lamane, "He moroi Isõndra da'õ fefu niha andre? Hewisa wa tola Ifazõkhi dandra sahõlihõli dõdõ?

3Hadia, tenga ono duka geu Ia andrõ, ono Maria, ba talifusõ-Nia Yakobo, Yose, Yuda ba Simoni? Ba talifusõ-Nia alawe gõi so ba da'e." Andrõ wa lõ latema Ia.

4Imane Yesu khõra, "Oi lafosumange zama'ele'õ gofu heza, baero ba mbanuania, ba gotalua dalifusõnia ba ba nomonia."

5Lõ mamazõkhi tandra sahõlihõli dõdõ Yesu ba da'õ. Ha ma'ifu Ifadõhõ zofõkhõ fao wa Itufa tanga-Nia ira.

6Ahõlihõli dõdõ-Nia wa lõ faduhu dõdõra. Aefa da'õ mõi Yesu ba mbanua si fasui da'õ ba wamahaõ niha.

7Ikaoni nifahaõ-Nia si felendrua, Ifatenge ira darudarua ba Ibe'e khõra wa'abõlõ ba wamofanõ fa'abõlõ zi lõ sõkhi.

8Ibe'e goroisa-Nia khõra Imane, "Bõi mi'ohe hadia ia ba wofanõ, baero sara zi'o. Bõi mi'ohe roti ma zui bolabola ba wangandrõngandrõ, ma zui kefe ba mbõbõ talumi.

9Mifake mbadagahe, ba bõi mifodua gõrõ mbarumi."

10Aefa da'õ Ifuli Ibe'e goroisa Yesu nasa, "Na latema ami ba zi sambua omo, mi'iagõ ba da'õ irugi mofanõ ami moroi ba mbanua andrõ.

11Ba na mirugi zi sambua nahia, ba na lõ latema ami niha ba da'õ awõ wa lõ lafondrondrongo wangombakhami, ba mirõi nahia andrõ. Ba mi'anotogõ gawugawu ba gahemi si tobali famangelamara."

12Mofanõ nifahaõ Yesu andrõ si felendrua. Mõi ira wangombakha turia ena'õ lafalalini gera'erara niha ba larõi sa'ae wolau horõ.

13Lafofanõ wa'abõlõ mbekhu si lõ sõkhi. Ato zofõkhõ nigule'õra fanikha ba wamadõhõ ya'ira.

14Ofeta khõ Herode fefu duria andrõ, bõrõ me no tehõngõ duria Yesu gofu heza. So zanguma'õ, "No ifuli auri Yohane Samayagõ Idanõ! Da'õ mbõrõ wa tola ifazõkhi dandra sahõlihõli dõdõ andrõ."

15Ba lamane tanõ bõ'õ, "Ya'ia andrõ Elia." So gõi õsa zanguma'õ, "Ya'ia andrõ sama'ele'õ, samõsa ba gotalua zama'ele'õ no."

16Me irongo da'õ Herode, imane, "Ya'ia andre Yohane no si no ufa'ew̃a'õ bagi. No ifuli auri ia!"

17Bõrõ fõnafõna da'õ no'ifatenge niha Herode ba wondra'u Yohane, ba ibe'e ia bakha ba gurunga. Ilau da'õ Herode bõrõ Herodia andrõ, fo'omo dalifusõnia Filifo si no ihalõ tobali fo'omonia.

18Sanandrõsa ba da'õ no auli kali itegu Herode Yohane imane, "Lõ tola õhalõ fo'omou wo'omo dalifusõu andrõ!"

19Da'õ mbõrõ wa afõkhõ dõdõ Herodia khõ Yohane, afu'afunia labunu Yohane. Ba hiza tebai ilau da'õ bõrõ me itaha ia Herode.

20No iw̃a'õ Herode ena'õ lahaogõhaogõ khõ Yohane ba gurunga bõrõ me i'ata'ufi Yohane andrõ. Aboto ba dõdõ Herode wa niha si sõkhi Yohane andrõ nifatenge Lowalangi. Ba si manõ na fahuhuo Yohane, wa'omasinia wamondrondrongo hew̃a'ae alangu dõdõnia bõrõ huhuo andrõ.

21Ba gafuriata, so ginõtõ khõ Herodia me inõtõ wanõrõ tõdõ fa'atumbu Herode. Ilau fatome Herode ba ikaoni fefu ndra komandra, awõ ndra salaw̃a ba Galilea.

22Ba watomesa andrõ manari nono Herodia, ba wa'omasi Herode awõ domenia wamaigi fanarinia. Andrõ imane khõnia Herode, "Andrõ hadia zomasi'õ. Lõ tola lõ'õ ube'e khõu!"

23Fahõlu Herode khõ nono alawe andrõ imane, "Ufabu'u wa ube'e khõu hadia ni'andrõu. Na õ'andrõ zi matonga gamatõrõw̃agu andre ba ube'e khõu!"

24Mõi baero nono alawe andrõ isofu khõ ninania, "He ina, hadia zi sõkhinia ni'andrõgu?" Imane inania, "Andrõ hõgõ Yohane Samayagõ Idanõ."

25Ifuli ia khõ Herode ono alawe ba imane, "U'andrõ khõ Razo na õbe'e khõgu iada'e hõgõ Yohane Samayagõ Idanõ yaw̃a ba tala!"

26Me irongo da'õ Herode tobali dõdõnia. Ba hiza tebai itimba gangandrõw̃a andrõ bõrõ me no fahõlu ia fõna domenia.

27Ifaw̃a'õgõ ba zanaro khõnia ba wangai hõgõ Yohane Samayagõ Idanõ. Mõi zaradadu ba gurunga ba wolew̃a bagi Yohane.

28Aefa da'õ i'ohe hõgõ andrõ yaw̃a ba tala ba ibe'e ba danga nono alawe andrõ. Ba maoso nono alawe andrõ ibe'e gõi khõ ninania.

29Me larongo ira nifahaõ Yohane zalua andrõ, mõi ira ba wanga'i boto Yohane, ba wogo'o ya'ia.

30Ira nifahaõ si no Ifatenge Yesu andrõ, mangawuli ira, ba owulo ira awõ Yesu. La'ombakha'õ khõ Yesu fefu zi no lafalua awõ zi no lafahaõ.

31Ato sibai niha si so ba da'õ sangõrõngõrõ manõ irege lõ inõtõ wemanga khõ Yesu awõ ndra nifahaõ-Nia. Andrõ Imane Yesu khõ ndra nifahaõ-Nia, "Mitabu ba nahia si lõ nihaniha, ba zi ha ya'ita ba da'õ tola milau molombase."

32Mofanõ ira latõrõ dundraha ba nahia si lõ nihaniha.

33Ato niha sangila me mofanõ ira awõ wa la'ila haniha ira andrõ. Ato niha si otarai mbanua si fasui da'õ fagohigohi latõrõ danõ wanguhulõ Yesu awõ nifahaõ-Nia.

34Me mõi tou Yesu moroi ba dundraha, I'ila no so ba da'õ niha sato. Ahakhõ dõdõ-Nia ira me hulõ mbiribiri si lõ kubalo. Andrõ Ibõrõtaigõ Ifahaõ ira ba zoya ngawalõ.

35Me tanõ owi, lamane ira nifahaõ khõ Yesu, "No arakhagõ bongi sa'ae ba no arõu nahia andre.

36Abõlõ sõkhi na Õfofanõ niha sato andre we'amõi ba mbanua si fasui da'e ba wowõli gõra."

37Itema li Yesu, "Mibe'e gõra!" Lamane ira nifahaõ andrõ, "Hadia, mõiga mowõli roti si dua ngaotu rufia firõ mobõli ba wame'e gõ niha sato andre?"

38Imane khõra Yesu, "Ha'uga roti si so khõmi. Mi'ae'e mifaigi!" Me no mõi ira mufaigi lamane, "So lima ngawua roti ba dua rozi gi'a."

39Aefa da'õ Ifaw̃a'õgõ ba niha sato andrõ ena'õ mudadao ira nifongenoli yaw̃a ba dete ndru'u.

40Mudadao ira lafõfõ'õ, molo'õ ngenoli. So zi daotu sambua ngenoli, so gõi zi lima wulu.

41Aefa da'õ Ihalõ roti si lima ngawua awõ gi'a si dua rozi andrõ, Ifaõga hõrõ-Nia si yaw̃a ba mbanua ba I'andrõ saohagõlõ khõ Lowalangi. Aefa da'õ, Iboboto roti ba Ibe'e khõ ndra nifahaõ-Nia ena'õ labagibagi ba niha sato andrõ. Ba labagibagi khõra fefu gi'a si dua rozi andrõ.

42Manga ira fefu irege abuso.

43Lafuli la'owuloi zi tõrõi roti awõ gi'a andrõ ira nifahaõ Yesu -- fefu zi torõi fa'oya felendrua ragaraga tõ.

44Ira matua si manga roti andrõ so mato lima ribu niha wa'ato.

45Lõ ara aefa da'õ muhede Yesu khõ ndra nifahaõ-Nia ena'õ mofanõ ira faoma tundraha ladaridari ba Mbetisa'ida yefo mbaw̃a, ba fatua da'õ gõi Ifofanõ ba nomora zamõsana niha sato andrõ.

46Me no Ifofanõ niha sato andrõ, mõi Yesu ba hili ba wangandrõ.

47Me no irugi bongi, no so ba dalu mbaw̃a dundraha ndra nifahaõ, no so nasa Yesu yaw̃a ba danõ.

48I'ila Yesu marase ira wanola tundraha bõrõ me fazuzu nangi gametahõ dundraha. Bõrõ da'õ, ba gotalua zi bõzi tõlu ba bõzi õnõ sahulõ wongi, mõi Yesu khõra mowaõwaõ Ia yaw̃a ba dete nidanõ. Mowaõwaõ manõ Ia hulõ na Ilalõi ira.

49Me la'ila mowaõwaõ Ia yaw̃a ba dete nidanõ, ba lawalinga bekhu Ia,

50irege mo'ira'ira ira ba wa'ata'u. Ba me no la'ila wa Ya'ia, oi so wa'ata'ura fefu. I'anema'õ muhede Yesu khõra, "Mihonogõ ami! Ya'odo da'e. Bõi mi'ata'ufi!"

51Ba mõi Ia yaw̃a ba dundraha, ba ahono sa'ae nangi. Oi so wa'ahõli dõdõ ndra nifahaõ-Nia.

52Tandra sahõlihõli dõdõ sanandrõsa ba roti si lima ngawua andrõ lõ na'i nasa saboto ba dõdõra. Lõ ikhamõ fangerangerara zalua andrõ.

53Me larugi si yefo mbaw̃a, manao ira ba zinga Genezare.

54Ba me mõi ira ba danõ moroi ba dundraha, i'anemai'õ la'ila niha sato wa Yesu zi so andrõ.

55Lalau fagohigohi gofu heza ba mbanua misa, ba ibõrõtaigõ la'ohe niha sofõkhõ khõ Yesu. Gofu heza so la'ila Yesu, ba da'õ la'ohe niha sofõkhõ.

56Ba gofu heza mõi Yesu -- he ba mbanua side'ide, he ba fasa ba ma zui ba mbanua -- ba da'õ mõi niha sato ba wolohe sofõkhõ, ba latou'õ tou ba newali niha sofõkhõ andrõ khõra. La'andrõ sibai ena'õ latehegõ zofõkhõ andrõ lababaya mbaru Yesu, he ha ahe mbaru-Nia. Ba fefu zombambaya Ya'ia, ba oi dõhõ.



Download Audio MP3 (Markus 6):
Mobile (Low Quality) - CD (High Quality)

 <<  Markus 6 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel