1Ya'ita si no aro tõdõ ba wamati, tabologõ dõdõda ba da'aw̃ada'aw̃a niha si lõ abe'e famati nasa. Bõi ha ta'omusoi'õ dõdõda samõsa.
2Abõlõ sõkhi na dozi ita lõ tola lõ ta'omusoi'õ dõdõ dalifusõda, soguna khõnia, ena'õ itugu abe'e wamatinia khõ Lowalangi.
3Bõrõ me Keriso samõsa tenga ha soguna khõ-Nia I'era'era. No tesura bakha ba Mbuku Ni'amoni'õ si mane, "Fefu wango'aya nilau khõ-U no tehare'õ khõgu."
4Fefu zi no musura bakha ba Mbuku Ni'amoni'õ no ba wamahaõ ya'ita. Bõrõ me famahaõ bakha ba Mbuku Ni'amoni'õ zombali'õ sebolo tõdõ ita ba abõlõ irege tola manõtõna ita khõ Lowalangi.
5Lowalangi zame'e fa'ebolo dõdõ ba fondrara dõdõ ba niha, sanolo ena'õ auri ami ha sambua dõdõ, molo'õ dumaduma Keriso Yesu.
6Ba wa ha sara dõdõ tola fao fefu ami ba wamolakhõmi Lowalangi, Ama Zo'aya ya'ita Yesu Keriso.
7Bõrõ da'õ mifaoma mitema nawõmi, hulõ Keriso sanema ya'ami ba wamolakhõmi Lowalangi.
8Mitõrõ tõdõmi, wa no mõi enoni niha Yahudi Keriso ba wangoroma wa lõ farõi Lowalangi ba wamõnui fawu'usa li-Nia khõ ndra tuada.
9Yesu andrõ gõi mbõrõ wa lafolakhõmi Lowalangi soi bõ'õ bõrõ wa'asõkhi dõdõ-Nia khõra. No tesura ba Mbuku Ni'amoni'õ si mane, "Bõrõ da'õ dania usuno Ndra'ugõ ba gotalua soi si tenga niha Yehuda, u'anunõisi dania wanuno tõi-Mõ."
10No tesura gõi si mane, "Mi'omusoi'õ dõdõmi si fao banua Lowalangi nituyu, ya'ami soi si tenga niha Yehuda!"
11Ba da'e gõi, "Misuno Lowalangi, ya'ami si tenga niha Yehuda, misuno Ia, ya'ami fefu soi!"
12Da'e gõi niw̃a'õ Yesaya, "So dania moroi ba nga'õtõ Giza'i zamatõrõ fefu soi si tenga niha Yehuda; khõ-Nia dania manõtõna soi andrõ."
13Lowalangi ba no nahia wanõtõna khõmi. Akha Ya'ia zamo'õsi tõdõmi faoma fa'omuso dõdõ ba fa'ohahau dõdõ bõrõ me faduhu dõdõmi khõ-Nia, ena'õ bõrõ kuaso Geheha Lowalangi wa itugu manõtõna ami khõ Lowalangi.
14He ya'ami ira talifusõgu! Faduhu dõdõgu wa oya sibai ngawalõ zi sõkhi khõmi. Mi'ila fefu hadia ia, ba tola faoma mifahaõ nawõmi.
15Ba hiza so õsa nifangelamagu ya'ami, abe'e wehedegu ba zura andre, bõrõ Lowalangi zi no mamuala khõgu halõw̃õ andre.
16No Ibali'õ enoni Keriso Yesu ndra'o ena'õ tefatenge ba soi si tenga niha Yahudi. Ba ulau halõw̃õgu si mane ere, sangombakha Turia Somuso Dõdõ soroi Lowalangi, ena'õ niha si tenga niha Yahudi tobali sumange khõ Lowalangi nitema Lowalangi. Ya Eheha Lowalangi zombali'õ sumange ni'oniagõ ira khõ Lowalangi.
17Tobali bõrõ me ha sambua ndra'aga Keriso Yesu, andrõ wa usuno ndra'o ba halõw̃õgu khõ Lowalangi.
18Lõ ata'u ndra'o wanguma'õ si manõ sanandrõsa ba zi no Ifalua Keriso ba khõgu wombali'õ niha si tenga niha Yahudi tobali solo'õ li Lowalangi. Ufalua da'õ faoma fehede ba faoma amuata,
19si fao sahõlihõli dõdõ ba ngawalõ zi lõ harumani; fefu da'õ bõrõ wa'abõlõ Geheha Lowalangi. Turia Somuso Dõdõ sanandrõsa khõ Keriso no uturiaigõ fefu ba niha, i'otarai Yeruzalema numalõ ba Iliriku.
20Ohitõ dõdõgu ya'ia wanuriaigõ Turia Somuso Dõdõ soroi Lowalangi ba nahinahia si lõ nasa samondrondrongo turia Keriso. Bõrõ me lõ omasi ndra'o u'otomosi halõw̃õ ba danedane nibe'e niha bõ'õ.
21No tesura ba Mbuku Ni'amoni'õ, "La'ila dania niha si lõ irai mamondrongo turia-Nia; ba aboto ba dõdõra zi lõ irai larongo."
22Da'õ mbõrõ wa asese so dahataha we'amõigu khõmi.
23Ba hiza iada'e no awai halõw̃õgu ba mbanua andrõ. No ha'uga fakhe sa'ae omasido u'ondrasi ami.
24Na utõrõ dania mbanuami ba we'amõigu ba Spanyol, utõtõna wa tola falukha ita ba u'omusoi'õ dõdõgu awõmi ba zi lõ arara. Aefa da'õ utõtõna wa mitolodo ba wofanõgu andrõ numalõ ba Spanyol.
25Ba iada'e omasi ndra'o mõi ba Yeruzalema ba wolohe fanolo ba mbanua Lowalangi ba da'õ.
26Bõrõ me no fao dõdõ mbanua Niha Keriso ba Makedonia ba ba Akhaya wame'e buala khõ ndra talifusõ si numana ba gotalua mbanua Lowalangi ba Yeruzalema.
27Si fao fa'omuso dõdõ lahalõ gangetula wolau si manõ. Sindruhu wa faudu na latolo ndra talifusõ si numana ba Yeruzalema andrõ bõrõ me moroi ba niha Yehuda latema howuhowu soroi Lowalangi si tenga niha Yahudi andrõ. Tobali, faudu na si tenga niha Yahudi andrõ latolo ndra niha Yahudi faoma howuhowu okhõta.
28Na no u'asiwai halõw̃õgu andre, ba ube'e ba niha Yeruzalema wanolo si no la'owuloi andrõ, ba mofanõ ndra'o numalõdo ba danõ Spanyol ba utõrõ mbanuami.
29Na mõi ndra'odo khõmi, lõ tola lõ tohare ndra'o si fao howuhowu soya moroi khõ Keriso soguna khõmi.
30Bõrõ Zo'aya ya'ita Yesu Keriso, ba bõrõ wa'omasi nibe'e Geheha Lowalangi, u'andrõ sibai khõmi ya'ami ira talifusõ, ena'õ mi'osindruhugõ wangandrõ salahigu khõ Lowalangi ba khõgu.
31Mi'angandrõ ena'õ I'efa'õ ndra'o Lowalangi moroi ba danga niha si lõ faduhu tõdõ ba Yudea, ba ena'õ latema si fao fa'omuso dõdõ halõw̃õgu wolohe buala andrõ ba Yeruzalema ya'ira banua Lowalangi ba da'õ.
32Ba zi manõ, na omasi Lowalangi, tola mõi ndra'o khõmi ba wa'omuso dõdõ. Ba usõndra wondrara dõdõ ba gotaluami.
33Ya Lowalangi, same'e fa'ohahau dõdõ ba niha, zi faofao khõmi fefu. Yaduhu.
Download Audio MP3 (Roma 15):
Mobile (Low Quality) - CD (High Quality)
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel