Alkitab Mobile SABDA
[VER] : [NIAS]     [PL]  [PB] 
 <<  Roma 6 >> 

1Na si manõ, hadia zi tola taw̃a'õ? Hadia tatohugõ manõ wolau horõ ena'õ itugu I'omasi'õ ita Lowalangi?

2Tatu tenga! Lõ sa'ae kuaso horõ khõda, tobali hewisa wa lõ mamalõ auri ita ba wamazõkhi horõ?

3Hadia, aboto ba dõdõda wa me tebayagõ idanõ ita, te'osambua'õ ita khõ Keriso? Eluahania tobali ha sambua ita ba wa'amate-Nia.

4Ba wamayagõ idanõ andrõ teko'o ita awõ Keriso ba si fao ita khõ-Nia ba wa'amate, ena'õ hulõ si mane wa'ate'orifi Keriso andrõ moroi ba wa'amate bõrõ wa'abõlõ Nama solakhõmi, si manõ gõi ita tasõndra wa'auri si bohou.

5Na no ha sambua ita Keriso bõrõ me si fao ita ba wa'amate-Nia, ha sambua ita khõ-Nia gõi bõrõ me si fao ita te'orifi mangawuli si mane Ya'ia.

6Aboto ba dõdõda wa amuatada si tohõna fa'aniha no muforõfa awõ Keriso, ena'õ mufakiko wa'abõlõ gamuatada si so horõ andrõ; ba zi manõ lõ'õ sa'ae i'osawuyu ita horõ.

7Na mate zi samõsa niha, te'efa'õ niha andrõ moroi ba wa'abõlõ horõ.

8Na no mate ita awõ Keriso, faduhu dõdõda wa auri ita gõi awõ-Nia.

9No aboto ba dõdõda wa no te'orifi Keriso moroi ba wa'amate ba lõ mate Ia sa'ae; lõ mofa'abõlõ sa'ae wa'amate khõ-Nia.

10Fa'amate nitõrõ Keriso no fa'amate bõrõ horõ. Alua da'õ samuza irugi zi lõ aetu. Ba fa'auri-Nia iada'e no fa'auri khõ Lowalangi.

11Si manõ gõi ami, lõ tola lõ mimane tõdõmi; mate ami bõrõ horõ, ba no auri ami ba gamakhaita saro khõ Lowalangi bõrõ Yesu Keriso.

12Bõi sa'ae mitehegõ ifatõrõ wa'aurimi horõ ba gulidanõ andre irege mi'o'õ zomasi ia andrõ si lõ sõkhi.

13Bõi gõi milulu ndrotondroto mbotomi ba wa'abõlõ horõ, fate'oguna'õ ba gohitõ dõdõ si lõ sõkhi. Milulu sa wa'aurimi khõ Lowalangi si mane niha si no mufawu'a moroi ba wa'amate numalõ ba wa'auri. Milulu wa'aurimi ma'afefu khõ Lowalangi fate'oguna'õ ba wamalua somasi Lowalangi.

14Tebai ifatõrõ ami horõ, bõrõ me tenga sa'ae barõ huku agama Yahudi auri ami, no barõ wa'ahakhõ dõdõ Lowalangi.

15Iada'e, hadia gamarahutania? Hadia tola talau horõ, bõrõ me tenga barõ huku agama Yahudi so ita, no barõ wa'ahakhõ dõdõ Lowalangi? Ma'ifu tenga!

16Hadia aboto ba dõdõmi na milulu ami ba zi samõsa niha wamalua somasi ia, ba no tobali sawuyunia ami ni'o'omi li -- he sawuyu horõ solohe ya'ami ba wa'amate, ma zui sawuyu Lowalangi sangefa'õ ya'ami moroi ba horõ.

17Ba ta'andrõ saohagõlõ khõ Lowalangi! Sawuyu horõ sa ami ba mbõrõta, ba iada'e tõdõmi ma'asambua zolo'õ famahaõ satulõ si no mube'e khõmi.

18No te'efa'õ ami moroi ba horõ, ba iada'e sawuyu ba zomasi Lowalangi ami.

19Ube'e dumaduma zawuyu andrõ, ena'õ alio mõi ba dõdõmi. No milulu ami fefu mbõrõta sawuyu ba zi ta'unõ ba ba zi lõ sõkhi. Si manõ gõi iada'e, akha milulu sa'ae wa'aurimi fefu tobali sawuyu zomasi Lowalangi ba gohitõ dõdõ nihonogõi Lowalangi.

20Me i'osawuyu ami horõ, tenga nifatõrõ zomasi Lowalangi ami.

21Ba ginõtõ da'õ, hadia hare nitemami ba zoya ngawalõ andrõ saila ami wolau iada'e? Solohe ba wa'amate gamuata andrõ!

22Ba iada'e no te'efa'õ ami moroi ba horõ, ba tobali enoni Lowalangi ami. Hadia zi tobali haremi, ya'ia da'õ wa auri ami ha khõ Lowalangi, ba da'õ zolohe fa'auri sindruhundruhu ba si lõ aetu.

23Bõrõ, fa'amate sa ba no luo horõ; ba fa'auri sindruhu si lõ aetu si fao Keriso Yesu, So'aya ya'ita, ba no buala nibe'e Lowalangi lõ sulõ.



Download Audio MP3 (Roma 6):
Mobile (Low Quality) - CD (High Quality)

 <<  Roma 6 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel