Alkitab Mobile SABDA
[VER] : [SANGIR]     [PL]  [PB] 
 <<  1 Korintus 10 >> 

1Manga anạ u sěmbaụ! Kěnnangko i kamene pẹ̌tahěndung měnsang apa wue nariadi su manga i upung-ghaghurang i kitẹ e, su tempọeng i sire tụtuhụ si Musa. I sire kěbị e nitanurangu winawa e kụ nasal᷊amatẹ̌ liměbạ Laudẹ̌ Mahamụ.

2Makoạ tumatuhụ si Musa e, i sire kěbị e nisahani su ral᷊ungu winawa ringangu su ral᷊ungu laudẹ̌ ene.

3I sire kěbị e sěngkakaěng kaěng marohkẹ̌ e,

4ringangu sěngkapěnginung inumang marohkẹ̌ e gahịe sěmbaụ. I sire kěbị e němpěnginung bọu akẹ u watu hanibẹ̌ marohkẹ̌ e rụděndingang si sire; watu hanibẹ̌ ene e ute kai i Yesus Kristus sẹ̌sane.

5Maningbe kerene, Mawu Ruata e tawe karal᷊uase si sire kal᷊awokange, kụ kai ene hakịu manga kasuang sire měngkai lụl᷊iwatang su wanua l᷊inggi e.

6Patikụ ene nariadị e mẹ̌deạu makoạ tateghang si kitẹ u kumbahang i kitẹ děntaěngu kapulu su hal᷊ẹ̌ dal᷊akisẹ̌ e kere si sire.

7Kerene lai kumbahangbe i kitẹ e mẹ̌suba mahan duata kere kẹ̌koateng u sěngkamonaěng bo'i sire. Su ral᷊ungu Winohẹ Susi e mạbawohẹ, "U taumata lawọ ene e nanětạe nahungkaěng dingangu němpěnginung, mase němpẹ̌sal᷊aị e mạněmba mahan duata."

8I kitẹ e abe pěmpěkoạbe pẹ̌sasundal᷊ẹ̌ kere kẹ̌koateng u sěngkamonaěnge wo'i sire. Watụ u, ruam pul᷊o těllu hiwu su kataune něngkate su ral᷊ungu sěhěllo ual᷊ingu pẹ̌kakoạ kerene.

9I kitẹ e tawe wotonge měmpěnal᷊ukạ Mawu e kerẹewe seng kẹ̌koatengu sěngkamonaěng bo'i sire nạung kal᷊amona e kụ i sire něngkateng kiking těmpu maghaghiadẹ̌.

10I kitẹ e wue abe pěmpẹ̌kurubụ kere kẹ̌koatengu sěngkamonaěng bọ'i sire kal᷊amona e, hakịu i sire nipate kahian Malaekatu Papate.

11Patikụ ene nariadie si sire makoạ tateghang kụ ikakiral᷊ang taumata wal᷊ine e. Dingangu kěbị ene niwohẹ lai tadeạu makoạ sasal᷊ěntihọ si kitẹ e. U i kitẹ ini e kai mẹ̌bẹ̌biahẹ̌ su ral᷊ungu kasueěngu tempo.

12I saim mẹ̌pẹ̌pěndang batangenge rụdarisị matoghasẹ̌ e, pakapia wue mạdirim mawatang.

13Apam bawitaugẹ̌ kẹ̌kahombangeng i kamene e měngkai seng milẹ̌hombang su apan taumata e. Kai arawe Mawu Ruata e mang satia su kědon'E. I Sie ta mapakawalang kamene e sal᷊ukateng limembo wọu kuat'i kamene. Su tempong i kamene kaẹ̌bakengu wawitaugẹ̌ e, i Sie sarungbe mangonggọu ral᷊enge si kamene, tadeạu i kamene matoghasẹ̌ kụ makakẹ̌dang mẹ̌tatahangu sasal᷊ukạ e.

14Ual᷊ingu ene ute, manga anạ u sěmbaụ ikẹ̌kěndagẹ̌ e, i kamene kěnangko pěmpẹ̌binsị u pal᷊ahamawu mahan duata e.

15Iạ e mẹ̌bẹ̌bisaraweng kamene e kere su manga taumata matatahuěnna. Kěnnangko i kamene hala e pěmpẹ̌timbang baweraku ini.

16Piạ i kitẹ kạpěnginung e anggorẹ̌ kụ makịtarimakasẹ su Mawu Ruata e, ene wal᷊inewe mělẹ̌lahẹ u i kitẹ e nasěmbaụ dingang'i Kristus su ral᷊ungu kapapohong'E tangu? Dingangu piạ e i kitẹ kapẹ̌papahiạem boratẹ̌ mědeạu kanengang sěngkapahungkaěng, ene wal᷊inewe mělẹ̌lahẹ u i kitẹ e nasěmbaụ su ral᷊ungu wadang i Kristus tangu?

17Ual᷊ingu kawe borotẹ̌ e man sěmbaụ, kụ i kitẹ kěbị e mal᷊aing kimaěng bọu borotẹ̌ ene e, ute i kitẹ mal᷊awọ ini e kai wadang sěmbaụ.

18Pẹ̌kakěllạewe tau Yahudi. I sire apang kimaěng kaěng makoạ sasěmbạ e, ute kai i sire apang nakoạ tambang pananěmbaěnge.

19Apa wue ngae ene? Mahan duata arau lai kaěng sasěmba mahan duata e tawe mangal᷊ene apa-apa.

20Apang nikoạ sasěmba su panananěmbaěngu mahan duata e tawe ikasěmba su Mawu Ruata, kaiso kawe i sẹ̌sěmban sire su manga setange. Dingangu iạ e mạdiri kụ i kamene masěmbaụ dingangu rohkẹ̌ dal᷊akisẹ̌.

21I kamene e tawe makapanginung bọu ral᷊ohon lainumangu Mawu e, mase kol᷊ai manginung bọu ral᷊ohon lainumangu manga setang. I kamene tawe makakaiang mẹ̌tatamba kumaěng su medan Mawu e masekol᷊ai mẹ̌tatamba kumaěng su medang manga setang.

22Arau kai mapulu apasingkingu Mawu tangu? Arau kai limembong katoghase i kitẹ e wọu Mawu tangu?

23Piạu mẹ̌bẹ̌bera u, "I kitẹ e měngkai wotonge mẹ̌koạ patikụ apang kapulung kitẹ e." Kahěngang bue! Kaiso wal᷊inewe kěbị kapulung kitẹ e piạ gunane. "I kitẹ e měngkai wotonge mẹ̌koạ patikụ apang kapulung kitẹ e," -- kaiso kawe wal᷊inewe kěbị kapulung kitẹ e makapětị pẹ̌bawiah'i kitẹ e.

24Kumbahang bue piạu sarang sěngkatau měngkai mẹ̌deạ kapiam batangenge sẹ̌sane. Kai sěngkatau-sěngkatau e kai hinong pasịdeạ gunang kasanggidange.

25I kamene měngkai kẹ̌kinạ apang iwẹ̌bal᷊ụ su pasarẹ̌. Manịeng tawe sẹ̌suiang kal᷊imona, kereu piạ ěbạu ral᷊ungu naungu.

26Batụu su ral᷊ungu Winohẹ Susi e mạbawohẹ, "Dunia ini e ringangu patikụ dal᷊ohone kai tataghuanengu Mawu."

27Kereu i kamene ghausang i sire ta mangangimange kumaěng, kụ i kamene měnarimạ gaghausẹ̌ ene, kụ pempěnarimạ e laidopẹ̌ apạewen nisadia si kamene. Manịeng tawe kiwal᷊oěng měnsang kai wọu apa laidopẹ̌ ene tadeạu tawẹ apawe karal᷊umběhạ su naungu.

28Kai kereu piạu mẹ̌bera si kamene u, "Laidopẹ̌ ini e kai seng nikoạ sasěmba su mahan duata," ute kumbahang kumaěng kaěng ene, watụ u mẹ̌panda kakakoạ u taumatane ringangu ral᷊ungu naunge.

29Iạ bal᷊inewe mạul᷊ị u naungu, kaiso kawe ral᷊ungu naungu tau ene. Aramanung piạu makiwal᷊o, "Kai unụe karal᷊oahu naungku e kawe isukạbe su kasingkạ u naungu wal᷊ine?

30Kereu iạ mẹ̌pakẹ u laidopẹ̌ e ringangu tatarimakasẹ su Mawu Ruata, ute unụe taumata e harusẹ̌be mapẹ̌sal᷊ang iạ e su kakaěng ene e, sěmbal᷊iau iạ kawe seng nakitarimakasẹ u ene su Mawu Ruata?"

31Apawue koatengu e i kau kumaěng arau měnginunge -- ute koạ e patikụ ene e baugu makaralo arengu Mawu Ruata.

32Pẹ̌biahẹ̌ko sěngapam botonge tadeạu i kau tawe makoạ katatanggaěng su wal᷊ine; baẹbe i sire tau Yahudi arau wal᷊ine Yahudi e kerene lai jamạat'u Mawu.

33Pěmpẹ̌biahẹ̌ko kere iạ. Iạ e mẹ̌tẹ̌tawakal᷊i mạpakal᷊uasu naungu patikụ taumata e su ral᷊ungu patikụ sabarang, tawẹbe timonam baugu kapiam batangeng hala e. Timonaku e kětạewen tạdeakengu i sire kěbị e iapakasal᷊amatẹ̌.



 <<  1 Korintus 10 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel