Alkitab Mobile SABDA
[VER] : [SANGIR]     [PL]  [PB] 
 <<  1 Korintus 13 >> 

1Manilaing iạ makạberang kal᷊awọu haghim beran taumata, arau ringangu weram malaekatẹ̌ e kai kereu iạ e wẹ̌gaweng kuměndagu taumata wal᷊ine e, ute patikụ baweraku ene e kere tingihu tạgonggong tingihe nụneong kaiso tawẹ mangal᷊ene.

2Dingangu manilaing iạ kinawuakengu kapande měhabaru hengetangu Mawu, ringangu makaěnna patikụ kasingkạ mapapěnisẹ̌, dingangu masingkạu patikụ sạbarang dingangu mạngimang masẹ̌ga-sẹ̌gadẹ̌ su Ruata e hakịu iạ makaal᷊ing bul᷊ude, kaiso kawe tạ kakěndagẹ̌ su taumata wal᷊ine ute angkeěng iạ e apawe tạ mangal᷊ene!

3Maningbe lai patikụ apan tẹ̌taghuanengku e, takụ ipakasuem bal᷊awuhe siạ su tau kasiange ringangu wadangku e takụ ipakitutung, kutẹu kawe tạ kakěndagẹ̌ e, ute kěbị-kěbị ene mambeng tawẹ pul᷊ise apa.

4I saing kụkěndagu sěndinganenge i sie kai makẹ̌dang dingangu mapia naunge. I sie tawe sumasingking, tawe mẹ̌bawisara tạ humpạe, tawẹ obote.

5I sie tawe měmamantugẹ̌, tawẹ bẹ̌tade, tawe měnanihasa taumata wal᷊ine pạtol᷊e kapulune hala, tawe lumainụ, dingangu wěgawue měngindorẹ

6I saing kụkěndagu sěndinganenge tạ karal᷊uase su kararal᷊akisẹ̌, i sie tumbạben mal᷊uasẹ̌ su katěngadẹ̌ e.

7I sie makẹ̌dang mẹ̌těngom patikụ sạbarange ringangu makěhagẹ̌ mangimang u apang kapiaěnge su sěngkatau-sěngkatau e; maningbe lai kereapa kakakoạu taumata mạngimange kai tawe kailangengu harapẹ̌ dingangu kakakědang měnal᷊udẹ̌ patikụ.

8Tawẹ běke u kai piạ tempong taumata tawe mẹ̌kakakěndagẹ̌ e. Orasẹ̌ ini e piạ masasingkạ měhabaru hengetangu Mawu, kụ sěnsul᷊e tempo e sarung mangirul᷊e měhabaru ene. Orasẹ̌ ini e piạu mapapande mahumbisarang haghim bera, kai sarung měmpangirul᷊e mẹ̌bisara su ral᷊ungu kal᷊awọu haghim bera ene. Orasẹ̌ ini e kai piạu limembong masasingkạu kěbị tamai ene, kaiso kěbị apang kasingkạ i sire e sarungbe kawul᷊enang.

9U kasingkạ i kitẹ dingangu kuati kitẹ e kai waugu ipěhabaru hengetangu Mawu e mang matimporọ dingangu wẹ̌dang kurange lawọ.

10Sarung mịdating tempone Mawu Ruata e mapakariadin patikụ e masukụ dingangu apan ta nasukụ e sarung iapakaghěngging.

11Piạ iạ e nạung dariọ deng tal᷊awuọe, pẹ̌bawisaraku e kerẹewe pẹ̌bawisaran dariọ den tal᷊awuọ e, pěndangku e kerẹewe pěndangu rariọ den tal᷊awuọ e, pěngangěnnaku e kerẹewe pěngangěnnan dariọ deng tal᷊awuọ. Orasẹ̌ inie iạ seng matěllang, ute kakakoạku nạung iạ deng dariọ e semben nasue takụ niwala.

12Apang kinasilong kitẹ orasẹ̌ ini e ute tabidạeng kěngkau kụkěngkunawadẹ̌ su kasinaěng. Kai sarungbe i kitẹ makasilom matang badang i kitẹ hala ringangu mal᷊ahẹ. Orasẹ̌ ini iạ e wẹ̌dang bẹ̌gang kěbị e, kaiso sarungbe iạ masingkạ u kěbị kerẹewe Mawu Ruata e masingkạ u patikụ kakakoạu watangengku e.

13Kụ tempo ini e kai piạ hal᷊ẹ̌ tatěllu harusẹ̌ hinong dal᷊engang i kitẹ e ute kai: pangangimang, pělaharapẹ̌, dingangu pẹ̌kakakěndagẹ̌. Kai kasěllahengu tatěllu ene ute kai mang kakěndagẹ̌ e.



 <<  1 Korintus 13 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel