Alkitab Mobile SABDA
[VER] : [SANGIR]     [PL]  [PB] 
 <<  1 Korintus 15 >> 

1Kụ ini e manga anạ u sěmbaụ, iạ mapulu tadeạu i kamene saụbe makatahěndung kapia Injilẹ̌ nạung takụ ilẹ̌habarẹ̌ si kamene. I kamene e němpěnarimạ, dingangu nangimang si Kristus ual᷊ingu Injilẹ̌ ene.

2Kereu i kamene mangumbelẹbe masěgadẹ̌ su apan takụ ilẹ̌habarẹ̌ e ute Injilẹ̌ e kai makasal᷊amatẹ̌ si kamene; tabeạu katewe i kamene mangimang ta makal᷊aěnna.

3Apan takụ nihabarẹ̌ su manga anạ u sěmbaụ e ute sembem bọu takụ nitarimạ. Kahumotongange ringangu kasariange ute kerẹewe mạbawohẹ su ral᷊ungu Bukẹ̌ Susi e, iạ něhabarẹ̌ si kamene u i Kristus e kawe napohong ual᷊ingu kal᷊awọu rosang kitẹ; nilẹ̌bing;

4kai wọu ene nẹ̌biahẹ̌ kapia su ěllo katěllune. Ene e mal᷊aing kạbawohẹ su ral᷊ungu Bukẹ̌ Susi.

5Iạ e maul᷊ị lai si kamene u i Kristus saụ nẹ̌biahẹ̌ kapia e mal᷊aing nanodẹ u watangenge si Petrus, ringangu l᷊ai su manga rarolohange i sire mapul᷊o dua.

6Bọu ene nẹ̌těngkatodẹ u watangenge kapia si sire tumatol᷊ene lima hasụ su kataune sěngkahindọ. Kal᷊awokange wo'i sire e wẹ̌dangbe wiahẹ̌ orasẹ̌ ini, kětạewen manga pirang katau seng nate.

7Bọu ene i Kristus nẹ̌těngkasilo l᷊ai si Yakobus bọu ene su kěbị darolohange.

8Su pěngěnsueěnge kahěngang ute nẹ̌tumpasilọ e lai si siạ e -- kerẹ e sěngkatau rariọ diměnta reng bal᷊ine tempone!

9Iạ e kai rarolohangu Mawu kasanakenge. Iạ e ta hinone ikasěbạ darolohang, batụu iạ e kawe wọu nẹ̌tingkaị jamaatu Mawu.

10Kai ual᷊ingken tatal᷊ěntụu Ruata e ute iạ nakoạ kere kakakoạku e su orasẹ̌ ini. Ringangu tawe nagholọ bue Ruata e něngampung si siạ. Katewe pundangu iạ e něhal᷊ẹ̌ limembong kasẹ̌gade wọu patikụ darolohange lai wal᷊ine e. Kaiso ene e tumuhụ hinone e wal᷊inewe iạ, kaiso kawe tatal᷊ěntụu Mawu Ruata e nahundingang u iạ.

11Kụ měnsangbe wọi sai-sai i kamene makatarimạu Injilẹ̌ ene -- walạewe wọu anuku arau rarolohang bal᷊inẹ e -- ene e tawe makoạbe sangkural᷊ange. Kai kahumotongange ringangu kasariange ute i kami e makapěhabaru Injilẹ̌ ene e ringangu i kamene mangimang bue.

12Kereu nihabari kami e kawe i Kristus seng saụ nẹ̌biahẹ̌ bọu kapapohonge, unụe wọi kamene piạu mẹ̌bera u tau nate e seng tawe saụ mẹ̌biahẹ̌?

13Kamagengbe kahěngang tau nate tawe ipẹ̌biahẹ̌ saụ, ute mangal᷊ene i Kristus e tawe saụ nẹ̌biahẹ̌ bọu kapapohonge.

14Kụ kereu andene i Kristus tawe saụ nẹ̌biahẹ̌ bọu kapapohonge, ute tawẹ gunane i kami měhabaru apa-apa ringangu tawẹ gunane lai i kamene měmpangimang, u pěngangimangu e tawẹ apa pinamanggilange.

15Limembo wọu ene ute nal᷊ahẹu i kami e kinarapateng kai sahidi konti mạanun Mawu Ruata e, batụu i kami e něhabaru Mawu Ruata e seng saụ napẹ̌biahi Yesus Kristus bọu kapapohonge, sěmbal᷊iau Ruata e tawe saụ napẹ̌biahi Sie -- kereu kahěngang bue taumata nate e tawe saụ nipẹ̌biahẹ̌!

16U kamageng tau nate e tawe nipẹ̌biahẹ̌ saụ ute i Kristus tawe niapẹ̌biahẹ̌ saụ bọu kapapohonge.

17Dingangu kamageng i Kristus e tawe nipẹ̌biahẹ̌ saụ ute pěngangimangu e kětạengbeng ipi samatang; kụ ene mangal᷊ene i kamene wẹ̌dang su ral᷊ungu kakakoạu rosa e kụ seng tạu pěharapeng sidutu.

18Kụ mangal᷊ene lai ute taumatang Sahani apan seng nate ute seng tawẹapa pělaharape.

19Kereu pělaharap'i kitẹ si Kristus kẹ̌tabeng nakětạ su pẹ̌bawiah'i kitẹ su dunia ini e, tangu wọu patikụ umatẹ̌ su ral᷊ungu dunia ini e, ute kai i kitẹ e limembong kạěngkěhang!

20Kaiso karal᷊ahẹe i Kristus seng niapẹ̌biahẹ̌ kapia wọu kapapohonge. Kai ini e wuạu taumata nate e kụ saụ niapẹ̌biahẹ̌ kapia.

21Kai watụ u papate e kai suwụu taumata sěngkatau e ute kerene lai mẹ̌biahẹ̌ kapia wọu papate e nionggọ su taumata e mal᷊aing suwụu taumata sěngkatau e.

22Kerẹewe kal᷊awọu taumata e nate nasowa sěmbaụ dingang'i Adam kerene lai kal᷊awọu taumata sarung ipẹ̌biahẹ̌ e, ual᷊ingu nasowa sěmbaụ dingang'i Kristus e.

23Kai sěngkatau-sěngkatau e sarung ipẹ̌biahẹ̌ tumuhụ bihinge, humotong-motong i Kristus, bọu ene hẹ̌dowen i Sie saụ duměnta kapia, dumol᷊osewe wihingu taumata apan tataghuanengi Kristus.

24Samuring ene ute nahẹ̌puse dunia e. Su tempo ene i Kristus e sarung mamatạ patikụ parenta, patikụ kawasa ringangu patikụ kuatẹ̌, mase i Sie sarungbe měnarakangu kawasane kere sěngkatau ratu e, su Ruata i Amang i kitẹ.

25I Kristus hinowen tatapẹ̌ mẹ̌pẹ̌parenta sarangbeng Mawu Ruata e mapakariadin patikụ dokạ i Kristus e mẹ̌samal᷊ẹ si Kristus.

26Dokạ pangěnsueěnge sarung ikawatạ, ute kai papate.

27Su ral᷊ungu Winohẹ Susi e kạbawohẹ kere ini, "Mawu Ruata e seng napakariadim patikụ sabarang nẹ̌samal᷊ẹ si Sie." Nal᷊ahẹ kere su pẹ̌sasasěbạ u, "patikụ sabarang" ute Mawu Ruata e madal᷊iuwe su l᷊ikude, kụ napakariadin patikụ sạbarange nẹ̌samal᷊ẹ si Kristus.

28Kai sarạeng kěbị-kěbị e seng nisěllunge su al᷊ungu parentạeng Kristus, tangú i Sie sẹ̌sane kụ Ahusu Ruata e, sarung mẹ̌těngkasěllungu watangenge su Ruata kụ seng napakariadin patikụ-sạbarange nẹ̌samal᷊ẹ si Sie. Tangu Ruata e mal᷊aing sarung sẹ̌sane mẹ̌parenta kěbị e.

29Kereu taumata nate e tawe iapẹ̌biahẹ̌ kapia, unụe wue piạ taumata nisahani e waugu taumata nate? Kai apạ e ikapěharapẹ̌ bọu kal᷊awọu taumata kerene? Kereu mamben těngadẹ̌ taumata nate e semben tamẹ̌saụ mẹ̌biahẹ̌ e, kai pẹ̌kapura wue tangu taumata isahani waugu taumata nate e?

30Dingangu kai waug'u a l᷊ai i kami e měngkai tụtatěngo hombang sidutu?

31Manga anạ u sěmbaụ! Apang kal᷊aěllo iạ e mang mẹ̌dẹ̌dararagu sigẹ̌sạ e waug'u iạ rụl᷊uasu pẹ̌bawiah'i kamene manga anạ u sěmbaụ batụu i kamene kawe seng nangimang si Kristus Yesus, Mawung kitẹ.

32Kamageng ene e kětạengbeng kawe ual᷊ingu mạtaumata e samatang, apa wue untune si siạ baug'u mẹ̌tawakal᷊i sěngapam botonge rumokạ kal᷊awọu binatang dul᷊u su soa ini, su Efesus? Kereu mamben těngadẹ̌ taumata nate e tawe saụ ipẹ̌biahẹ̌ kapia, ho, mapiawe i kitẹ tumol᷊e bungang'u wawera ini: "Hotede i kitẹ e kumaěngke ringangu měnginungke ringangu mẹ̌daral᷊uase, watụ u rịěllo i kitẹ kawe sarung mate."

33Piawe kal᷊itoěng! Kereu i kamene měhapịu taumata ral᷊akisẹ̌ e, kai makạdal᷊akisẹ̌ bahasa mapapia.

34Kụ kuhạko wue mẹ̌koạ dal᷊akị. Kai apa makạmea kereu sutal᷊oarang kamene e kai piạ taumata kụ bẹ̌dang ta nakạkiral᷊a Mawu Ruata.

35Aramanung kai piạu makiwal᷊o, "Kai kereapạ e taumata nate ipẹ̌biahẹ̌ kapia? Kere apa ngae pẹ̌bawadange ionggọ si sire, sarạeng seng nẹ̌biahẹ̌ kapia?"

36Ei tau longong! Kereu i kau e mẹ̌suang bine su ral᷊ungu ěntana, bine ene e ren tawe tumuwo kereu ren tawe nate kal᷊amona.

37Dingangu wine nisuangu su ěntana ene e -- aramanung kai wineng gandung arau wine wal᷊ine -- ute kai wakị u wine ene samatang, wal᷊inewe kěbị sasuange kụ sarung tumuwo.

38Hẹ̌dowem Mawu Ruata sẹ̌sane mangonggọu tatuwone tumuhụ ewe kapulune mẹ̌tatahino su sasuange ene. Kụ suapạewen haghim bine seng nahiạ u tatuwone timuhụ ewe sasuange sěmbaụ-sěmbaụ.

39Badangu riạdikang sụsindạe wal᷊inewe kěbị mẹ̌sul᷊ung. Taumata e wadange mẹ̌sẹ̌sul᷊ung arawe binatange piạ gahịu wadange wal᷊ine; manga manụ e mal᷊aing bal᷊ine ghahịu wadange.

40Kerene lai manga ral᷊ohon langị dingangu dunia. Dal᷊ohon langị e sěmbaụ-sěmbaụ nahiạ u kal᷊ěnggihe ringangu ral᷊ohon dunia e mal᷊aing kerene.

41Kal᷊ěnggihu sěnnangu matangěllo e naněntani wọu kal᷊ěnggihu sěnnangu wul᷊ang. Manga wituinge mal᷊aing piạ kal᷊ěnggihe sẹ̌sane. Sal᷊ạanune apam bituinge mẹ̌tẹ̌tatěntani lai kal᷊ěnggihe.

42Kerene lai sarung taumata nate e mẹ̌biahẹ̌ kapia. Badange nilẹ̌bing ene e kai wạdang mạhenẹ, arawe kụ bạdange nipẹ̌biahẹ̌ kapia e ute kai wadang tawe mal᷊ahenẹ.

43Su tempom badang ene nilẹ̌binge ute wadang ene mahenẹ dingangu lome; arawe su tempong iapẹ̌biahẹ̌ kapia e ute kai wadange mal᷊ěnggihẹ̌ dingangu matoghasẹ̌.

44Su tempon nilěbinge, ute wadang ene e kai wadang bọu dunia, arawe sarạeng nẹ̌biahẹ̌ kapia e ute wadang ene e, kai wadang nionggọu Rohkẹ̌ u Ruata. Piạ badang asal᷊e wọu dunia, piạbe lai wadang kụ asal᷊e wọu Ruata.

45Su ral᷊ungu Winohẹ Susi kạbawohẹ kere ini, "Taumata humotonge ute kai i Adam, nakoạ diadikang biahẹ̌," kai arawe i Adam kasamuriange ute kai Rohkẹ̌ namiahẹ̌.

46Diměnta kakal᷊imonaěnge ute kai ghẹ̌si, wal᷊inewe kai rohkẹ̌. Arawe rohkẹ̌ ute kai riměnta samuri.

47I Adam humotonge ute kai nikoạ bọu awul᷊u ěntana, arawe i Adam karuane ute kai asal᷊e wọu sorga.

48Taumatan dunia ini ute kai mẹ̌sul᷊ungu i Adam kahumotong-motongange nikoạ bọu awul᷊u ěntana, arawe taumatan sorga e ute kai mẹ̌sul᷊ungu i Sie kụ diměnta wọu sorga.

49Kerẹewe lai i kitẹ orasẹ̌ ini e mẹ̌sul᷊ung i Adam nikoạ bọu awul᷊u ěntana e ute i kitẹ e lai sarung mariadi kerẹewe i Sie kụ bọu sorga e.

50Timonaku e ute manga anạ u sěmbaụ kai: wadang kụ niriadi wọu ghěsi ringangu raha e, tawe makasuẹ̌ su Runian Duata Wuhu; ringangu wadang kụ mahuta e tawe makoạ kakalẹ̌.

51Kěnangko patehe rahasia ini: Wal᷊inewe kěbị e i kitẹ sarung mate, kai i kitẹ kěbị e sarung mẹ̌bal᷊ui.

52Watụ u hal᷊ẹ̌ ene e hẹ̌dowen mariadi sěngkělěndịu arau sěngkakondạ, piạ e slompretẹ̌ e ipahěte su pangěnsueěnge. Batụu su tempọeng kinaringihẹ̌ tingihu slompretẹ̌ e, ute apan nate e ipẹ̌biahẹ̌ kapia ringangu wadange kakalẹ̌, kụ i kitẹ kěbị e ipẹ̌bal᷊ui.

53Wadang i kitẹ lụate e harusẹ̌be mẹ̌pakẹu wadang i kitẹ ta lumaate, ringangu wadangi kitẹ bọu dunia e seng nẹ̌pakẹu wadang kụ bọu sorga e.

54Kereu wadang lụate seng něluheng badang ta lumaate, ringangu wadang kụ bọu dunia e seng něluhen kakakoạu wadang kụ bọu sorga e, ute su tempo ene buhụewe naghanapẹ̌ kere mạbawohẹ su ral᷊ungu Winohẹ Susi u, "Papate seng kinawatạ; kal᷊auntung seng nikahombangeng!"

55"Ei papate, suapạe watạu e? Ei papate, suapạe wisanu?"

56Bisang papate ute kai rosa e, ringangu rosa e mạsẹ̌gadu toratẹ̌ e.

57Kai tangu, tarimakasẹ su Mawu Ruata e; u i Sie kai nangonggọu watạ e su Mawung kitẹ i Yesus Kristus.

58Ual᷊ingu ene, manga anạ u sěmbaụ kụ ikẹ̌kěndagẹ̌, pakakakuatẹ̌ dingangu pakatatoghasẹ̌ bue i kamene. Pěmpěhal᷊ẹ̌ko turusẹ̌ baugu Mawu e ringangu kạguwạu ral᷊ungu naung, u i kamene masingkạ u patikụ apang kinoạ i kamene waugu Mawu e tawe makoạ tạ gunane.



 <<  1 Korintus 15 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran