1Manga anạ u sěmbaụ! Su tempong iạ duměnta su anunu ringangu něhabaru hingidu Mawu si kamene kụ bědang ta nikẹ̌kasingkatengu dunia e, ute iạ e tawe nẹ̌pakẹ u katatahuěnnan dunia e arau mẹ̌bẹ̌bisaram bisara kụ asal᷊ewem mẹ̌bẹ̌bisara.
2Batụu iạ seng mẹ̌karaki ringangu kạguwạu ral᷊ungu naung tadeạu karěngụeweng iạ dingangi kamene tangu, iạ e tawe měhabaru apa-apa, sul᷊ikudu kětạeng mạanung Yesus Kristus; sěmatang mělẹ̌habaru i Sie seng napohong su kuruisẹ̌.
3Piạ e iạ ene ringang i kamene, iạ e kai lome ringangu ghimaghan takụ.
4Habarẹ̌ takụ nipaul᷊ị si kamene e tawe takụ nihabaru wawera makạbinsana tuhụ katatahuěnnan taumata. Iạ e naul᷊ịu ene e mělẹ̌lahẹu Rohkẹ̌ u Ruata e kai kawasa.
5Iạ nẹ̌koạ kerene e takadeạu pěngangimangi kamene si Kristus e tawe iwěnta su katatahuěnnan taumata e, kaiso kawe iwěnta su kawasan Duata.
6Maningbe kerene, sutal᷊oaran taumata kụ pẹ̌bawiahu marohkẹ̌ e seng natimu, iạ e mambem mahumbisarang hal᷊ẹ̌ u katatahuěnna. Kai katatahuěnna ini e wal᷊inewe katatahuěnnan dunia e, arau katatahuěnnam mangangawasan dunia tempo ini, kụ kawasane e sarung mapal᷊usẹ̌.
7Katatahuěnna takụ ipạhumbisara e tawe kasingkatengu dunia e, kai Mawu Ruata e seng něnadiang ene e waụgu karal᷊unsemahẹ̌ si kitẹ e kal᷊amonan dunia e niriadi.
8Tawẹu sarang sěngkatau wọu tal᷊oaram mangangawasa orasẹ̌ ini e masingkạ u katatahuěnna ene. U, kereu i sire kai seng masingkạ ute, tantu i sire tawe sarung měnguruisẹ̌ Mawu mawantugẹ̌ ene.
9Su sěmběkane ute hal᷊ẹ̌ ene kai kere mạbawohẹ su ral᷊ungu Winohẹ Susi, "Apang deng tạ kinasilo arau reng tạ kinaringihu taumata e, dingangu reng tạ kinatiněnnan taumata e, ute seng sinadian Duata e waugu taumata apang kụkěndagẹ̌ e."
10Arawe Ruata e seng napakal᷊ahẹ si kitẹ ual᷊ingken Rohkẹ̌ e. Rohkẹ̌ u Ruata e něnanẹ̌sui patikụ e, sarạeweng apang hingidu Ruata su kapapěnisange.
11U masingkạ u ral᷊ungu naungu pẹ̌sěngkatau e ute kai rohkẹ̌ u tau ene sẹ̌sane, arau ěng? Kerene wue hal᷊ẹ̌ u Mawu. Masasingkạ u ral᷊ungu naungu Mawu Ruata e ute kẹ̌tabeng Rohkẹ̌ u Ruata sẹ̌sane!
12Dingangu i kitẹ e tawe nighělirangu rohkẹ̌ u dunia ini, kaiso kawe Rohkẹ̌ bọu anun Mawu Ruata, tadeạu i kitẹ makakasingkạbeng kěbị seng nịlaonggọ u Mawu Ruata e si kitẹ.
13Ual᷊ingu ene e, kereu i kitẹ měnualagu patikụ mạanun Duata e si sai-sai mạnaghuang Rohkẹ̌ u Ruata e, i kami e tawe maraul᷊ị tụtuhụ katatahuěnnan taumata, kaiso kawe tụtuhụ těntiron Rohkẹ̌ u Ruata.
14Taumata kụ ta mananaghuang Rohkẹ̌ u Ruata e tawe makatarimạ u apan nilahẹ u Rohkẹ̌ ene. Watụ u su taumata ene kěbị-kěbị ene ute kai mẹ̌sul᷊ungu hal᷊ẹ̌ u katatungkọ. Tau ene tawe makaěnna, u ene kětạewen nipanda kere kakakoạ u marokẹ̌ sěmatang.
15I sai-sain mạnaghuang Rohkẹ̌ u Ruata e makakoạ měngarẹ̌gam patikụ sabarang, kaiso tawẹu sarang sěngkatau makapangarẹ̌gam batangeng'E.
16Su Winohẹ Susi e, kạbawohẹ, "Kai i sai masingkạ u tingirangu Mawu? Dingangu kai i sai makapěnasa si Sie? Kai i kitẹ e kinawuakengu tingirange mẹ̌sul᷊ungu si Kristus!"
<< 1 Korintus 2 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel