Alkitab Mobile SABDA
[VER] : [SANGIR]     [PL]  [PB] 
 <<  Filipi 2 >> 

1I kamene matoghasẹ̌, ual᷊ingu i kamene nasěmbaụ dingang i Kristus. Dingangu i kamene mạhiborẹ̌ ual᷊ingu i Kristus kiměndag'i kamene! I kamene niahạu Rohkẹ̌ u Ruata, ringangu i kamene lai měkẹ̌kakěndagẹ̌ tapengu mětẹ̌tatal᷊ěntụ sěngkatau su wal᷊ine.

2Ho! kěnangko i kamene kahěnga-hěngang makal᷊uasẹ̌ naungku su manga hal᷊ẹ̌ ini: Pẹ̌biahẹ̌ko sěngkanaung dingangu l᷊awọ měkakěndagẹ̌ dingangu timona mẹ̌sul᷊ung.

3Abe pěmpẹ̌koạ manga apa ual᷊ingu sẹ̌sahěsekangu pandungangu watangeng hala, arau makapangobotu watangeng. Su sěmběkane karimạkọ i kamene sěngkatau-sěngkatau ringangu kasanạ u naung mangěnna u taumata wal᷊ine limembom mapia wọu watangeng.

4Kakěllako pandungangu taumata wal᷊ine; abe kětạeng pandungangu watangeng.

5Karimạko i kamene piạ kanaunge kere Mawu Yesus Kristus.

6Tumuhụ hinone i Sie mẹ̌sul᷊ungu Mawu Ruata, kai i Sie tawe nakapěndangu kakakoạ e marohkẹ̌ ene hinong tahutěndakeng'E.

7Su sěmběkane, i Sie maměllọ u kěbị mase makoạ mẹ̌sul᷊ungu sěngkatau ěllang. I Sie nakoạ kere taumata kụ kěllaěng biahẹ̌ bue mẹ̌sul᷊ungu taumata.

8I Sie nẹ̌těngkasanạ u watangeng'E kụ mẹ̌bẹ̌biahẹ̌ satia su Mawu Ruata sarang napohong -- su kalu kuruisẹ̌.

9Kai ual᷊ingu ene hakịu Ruata něhengkẹ i Sie niapakarangẹ-dangẹ, dingangkewen něgěllị u kawasa si Sie limembo wọu patikụ kawasa wal᷊ine.

10Tangu waugu měngadatẹ̌ Mawu Yesus, kěbị diadikang su Sorga ringangu su dunia, dingangkewe lai su al᷊ungu dunia sarung mẹ̌suba si Sie.

11I sire kěbị sarung měngaku u Yesus Kristus e kai Mawu; kụ kamageng kerene Ruata i Amang niwantugang.

12Batụu ene, manga anạ u sěmbaụ kụ ikẹ̌kěndagẹ̌, kereapạewen i kamene hanesẹ̌ susasuměllung si siạ su tempon iạ ene sutal᷊oarang kamene, tangu limembọewe orasẹ̌ ini seng něgagheange, mal᷊owọko i kamene měngkai sumasuměllung si siạ. I kamene seng niapakasal᷊amat'u Ruata, kụ pẹ̌tawakal᷊iko turusẹ̌ tadeạu karal᷊unsemahu e masukụ. Koạko ene ringangu adatẹ̌ ore lai tatuhụ su Ruata,

13ual᷊ingu Ruata sẹ̌sane nẹ̌karadiahang su ral᷊ungu watangeng i kamene mědeạu i kamene mapulu ringangu makal᷊uasẹ̌ naungu Ruata.

14Hal᷊ẹ̌keko kěbị sạbarang dingangu tawẹ karubụ e arau sitorine.

15Pẹ̌kakoạ i kamene kerene ute měnẹ̌nodẹ u i kamene kai manga anạ u Ruata kụ tawe turạe, kụ měbẹ̌biahẹ̌ dingangu katul᷊idẹ̌ ore lai katěngadẹ̌ sutal᷊oaran taumata raral᷊aị dingangu mararosa. Kụ su tempong i kamene měhabarẹ̌ si sire habarẹ̌ makaonggọ u pẹ̌bawiahẹ̌, ute mal᷊owọko i kamene makoạ kere tualagẹ̌ si sire simẹ̌nnang nanualagẹ̌ dunia e. Kamageng i kamene mẹ̌biahẹ̌ kerene ute, hẹ̌dowe piạ banggile si siạ baugu makạpěndang lumuasi kamene su tempon Mawu Yesus Kristus duměnta kapia. Ene tiahane u munaraku e tawe magholọ kaiso piạbe kěhase.

16(2:15)

17Aramanung iạ sarung pateěng kụ dahaku makoạ sasěmba su wowong apa nipaněmbang kamene su Ruata makoạ tatiala u i kamene mangimang si Sie. Kereu mang harusẹ̌ kerene, iạ e makitarimakasẹ su hal᷊ẹ̌ ene ringangu sěngkapahul᷊uasẹ̌ dingangi kamene.

18Kerene lai, mal᷊owọko i kamene mal᷊aing makitarimakasẹ dingangu sěngkapahul᷊uasẹ̌ dingangku.

19Iạ mangimang u kai ringangu tul᷊umangu Mawu Yesus, iạ e lighạ nakapěndoloh'i Timotius sol᷊ong anung kamene, tadeạu iạ e mahiborẹ̌ ual᷊ingu habarẹ̌ mạanung kamene.

20Kětạeng i Timotius e kakěsạ e taumata sěngkanaungu iạ, dingangu těnga-těngadẹ̌ mẹ̌tẹ̌tiněnnang kapapiang kamene.

21Kěbị e lai wal᷊ine kětạeng měsẹ̌sěmpị hal᷊ẹ̌ u watangeng hala, wal᷊inewe waugu pandungangu Mawu Yesus Kristus.

22I kamene seng nakasilo tialane u i Timotius mamben něbaraguna. I sie seng nẹ̌těngkasaghedẹ̌ dingangku baugu pělahabar'u Injilu Mawu. I kandua e mẹ̌sul᷊ungu anạ dingangu iamange.

23Batụu ene, lẹ̌paseweng iạ nakakasingkạ u kereapa ral᷊engu hal᷊ẹ̌ku e sarung maghanapẹ̌, ute iạ sarung měndoloh'i sie sol᷊ong anung kamene.

24Iạ mangimang kai ringangu tul᷊umangu Mawu e, iạ sẹ̌saku e tawẹ kaděngụe lai sarung mẹ̌tiwo si kamene.

25Mihino su anạ u sěmbaụ i kitẹ i Epafroditus kụ seng niroloh'i kamene baugu iapẹ̌tul᷊ung siạ, iạ nẹ̌pěndangu mambeng hinone měndoloh'i sie pẹ̌bal᷊ị anung kamene. I sie seng timaking siạ su ral᷊ungu munara ringangu pẹ̌kakarạdiahangku e.

26I sie rụdareạ i kamene manga anạ u sěmbaụ kěbị dingangu i sie měngkate su kaghaghěngganeng u i kamene seng nakahombang habarẹ̌ u i sie masakị.

27Mang kahěngang i sie masakị hakịu marani mate. Kai Ruata e timal᷊ěntụ i sie; kụ bal᷊ine kětạ si sie, kaiso si siạ l᷊ai, tadeạu kumbahang iạ e tumanịu něngalembo masusa l᷊ai.

28Kai ene hakịu mangkeng kakạsariane lai ěnningku mědeạu měndolohi sie pẹ̌bal᷊ị sol᷊ong anung kamene, tadeạu i kamene sarung lai mahul᷊uasẹ̌ kapia kereu i kamene mẹ̌sombang dingange, kụ naungku e mal᷊aing mal᷊enehẹ̌.

29Tangú, pěmpanarimạkon sie ringangu karal᷊uasu naung kere sěngkatau anạ u sěmbaụ tamba pangangimang. Pěngarěgawen patikụ taumata kere i sie.

30Baugu pandungangu munarang Kristus, i sie maraning lai mate; i sie něnarakangu niawane baugu mẹ̌tul᷊ungu iạ su arengi kamene.



 <<  Filipi 2 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran