Alkitab Mobile SABDA
[VER] : [SANGIR]     [PL]  [PB] 
 <<  Kisah Para Rasul 11 >> 

1Manga rarolohang dingangu taumata mạngimang su kaguwạu Yudea e nakaringihẹ̌ u taumata apan bal᷊ine su agamang Yahudi e mal᷊aing makạtarimạ u hengetangu Mawu e.

2Ene piạ i Petrus nakoạ sol᷊ong Yerusalem, tau Yahudi apang mạngimang e nanongkeang si Petrus.

3I sire nẹ̌bera, "Kawe unụe i kau nakoạbe sol᷊ong bal᷊eng sire ta nịsasunatẹ̌? O kawe lai kimaěng sěngkakaěng dingang i sire!"

4Ual᷊ingu ene i Petrus něnualagẹ̌ si sire, kěbịewe apan seng nariadi si sire, nanětạ bọu panẹ̌takenge. I Petrus nẹ̌bera,

5"Iạ e kai kapẹ̌kẹ̌kal᷊iomanenge su soan Yope, kutẹu iạ e nakasiloko sěmbaụ papasilo. Iạ e nakasilo piạ apa kere hekạ mawěnahẹ̌ naẹ naul᷊uhẹ̌ bọu l᷊angị, mạbawiting su wukune ěpạ, bọu e naẹ̌dung su sěmběkaku.

6Piạ iạ e kạpẹ̌kakěllane sol᷊ong dal᷊unge iạ nakasilo manga binatang laede ěpạ, manga binatang dul᷊u, manga binatang tụtondo, dingangu manga manụ u kinoaěng maghaghaěng.

7Mase iạ nakaringihẹ̌ piạ tingihẹ̌ nẹ̌bera si siạ, 'Pẹ̌bangungko Petrus! Pěmotọ e kụ kinạ e!'

8Kai iạ e simimbang, 'Tala Mawu! Haeng badangku iạ e tawe měndarotong biahẹ̌ kụ ipěpẹ̌pělli e ringangu mal᷊amuhụ e.'

9Arawe tingihẹ̌ ene saụewe něluntingihẹ̌ bọu l᷊angị, 'Apang kụ seng niwerang Mawu Ruata e tawe ipẹ̌tatělling ute, kumbahang bue iwerang kamene u pělli.'

10Iạ mambeng nakasilo hal᷊ẹ̌ ene sarang katěllun sul᷊ene, kụ pěngěnsueěnge tangu kěbị e nasapuạ kapia sol᷊ong sorga.

11Nẹ̌sarětạ u su tempo ene lai i sire těllu wọu Kaisarea, kụ nirolohẹ̌ sol᷊ong anuku, nasongọ e su wal᷊e pětẹ̌tanakengku.

12Mase Rohkẹ̌ u Ruata e něndoloh'u iạ apạdal᷊eng dingang i sire ringangu tawẹ goẹ̌ e. I sire ěnnung anạ u sěngkatau ini e mal᷊aing timol᷊e ringangku sol᷊ong Kaisarea, kụ i kami kěbị e nasuẹ̌ su ral᷊ungu wal᷊eng Kornelius.

13Bọu e i Korneliusẹ̌ e nẹ̌běke si kami kereapa i sie nakasilo malạekatẹ̌ sěngkatau rụdarisị su wal᷊ene ringangu nẹ̌bera, 'Pěndolohẹ̌kon taumata sol᷊ong Yope pẹ̌kuiko sěngkatau esẹ arenge i Simon Petrus.

14I sie sarung maul᷊ị si kau hengetang kụ sarung makasal᷊amatẹ̌ si kau ringangu kěbị dal᷊ohon bal᷊enu.'

15Kụ su tempong iạ nanětạ nẹ̌bera kerene," angkuěng i Petrus kapẹ̌nẹ̌paseng běkene, "Rohkẹ̌ u Ruata e natěntung si sire kerẹewe nạung nariadi si kitẹ su tětạ e kal᷊amona.

16Mase iạ e nakatahěndung, Mawu e nạung bọu něhengetang, 'i Yohanesẹ̌ e nạung něnahani ringangu akẹ, arawe i kamene sarung sahaniang dingangu Rohkẹ̌ u Ruata e.'

17Kụ nal᷊ahẹ u Mawu Ruata e mal᷊aing měgẹ̌gěllị l᷊ai su taumata wal᷊ine su agamang Yahudi e, gaghěllị mẹ̌sul᷊ungu ighẹ̌gěllị e si kitẹ su tempong i kitẹ nangimang su Mawu Yesus Kristus. Ual᷊ingu ene, tawe masowa su akal᷊ẹ̌ iạ kawe mẹ̌sěding Mawu Ruata e!"

18Sarạeng nakaringihẹ̌ ene tangu i sire sembeng tawe lai rimendehẹ̌. Kụ bọu ene, i sire nědalọ e Mawu Ruata. I sire nẹ̌bera, "Kamageng kerene, i sire wal᷊ine taumatan Yahudi e mal᷊aing nighěllirangu l᷊oahe kahian Duata e tadeạu pẹ̌tobatẹ̌ bọu kal᷊awọu rosane kụ makateěng pẹ̌bawiahẹ̌ tutune."

19Sarạeng i Stefanus nịpapate, taumata mạngimang su Mawu Yesus e nanětạ e sẹ̌sahusuang, hakịu i sire nasawuhẹ̌ su apan tampạ. Piạ u nahuntal᷊ang sol᷊ong Fenisia, piạko l᷊ai nahumpạ u Siprus dingangu Antiokia. I sire měmpělẹ̌habaru hengetangu Mawu tumbạeng su taumatan Yahudi samatang.

20Kụ bọu tal᷊oarang taumata mangimang ene wọu Siprus dingangu Kirene, piạbe lai taumata apang něngkakoạ sol᷊ong Antiokia kụ měmpělẹ̌habaru Injilẹ̌ mạanun Yesus e su apan taumata kụ bal᷊ine su agamang Yahudi e lai.

21Kawasang Mawu e, ene si sire hakịu kai mal᷊awọ taumata němpangimang dingangu měnarakangu watangeng i sire su Mawu.

22Manga wěke mạanun hal᷊ẹ̌ tamai ini e kinaringihẹ̌ lai su jamaatẹ̌ su Yerusalem. Tangu i sire něndolohen Barnabas sol᷊ong Antiokia.

23Kụ sarạeng i Barnabas nahumpạ sene, ringangu nakasilo kereapa Mawu Ruata e něngal᷊amatẹ̌ si sire ene, i sie měngkate apa nikahaluaseng. Bọu ene i sie nẹ̌dorong tadeạu i sire kahěnga-hěngang masatia ringangu kạguwạ u naung su Mawu.

24I Barnabas ini e kai taumata naunge mapia ringangu pinẹ̌kawasaěng u Rohkẹ̌ u Ruata tapengu l᷊ai mạngimang masěgadẹ̌ su Mawu hakịu mal᷊awọ taumata tụtol᷊e Mawu.

25Bọu ene i Barnabas nakoạ sol᷊ong Tarsus mědẹ̌deạ si Saulus.

26Sarạeng nẹ̌sombang i Saulus, i sie němaringang i Saulus nakoạ sol᷊ong Antiokia kụ sěntaung tinalung i sire měmpẹ̌tẹ̌tampung dingangu jamaatẹ̌ sene apidu kạpaněntirone taumata l᷊awọ. Seng su Antiokia ene taumata apang mạngimang su Mawu Yesus e kakal᷊imonaěng e nisěbạ taumatan Sahani.

27Su tempo ene piạ manga nabi pirang katau diměnta wọu Yerusalem sol᷊ong Antiokia.

28Wọu tal᷊oaran sire ute piạ sěngkatau arenge i Agabus. Ual᷊ingu kakanoạ u Rohkẹ̌ u Ruata e i sie měnẹ̌něbal᷊ẹ̌ u su kaguwạu dunia e sarung kahombangengu tempong karal᷊unusẹ̌ masaria. (Kụ hal᷊ẹ̌ ene mambeng lai mariadi su tempong pẹ̌paparentang Kaisar Klaudius.)

29Tangu kěbị apan tumatol᷊e si Yesus e sěngkanaung měndingọ u tatongka su manga anạ u sěmbaụ kụ mětẹ̌tanạ su Yudea; sěngkatau-sěngkatau e něndingọ tuhụewe kaumal᷊enge.

30Pẹ̌kakakire ene mal᷊aing kinoạ, kụ bọu ene i Barnabas dẹ̌duan Saulus nirolohẹ̌ pinanonda tatongka (roitẹ̌) ene su manga těmbonangu jamaatẹ̌.



 <<  Kisah Para Rasul 11 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran