Alkitab Mobile SABDA
[VER] : [SANGIR]     [PL]  [PB] 
 <<  Lukas 11 >> 

1Su sěnsul᷊e tempo i Yesus měkẹ̌kal᷊iomaneng su tampạ sěmpalang. Sarạeng nasueng kal᷊iomanenge tangu, sěngkatau wọu tal᷊oarang manga murit'E nẹ̌bera, "Mawu kěnang těntiroi i kami mẹ̌kal᷊iomaneng kerẹewe i Yohanes naněntiro manga murite měmpẹ̌kal᷊iomaneng."

2Tangu i Yesus něhengetang si sire, "Kereu i kamene měmpẹ̌kal᷊ioameng ute, pěmpẹ̌bera kere ini, 'Amang, i Kau e Ruata mang Sěmbaụ. Karimạko i Kau sẹ̌sěmbaěng dingangu lẹ̌adateng.

3Gělirengkon biah'i kami měllo-měllo kerẹewe ghẹ̌gausang i kami.

4Ampungeko kal᷊awọu rosang kami, batụu i kami lai mẹ̌ngẹ̌ngampung su taumata apan měmpẹ̌sẹ̌sal᷊a si kami. Dingangu abe wala i kami kailangengu pangangimang su tempong i kami sẹ̌sal᷊ukateng.'"

5Yesus něhengetang su manga murit'E, "Kereu piạ sěngkatau wọu tal᷊oarang kamene kụ makoạ sol᷊ong bal᷊en hapịe kẹ̌kal᷊oarane kụ mẹ̌berau, 'Hapị, měngědangko borotẹ̌ u těllum baụ,

6u piạko hapịku kạl᷊ěngange wuhu-wuhu rarangeng su wal᷊e kụ iạ e tawẹ u ipẹ̌sake si sie!'

7Kụ kereu hapị u nirěntaěngu ene sumimbang kere ini, wọu ral᷊ungu wal᷊ene, 'Abe pẹ̌taghal᷊i si siạ! Tukadẹ̌ seng nịpapal᷊e kụ i kami tahanạ kai seng mẹ̌tikị. Iạ tawe makawangung dingangu tawe makaghěllịu apa-apa si kau.'"

8"Mase kerea?" angkuěng i Yesus tuhụe. "Iạ maul᷊ị! Maningbe lai i kau hapịe, kai mang tawe mapulu i sie mẹ̌bangung dingangu měgěllịu apa-apa si kau. Kai ual᷊ingu i kau měngkate hanesẹ̌ mẹ̌dẹ̌dorong dingangu wěgawen mamea e ute maral᷊e mang mẹ̌bangung kụ mangonggọu apang gausangu.

9Kụ, Iạ mẹ̌bera si kamene: Pěmpẹ̌dorongke, tangu i kamene sarung onggol᷊ang; pěmpẹ̌deạ, kụ i kamene sarung makareạ; pěmpanengkohẹ̌ kụ tukadẹ̌ e sarung topẹěng.

10Ual᷊ingu i sai mẹ̌gausẹ̌ e sarung makatarimạ; i sai mědeạ sarung makahombang, dingangu i sai manengkelẹ̌ e sarung topẹěng.

11Sutal᷊oarang kamene, apa piạ i amang kụ mẹ̌gěllị u těmpu su anạ e, kereu i sie mẹ̌dorong kinạ?

12Arau měgěllịu wakunang kereu i sie mẹ̌dorong tělluhẹ̌?

13Maningbe i kamene ral᷊akị, i kamene masingkạ l᷊ai mẹ̌gěllị u apang mapia su anạu. Dumakelengbe lai i Amang su Sorga! I Sie sarung mangonggọ u Rohkẹ̌'E si sire apan mẹ̌gẹ̌gausẹ̌ si Sie!"

14Piạ su sahěllo, i Yesus mạnokol᷊u rohkẹ̌ dal᷊akị bọu sěngkatau mou. Sarạeng rohkẹ̌ dal᷊akị ene simẹ̌bang, tau e nanětạe nakawera. Lawọ taumata mangkewen měngkạherang,

15kaiso piạ u němpẹ̌bera, "I Sie makạpěnokol᷊u rohkẹ̌ dal᷊akị e ual᷊ingu kawasang Beelzebul těmbonangu rohkẹ̌ dal᷊akị e."

16Piạ lai i sire wal᷊ine kụ mapulu měmpěnangkạ si Yesus, kụ i sire mědẹ̌dorong tadeạu i Sie apẹ̌kẹ̌koạ sěmbaụ tanda makạl᷊aherang kere makoạ tatialang kai i Sie riměnta wọu anun Duata.

17Kai i Yesus masingkạu tiněnnan sire. Tangu i Sie něhengetang si sire, "Kereu piạ kararatuang sěmbaụ kụ napahiạ su ral᷊ungu pirang kamonaěng kụ mẹ̌dẹ̌daral᷊ai sěmbaụ su wal᷊ine ute kararatuang ene tawe tumei. Dingangu anạ u sěmbaụ kụ napahiạ-pahiạ ringangu lai mẹ̌dẹ̌daral᷊ai sěmbaụ su wal᷊ine sarung magholang.

18Kerene lai su ral᷊ungu kararatuangu setang; kereu piạ sěngkamonaěng měndokạ l᷊ai kamonaěnge wal᷊ine, ute kararatuang ene mambem mahaka. I kamene němpẹ̌bera u Iạ manokol᷊u rohkẹ̌ dal᷊akị ual᷊ingu kawasan Beelzebul.

19Kamageng kerene kai ringangu kawasang sai wue manga murit'u manokol᷊ẹ̌ rohkẹ̌ daral᷊akị e? Manga murit'u e sẹ̌sane napakal᷊ahẹ u i kamene kawe nẹ̌sal᷊a!

20Arawe Iạ e nanokol᷊u rohkẹ̌ dal᷊akị dingangu kawasang Duata kụ ene mangal᷊em Mawu Ruata e seng kạpěnětạe mẹ̌parenta sutal᷊oarang kamene.

21Kereu sěngkatau matoghasẹ̌ dingangu mangkewen něpapanganghidẹ̌ natimu mělẹ̌hapa wal᷊ene sẹ̌sane tangu kal᷊awọu rarotonge tawe mẹ̌kapura.

22Kai kereu piạ u sěngkatau limembong katoghase měndokạ dingangu mamatạ si sie, tangu tau limembong matoghasẹ̌ ene mangal᷊ạ patikụ aghidẹ̌ nạung pạngumbalaěngu taghuang bal᷊e e, mase mẹ̌papahiạu kal᷊awọu sạbarang ene.

23I sain bal᷊ine ringang-Ku, mamben těngadẹ̌ dumokạ Siạ, kụ i sain tawe mẹ̌sumbala si Siạ ute mambeng makagholang hal᷊ẹ̌-Ku!"

24"Kamagengu rohkẹ̌ dal᷊akị e maněntang u pẹ̌sěngkatau, rohkẹ̌ ene mẹ̌tẹ̌těllạmaeng su wanua mamara mang kạpẹ̌deạ e tampạ pangirul᷊eng, kaiso i sie mang makahombang. Ual᷊ingu ene i sie něberau, 'Iạ mẹ̌sul᷊ẹ e su wal᷊eku takụ nilintukang!'

25Su tempo i sie masongọe sene, sěngkahombange wal᷊e e nawurěsi ringangu maatorẹ̌.

26Mase i sie rimal᷊eng kụ němaringang i sire pitu rohkẹ̌ bal᷊ine kụ limembong karal᷊aị e wọ'i sie. Bọu e i sire nahunsuẹ̌ e su ral᷊ungu tau ene kụ něngkatanạ sene. Dingangu samurine kakakoạ u tau ene měngkate limembong dal᷊aị bọu kal᷊amona."

27Sarạeng i Yesus něhengetang kerene sěngkatau wawine wọu tal᷊oaran taumata l᷊awọ ene nẹ̌bera si Yesus, "Kariangkamang bawine kụ nipẹ̌pohiama ringangu nisusuang'U!"

28Arawe i Yesus simimbang, "Měngkai limembong makariangkamang i saing kụ mararingihẹ̌ su hengetangu Mawu ringangu měkẹ̌koạ ene!"

29Ene piạ e ghapaěngu taumata l᷊awọ e kapẹ̌tẹ̌tal᷊ipurunge si Yesus, i Sie naněpaseng hengetang'E angkuěng, "Kai apa karal᷊akị umatẹ̌ orasẹ̌ ini. I sire měgẹ̌gausẹ̌ tanda makạl᷊aherang tadeạu i sire měmpangimang si Siạ, kaiso i sire tawe onggotang sarang kạdiongeng sěmbaụ, kětạewen tandang kal᷊aherangu Nabi Yunus.

30Kerẹewe Nabi Yunus nạung nakoạ kal᷊aherang su taumatan soan Niniwe, kerene lai Ahus'u Taumata sarung makoạ sěmbaụ tandang kal᷊aherang baugu taumata su tempo ini.

31Su Ěllong Kiamatẹ̌ Datum banuan sěmběkan Timuhẹ̌ sarung mẹ̌bangung dingangkeweng manga taumatang orasẹ̌ ini kụ mangěnsilẹ̌ si sire. Kai mědeạu makakaringihẹ̌ kapanden Salomo e, Datu ene hinong dumal᷊eng marau kahěngang bọu pondol᷊'u dunia. Arawe ěndaung orasẹ̌ ini piạ l᷊ai limembong kasariane wọ'i Salomo.

32Su Ěllong Kiamatẹ̌ taumatan Niniwe sarung mẹ̌bangung sěngkakawangung dingangkewen taumatan orasẹ̌ ini kụ měngěnsilẹ̌ si sire, batụu tau Niniwe e němpẹ̌tobatẹ̌ bọu manga rosan sire piạ i Yunus e něnasa si sire. Kutẹu ěndaung sini e kai nạung piạ u limembong kasariane wọ'i Yunus."

33"Tawẹ apa taumata měndikọ sol᷊o mase takateng arau nilingkuwangu wěnsadẹ̌. I sie hinong maměllọu sol᷊o ene su pěnanol᷊oěng mẹ̌deạu apam mahunsuẹ̌ makasilowe tualagẹ̌.

34Mata e kai sol᷊om badang. Kereu matanu e mapia, ute kạguwạu wadangu e měngkawe matualagẹ̌. Arawe kereu matanu e marěndung ute kaguwạu wadangu e mal᷊aing marěndung.

35Ual᷊ingu ene pakapia wue, mạdiring tualagẹ̌ si kau e makoạ kararěndung.

36Kereu kạguwạu wadangu e matualagẹ̌ kụ tawẹu sarang sěmpalang marěndung, ute měngkatewe matiwatu sěngkakatualagẹ̌ mẹ̌sul᷊ungkewen kereu i kau kasaramengu tualag'u sol᷊o e."

37Sarạeng i Yesus nasuẹen hengetang'E, kutẹu sěngkatau Farisi něnotẹ̌ i Sie kumaěng su wal᷊ene. Tangu i Yesus rimangeng kụ kimaěng sene.

38Tau Farisi měngkate rimal᷊inaụ nakasilo si Yesus tawe manga nanguhasẹ̌ l᷊iman'E kal᷊imona, tụtuhụ tiahan agama.

39Ual᷊ingu ene Mawu e něhengetang si sie, "I kamene mang kahěngang tau Farisi nanarang manguhasẹ̌ l᷊ainumang dingangu tal᷊ẹ̌tugu lamạ, arawe su ral᷊ung i kamene kawe napenẹu pěngangahěbụ dingangu kararal᷊aị.

40I kamene kai wodo! Kụ kai wal᷊inewe Mawu Ruata ho nẹ̌koạ l᷊ikude ene mal᷊aing dal᷊unge?

41Kụ apan su ral᷊ungu l᷊ainumang dingangu kakěntul᷊ang ene e kai harusẹ̌ ionggọ i kamene su manga tau kasiang. Dingangu kakakoạ ene kěbị sarung makawurẹ̌si si kamene.

42Kaěngkěhang i kamene tau Farisi! I kamene mạngonggọu katahạpul᷊ong kapahiakeng bọu sasuang i kamene kere manga salasi ringangu walakama arau lai manga rampa wal᷊ine su Mawu Ruata e, arawe kaadilẹ̌ dingangu kakěndagẹ̌ su Mawu Ruata e lẹ̌lihiang i kamene. Sěmbal᷊iau kai ene hinone sěmpikang i kamene ringangu abe pamalan lai wal᷊ine.

43Kaěngkěhang i kamene tau Farisi! I kamene puluang kumaiang su tampạ kapiange su wal᷊eng pẹ̌kakal᷊iomanengang dingangu puluang tabeakeng su manga pasarẹ̌.

44Kaěngkěhang i kamene! I kamene mẹ̌sul᷊ungu lẹ̌bing tạu pẹ̌kiral᷊aěnge kụ lẹ̌l᷊indangu taumata ual᷊ingu ta kinahěnganeng."

45Piạ e sěngkatau mananěntirong agama nẹ̌bera si Yesus, "Tuang Guru, ual᷊ingu waweranu ene, i Tuang e mal᷊aing nakasamedẹ̌ si kami!"

46Mawu Yesus simimbang, "Kaěngkěhang i kamene lai, manga mananěntirong agama! I kamene měnẹ̌nuntụ manga hal᷊ẹ̌ masasẹ̌gadẹ̌ dingangu mělẹ̌lěngkangu atorang mawawěhạ, arawe i kamene hala mang tawe makatul᷊ung sarang manga kạdodọ-dodọ su apan tumatuhụe.

47Kaěngkěhang i kamene! I kamene měmpẹ̌kẹ̌koạ ěndụ u watung manga nabi, u mahunẹu mang nipateng manga i upung i kamene.

48Kụ i kamene hala nangaku u i kamene l᷊ẹ̌lahimpuluangu apan seng nikoạ u manga i upung i kamene; mambeng i sire němpamate manga nabi e kụ mang i kamene měmpẹ̌koạ ěndụ u watune.

49Kai ene hakịu Kapelesan Mawu Ruata e nẹ̌bera, 'Iạ sarung měndolohẹ̌ si sire manga nabi ringangu manga rarolohang-Ku; sěnggạ e sarung pateěng dingangu sěnggạe wue sarung tumbiagheng!'

50Mawu Ruata e nẹ̌koạ kerene e mědeạu taumata orasẹ̌ ini e ihukung ual᷊ingu pěmamate seng nikoạ su patikụ nabi rokeng pamamahẹ̌tang dunia,

51nanětạ bọu pěmamate si Habel sarạeweng pěmamate si Zakharia, kụ nariadi su wěllạ u pananěmbaěnge ringangu Wal᷊em Mawu Ruata. Pěmpangimangko: Taumatang orasẹ̌ ini mambeng ihukung ual᷊ingu kěbị ene.

52Kaěngkěhang i kamene manga mananěntirong agama! Kakunsịu mamuka tukad'u kasingkạ e mạdaresọ si kamene, arawe i kamene hala mạdiri měmpahunsuẹ̌ su ral᷊unge mědeạu makaěbạ kasingkạ ene. Su sěmběkane i kamene měngkate mẹ̌nahaghe taumata apạewen mapulu sumuẹ̌!"

53Ene, sarạeng i Yesus naněntangu tampạ ene, manga mananěntirong agama ringangu manga tau Farisi e němpẹ̌buheang maihạ si Yesus. Kụ i sire nanětạ e měngẹ̌ngal᷊ạ bera si Sie tadeạu i Sie mẹ̌bisarang kal᷊awọu sạbarang.

54Kụ su tempo ene i sire kapẹ̌pẹ̌patehe si Sie mapia-pia waugu pěnamekangu sal᷊a su apan manga wawera-Ne.



 <<  Lukas 11 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel