Alkitab Mobile SABDA
[VER] : [SANGIR]     [PL]  [PB] 
 <<  Lukas 14 >> 

1Su ěllon Sabatẹ̌ sěmbaụ i Yesus dimangeng kimaěng su wal᷊en sěngkatau těmbonangu tau Farisi. Sene tangu taumata e měngkatewe mẹ̌pẹ̌patehẹ̌ mapia-pia si Yesus.

2Tangu riměntạe su anun Yesus sěngkatau piạ sakịe solọ kụ laede ringangu limane simahěnụ.

3Mase Yesus nakiwal᷊o su manga mananěntiro agama ringangu manga tau Farisi apang ene sene, "Tuhụ těntirong agamang kitẹ, botonge ngae i kitẹ mapakapian taumata masakị su ěllon Sabatẹ̌ arau tala?"

4Manga mananěntiro agama ringangu manga tau Farisi e tawẹ kěndịe, mase i Yesus kimui tau e kụ napakapian sie, mase napakapul᷊ẹ i sie.

5Bọu e i Yesus něhengetang si sire, "Kereu piạ sěngkatau wọ'i kamene piạ anạ e arau sapine manawo su pahighi su ěllon Sabatẹ̌ apa i sie tawe lighạ měmatung dariọ arau sapi su ěllo ene lai?"

6Kaiso tawẹu sarang sěngkatau nakasimbahẹ̌ si Yesus mạanung hal᷊ẹ̌ ene.

7Mawu Yesus mạmanda si sire manga sake měngkai měmpạmile kakaianeng kapaelange. Ual᷊ingu ene i Sie naněntiro si sire kěbị.

8"Kereu i kamene ninotẹ̌ su sal᷊imbangu pẹ̌kakawing ute, abe kaiang su kadera kapiange. Madiring kibasị u kai piạu l᷊ai lẹ̌adateng limembong kau e ninotẹ̌,

9kụ taghuangu wal᷊e seng něnotẹ̌ si rua kawe humaung si kau ringangu mẹ̌bera, 'Mẹ̌dorong ampungu kakaianeng ini seng nisadia waug'u sake ramahi.' Tangu apạewe ghěguwạ meane hakịu i kau ringangu nasihasa katewe maiang sul᷊ikude.

10Batụu ene, kamagengu i kamene ikanotẹ̌, ute pěmpamile kakaianeng su l᷊ikude, tadeạu taghuangu wal᷊e sarung humaung kụ mẹ̌bera si kau, 'Hapị ěndaịko kaiang su kakaianeng seng nisadia.' Mageng kerene ute, i kamene adateng su těngong kal᷊awọu sake wal᷊ine.

11U i sai mětěngkarangẹ sarung iapakasanạ; isaịewen mětěngkasanạ, sarung iapakarangẹ."

12Mase angkuěng i Yesus su taghuangu wal᷊e, "Kamageng i kau měnotẹ̌ taumata mẹ̌sal᷊imbang ěllo mal᷊ětu arau hěbi ute, abe pẹ̌kui manga hapị u arau tuhangu arau anạ u sěmbaụ, lampungu makakalạ e. Kịbasịu i sie sarung měnotẹ̌ i kau l᷊ai kụ mageng kerene ute i kau kawal᷊isangu hal᷊ẹ̌ ene.

13Ene, kamagengu i kau mạmangung sal᷊iwang ute, pěnotẹ̌ u taumata kasiang, ponggọ, peosẹ̌, buta.

14I kau e sarung al᷊amateng, batụu i sire ene tawẹu sarung ipamal᷊isẹ̌ kapianu. Kapianu e sarung bal᷊isangu Mawu Ruata su tempong manga taumata apan mapapia e, ipẹ̌bangung kapia wọu papatene."

15Su tempọen sěngkatau wọuteng kimaěng sěngkakaěng dingang'E sene nakaringihẹ̌ko waweran Yesus, měbẹ̌berau, "Kariangkamang i saing kụkaěng sěngkakaěng dingangu Mawu Ruata, mạengu i Sie ruměnta kere sěngkatau Ratu!"

16Kutẹu i Yesus něhengetang su tau ene, "Su sěnsul᷊e tempo piạ sěngkatau namangung sal᷊iwang masaria kụ něnotẹ̌ taumata l᷊awọ.

17Sarạeng seng tempone manětạ e sal᷊iwang, tau e rimoloh'u ěllange nipaul᷊ị su taumata apan ninotẹ̌ e kụ nẹ̌bera, 'Sal᷊amate mahunděnta u kěbị seng nasadia!'

18Arawe i sire kěbị, sěngkatau-sěngkatau e nanětạ e nẹ̌dorong ampung. Humotonge nẹ̌bera su ěllange, 'Iạ kai wuhụe němělli ěntana, kụ mambeng harusẹ̌ dumal᷊eng mẹ̌kakělla. Ampunge wue iạ.'

19Sěngkatau ute wal᷊ine nẹ̌bera, 'Iạ kai wuhụe němělli sapi limam parẹ̌, kụ kai reng sal᷊ukateng manga sapi ene. Iạ mẹ̌dorongke ampung.'

20Sěngkatau ewe wal᷊ine mal᷊aing nẹ̌bera, 'Iạ wuhụe pẹ̌kakawing, kụ tawe makarěnta.'

21Ěllange ene napul᷊ẹ e kụ naul᷊ịeng hal᷊ẹ̌ ene su mawune. Ene, matimadu wal᷊e měngkate l᷊imangehẹ̌ kụ nẹ̌bera su ěllange, 'Dakọe pakasahawụ sol᷊ong manga ral᷊eng dingangu loronge su soa. Měngkate wawa tau kasiang, ponggọ, buta, ringangu tau peosẹ̌.'

22Bọu e ěllange nẹ̌bera, 'Mawu, parentang Mawu seng nịkakoạ, arawe tampạ bẹdang piạ loahe.'

23Tangu mawune nẹ̌bera, 'Dakọe sol᷊ong manga ral᷊eng gaghuwạ dingangu manga loronge su l᷊ikud'u soa, kụ mang pakaparingang apạhunsuẹ̌, mědeạu wal᷊eku e mapenẹ.

24Pẹ̌tahěndungko! Tawẹu sarang sěngkatau wọu tal᷊oarang manga sake apan seng ninotẹ̌ e makateěng sal᷊iwangku ini!'"

25Ene měngkate l᷊awọ-l᷊awọ taumata mạhundal᷊eng dingangkewen Yesus. I Yesus nẹ̌bilingke kụ něhengetang si sire,

26"Kereu i sain duměnta su anu-Ku, kutẹu kai limembong kakěndage si ninange, si amange, su kawinge, su manga anạ u sěmbaụ e ore lai batangenge, ute i sie tawe makoạ muritẹ̌-Ku.

27I sain tawe mamasaěng kuruisẹ̌ kụ tumol᷊e Siạ tawe mariadi muritẹ̌-Ku.

28Kereu sěngkatau wọ'i kamene mapulu mělanging candi, ute i sie reng maiang měndekeng kal᷊amona ongkose mědeạu i sie masingkạ měnsang doite makarating bue sarang maghanapẹ̌ arau tala.

29Kai kereu nal᷊ahẹ i sie ta makasue munarane, sěmbal᷊iau wawukune seng nịpapěllọ, kụ kěbị apang makạsilo munara ene sarung měmpẹ̌baheaun sie.

30I sire sarung měmpẹ̌bera, 'Ai, i anu ěndaị e nělanging candi, kutẹu i sie tawe makasue!'

31Kereu sěngkatau ratu piạ sordadone mapul᷊o hiwu su kataune, mapulu měmpẹ̌sekẹ u ratu wal᷊ine sordadone duam pul᷊o hiwu su kataune, nal᷊ahẹ u ratu ene sarung kumaiang mẹ̌sipirẹ̌ měnsang makarokạ bue pẹ̌sẹ̌seketang ene.

32Kereu i sie masingkạ u i sie tawe makaumal᷊ẹ̌ ute, pal᷊ịbe rokạ e reng marau, i sie sarung dumolohẹ̌ben darolohange apakiwal᷊on kaianengu pẹ̌darame."

33Pěngěnsueěnge i Yesus něhengetang, "Kerene lai ringangi kamene. Tawẹu sarang sěngkatau wọu tal᷊oarang kamene makoạ muritẹ̌-Ku e kereu i sie tawe manarakangu patikụ apan tẹ̌taghuanengu e."

34"Asinge apạewe mapia, kai kereu asinge malele, botonge ngae saụ mapěhadẹ̌?

35Sembeng tawẹ gunane lai, walạewe su ěntana arau ipělaụ pupukẹ̌ kụ katewe irěmmẹ. I sain piạ tul᷊ine, pẹ̌daringihẹ̌!"



 <<  Lukas 14 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran