1Su Wal᷊em Mawu e, i Yesus něhengkẹ u matane nakasilo makakalạe němpaměllọ u roitẹ̌ su ral᷊ungu peting sasěmba.
2I Sie nakasilo l᷊ai sěngkatau wawine wal᷊u kasiang nẹ̌tahong duang kal᷊ěpa roitẹ̌ tambaga.
3Mase i Yesus něhengetang, "Daringihẹ̌: tau wal᷊u ěndai e nẹ̌tahon sasěmba limembong kal᷊awọe wọu kěbịewe lai wal᷊ine.
4Batụu i sire kěbị e měngkai měmpẹ̌gẹ̌gěllị bọu tompẹ u arětạ i sire. Arawe wawine wal᷊u ěndaị e, manịeng tumanịu kasiang, kaiso i sie nangonggọu kěbị apan tẹ̌taghuanenge kụ gẹ̌gausang hala waụgu pẹ̌bawiahẹ̌."
5Piạ i sire mạhumbisara mạanung kereapa kapaele Bal᷊em Mawu nilěgahu watu maral᷊ěnggihẹ̌ dingangu manga sạbarang sasěmba su Ruata. Tangu i Yesus něhengetang si sire.
6"Kai sarung piạ tempone kěbị apang kinasilong kamene sarung matěnehẹ̌ kụ tawẹu sarang batu sěmbaụ ěndaị sini mạdal᷊ěnsung su tampạ e."
7I sire nakiwal᷊o si Yesus, "Tuang Guru, angerẹ ngae tamai ene mariadi? Kụ kai apạ e tatialane, watụ u kai sen tempone hal᷊ẹ̌ ene sarung mariadi?"
8I Yesus něhengetang, "Pakapapia wue kumbahangbe i kamene kaakal᷊eng. Lawọ taumata sarung mahunděnta ringangu areng-Ku, kapẹ̌berane seng, 'Iạ e i Sie!' ringangu 'Seng tempone.' Kaiso kumbahangbe i kamene tumol᷊e si sire.
9Abe lai kěngkatakụ kereu i kamene makaringihẹ̌ habar'u pẹ̌sasekẹ dingangu pẹ̌gaghuhaeng. Tamai ene harusẹ̌ mariadi kal᷊imona. Kaiso ene wal᷊inewe mangal᷊en seng tempone mẹ̌kiamatẹ̌."
10Bọu e i Yesus nanẹ̌paseng hengetang'E, angkuěng'E, "Umatẹ̌ sěmbaụ sarung mẹ̌sekẹ dumokạ umatẹ̌ bal᷊ine ringangu kararatuang sěmbaụ sarung dumokạ kararatuang bal᷊ine.
11Su apang tampạ sarung piạ linuhẹ̌ mal᷊aihạ dingangu karal᷊unusẹ̌ dingangu sahindạ suapan tampạ. Mase sarung mariadi manga apa makạl᷊ahiasẹ̌ dingangu makạtatakụ su l᷊angị.
12Kai kal᷊imonan patikụ ene nariadi, i kamene ute sarung isamẹ dingangu tingkaitang. I kamene sarung ihukung su manga wal᷊em pẹ̌kakal᷊iomanengang kụ itahungkụ. Dingangu i kamene sarung ipẹ̌těngom manga ratu ringangu manga měngangawasa ual᷊ingu i kamene kawe manga muritẹ̌-Ku.
13Kụ ene kai seng tempone si kamene tadeạu makapẹ̌habar'u Injil'u Ruata.
14Měngkate pakapaku su naung i kamene u i kamene tawe sarung ghuměnggangu apang isimbah'i kamene mẹ̌tahutěndạu watangeng.
15Iạ sẹ̌saku sarung piạ u takụ ipẹ̌bera ringangu sasal᷊ěntihọ tadeạu tawẹu manga sarang sěngkatau wọu manga rokạku makakarokạ arau mẹ̌děndilu apan niwerang kamene.
16I kamene sarung ipẹ̌binsị u ghaghurang, manga anạ u sěngkatau arau kahian manga ěgẹ arau manga hapị i kamene. Sěmbahageang bo'i kamene sarung pateěng i sire.
17I kamene sarung ipẹ̌binsị u kěbị taumata ual᷊ingu i kamene kawe muritẹ̌-Ku.
18Kaiso sarang utạ sěmbua wọu těmbọ i kamene e tawe sarung mailang.
19Kereu i kamene makakẹ̌dang dingangu makasabarẹ̌ ute i kamene sarung masal᷊amatẹ̌."
20"Kereu i kamene makasilọe Yerusalem mạdal᷊iwungu wuntuangu mẹ̌sasekẹ ute i kamene sarung masingkạ u soa ene tawẹ karěngụe lai sarung pakawinasa.
21Su tempo ene apang ene su Yudea e harusẹ̌be pahuntal᷊ang sol᷊ong bul᷊ude. I sire apan su ral᷊ungu soa harusẹ̌be paněntangu soa, kụ i sire apan sul᷊ikud'u soa e abe suẹ̌ su ral᷊ungu soa.
22Batụu ěllo-ěllo ene e kai 'Ěllo-ěllon Tilakehangu Papahang', mědeạu ual᷊ingu kakakoạ kerene ute mariadi wue kere seng nawohẹ su ral᷊ungu Winohẹ Susi.
23Kụ apạewe kereng katědụe su manga ěllo ene mihino su manga wawine piạ kapapia, ringangu mapạsusun dariọe! Banua ini e sarung kahombangengu sigěsạ masaria, dingangu Mawu e sarung měhukungu kawanua ini.
24Piạ sarung pateěngu peda, piạben lai sarung tawengang sarang banuan tau l᷊iwụ; ringangu i sain běgan Mawu e sarung měndal᷊inda Yerusalem sarang masue tempone nitantun Mawu e si sire."
25"Hẹ̌dowe su matangěllo, wul᷊ang dingangu su manga wituing sarung ikasilo manga tatiala. Su dunia e, manga umatẹ̌ e sarung měngkatakụ dingangu měmpẹ̌bingọ u ghal᷊ědụ dingangu wělladu sasị.
26Taumata e sarung matakụ tạ sihinge tumatěngo apa sarung mariadi su kasěllah'u dunia ini, watụ u manga mangawasa l᷊angị e sarung guminuẹ̌.
27Su tempo ene Ahus'u Taumata e sarung duměnta su ral᷊ungu winawa, piạ e kawasan'E, ringangu kawawantug'E masěllahẹ̌.
28Kamagengu kěbị ene manětạ e mariadi ute pěmpẹ̌pětịko mase ral᷊ingara, u měntěhang ini e i kamene sarung ipakasal᷊amatẹ̌."
29Mase i Yesus nẹ̌běken papinintu kere ini si sire, angkuěng'E, "Kakěllako kalun ara ringangu kal᷊awọu kakaluang bal᷊ine.
30Kereu manga towọe seng manětạ humětị ute i kamene masingkạu musungu pědisẹ̌ e seng masandigẹ̌.
31Kerene lai kereu i kamene makasilo manga hal᷊ẹ̌ ene mạdiadi, i kamene sarung masingkạ u Mawu Ruata seng tạ karěngụe mẹ̌parenta kere sěngkatau Ratu.
32Kasingkạko! Manga hal᷊ẹ̌ ene sarung mariadi kal᷊imonan taumata měbẹ̌biahẹ̌ orasẹ̌ ini e, kěbịe reng ta něngkapul᷊ẹ asal᷊ẹ̌.
33Langị dingangu dunia e sarung mapaghohẹ̌ arawe hengetang-Ku e ute tatapẹ̌ sarang marěngụ-děngụ."
34"Pěndiagạ batangengu, kumbahang sarang i kamene měngkate mětẹ̌tasibung sal᷊iwang kụ měmpanginung inumang makạbukang arau měngkate měsẹ̌sipir'u hal᷊ẹ̌ u pẹ̌bawiahẹ̌ hakịu i kamene tawe nasạdia su tempong ěllo ene sěngkianu ruměnta makạl᷊ahěkosẹ̌.
35U Ěllo ene sarung duměnta kere rarěntang tahatako su patikụ taumata su wowon dunia ini.
36Pakarariagạ dingangu pěmpẹ̌kẹ̌kal᷊iomaneng sidutu mẹ̌deạu i kamene mạtoghasẹ̌ mẹ̌tatětol᷊u patikụ hal᷊ẹ̌ mariadi kụ i kamene makararisị su těngong Ahus'u Taumata."
37I Yesus naněntiro su Wal᷊em Mawu su tempong ěllo ringangu hěbine i Sie tamai sarang Bukid'u Zaitun kụ nẹ̌tanạ sene.
38Apan mal᷊ukadẹ̌ kěbị taumata e mạhunděnta su Wal᷊em Mawu mẹ̌deạu rumaringihewe si Yesus maněntiro.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel