Alkitab Mobile SABDA
[VER] : [SANGIR]     [PL]  [PB] 
 <<  Matius 11 >> 

1Sarạeng i Yesus bọuten nangonggọu manga těntiron'E kerene su murit'E mapul᷊o dua e, i Sie naněntangken tampạ ene. I Sie tamai maněntiro ringangu mangeken hengetang'u Ruata su manga soa mararanine.

2I Yohanes Mananahani nạung kạtatahungkụe kai nakaringihẹ̌ kakakoạu munarang Kristus. Bọu e i sie něndoloh'u tumatol᷊ene pirang katau apakạkoạ sarang anung Yesus pakịbal᷊o, angkuěng,

3"I Tuang ngae sarung duměnta kere su kědom Mawu Ruata, arau i kami kai mangampal᷊ẹ̌ taumata wal᷊ine?"

4Mawu Yesus simimbang, "Pěmpẹ̌bal᷊ịe kụ paul᷊ị si Yohanes apang kinaringihẹ̌ dingangu kinasilong kamene:

5Tau wuta nakasilo, tau peosẹ̌ nakaral᷊eng, taumata piạ sakịe su pisị makạtatakụe nul᷊e; tau wengelẹ̌ nakaringihẹ̌, taumata nate e nẹ̌biahẹ̌ kapia, ringangu Injilẹ̌ e nihabarẹ̌ bue su taumata kasiang.

6Kariangkamang kụ i sain tawẹ banggilu mẹ̌binsị u Iạ e!"

7Samurin manga rarolohang i Yohanes ene naral᷊eng, tangu Mawu Yesus nanětạe něhengetang su taumata l᷊awọ mạanung Yohanes, angkuěng'E, "I kamene něngkakoạ sol᷊ong banua l᷊inggi e kai nẹ̌kakěllạe apa? Děmpugẹ̌ tẹ̌tiukangu anging?

8Kai a tamai nịkakěllaěng i kamene? Arau kai sěngkatau mẹ̌pẹ̌pakeang mal᷊ěnggihẹ̌ ngae? Taumata apam mẹ̌pẹ̌pakeang kerene ute kai mětẹ̌tanạ su wal᷊em mararatu.

9Unụe wue i kamene makoạ sol᷊ong banua l᷊inggi? Měmanda sěngkatau nabi tangu? Kahěngang bue, luhud'u něngalembo l᷊ai wọu sěngkatau nabi.

10Batụ u kai i Yohanes ene ilẹ̌habar'u Winohẹ Susi ini, 'Ini e kai rarolohangku, angkuěngu Mawu Ruata, Iạ dimoloh'i sie pěngal᷊imona wọ'i kamene tadeạu i sie mamuka ral᷊eng baug'i kamene.'

11Pẹ̌tahěndung! Su dunia ini tawẹ taumata limembo wọ'i Yohanes Mananahani. Maning kerene, i saing kakạdodokange su tal᷊oarang kawanuan Duata e limembowen gẹ̌guwạ wọ'i Yohanes.

12Dokeng bọ'i Yohanes mạngekeng habarẹ̌ sarangkeng orasẹ̌ ini e, kawanuan Duata e rẹ̌dokatengu taumata apam měngkai mạngal᷊ạ kawasa e ringangu wuntal᷊ẹ̌.

13Sarang darěntang Yohanes, kal᷊awọu titan Musa ringangu těntiron manga nabi e měnẹ̌něbal᷊'u apang hinom mariadi.

14Kụ kereu i kamene měmpangimang bue ute, i Yohanes ene kai i Elia, kụ darěntane seng nitěbal᷊ẹ̌.

15I sain piạ tul᷊ine ute pẹ̌daringihẹ̌!

16Takụ isihing suapa tangu taumatang orasẹ̌ ini e? I sire kai kere manga rariọ mạhungkaiang su pasarẹ̌. Sěnggal᷊ipoho e měmpẹ̌kẹ̌kui si sire wal᷊ine,

17'I kami mẹ̌kantarị u kakantarị makal᷊uasẹ̌ si kamene, kaiso i kamene mang tawẹu měmpẹ̌sal᷊ai! I kami e mẹ̌kantarịeweng kantarị u pěhampugang kaiso i kamene mang tawẹu mahunsangị!'

18I Yohanes e riměnta -- i sie nẹ̌puasa ringangu tawe nanginung anggorẹ̌; kụ taumata e němpẹ̌bera, 'I sie kai nikasetangeng!'

19Ěndaị Ahus'u Taumata e riměnta -- i Sie kimaěng dingangu něnginung; mase taumata e němpẹ̌bera, 'Kakělla tau ěndaị! Kombangeng, tahawukaneng, hapịu maghaghělle bea ringangu taumata warạdosa.' Maning kerene, kai katatahuěnnan Duata e limětạ bue wọu kal᷊awọu ual᷊ine."

20Bọu e Mawu Yesus nanětạe naněngkul᷊ẹ̌ kal᷊awọu soa, suapang i Sie kasauange mẹ̌koạ tanda makal᷊aherang. Batụ u taumata suapan soa ene tawe mapulu mẹ̌tobatẹ̌ bọu rosan sire.

21"Kạěngkěhang i kamene Korazim! Dingangu kaěngkěhang lai i kamene, Betsaida! U kamagengu kal᷊awọu tanda makạl᷊aherang nikoạe seng nariadi sutal᷊oarang kamene su Tirus dingangu Sidon, ute angkeěnge taumata apan sene sembem marěngụ němpẹ̌tobatẹ̌ bọu kal᷊awọu rosan sire ringangu němpẹ̌lutu mase němpanawuh'u awu su těmbọ i sire.

22Pẹ̌tahěndung, u su Ěllong Kiamatẹ̌, taumatan Tirus dingangu Sidon e limembowen kal᷊owọe ampungang u Ruata wọu i kamene!

23Ringangu i kamene Kapernaum! I hengkẹ sarang sorga ngae i kamene? Tala wue! Buạ i kamene ute sarung iwahung su naraka! U kawe mangạewe kal᷊awọu tanda makạl᷊aherange nikoạ sutal᷊oarang kamene e seng nikoạ l᷊ai su Sodom, ute Sodom e wẹ̌dangbe lai ene orasẹ̌ ini!

24Pẹ̌tahěndung! U su Ěllong Kiamatẹ̌ e tau Sodom sarungbe limembong kal᷊owọe ampungang u Ruata e wọu i kamene!"

25Su tempo ene Mawu Yesus někal᷊iomaneng, "O i Amang, Mawu mẹ̌ngẹ̌ngawasa l᷊angị ringangu dunia! Iạ makitarimakasẹ si Kau, u kěbị ini e kinal᷊irungu wọu mapapande ringangu matatahuěnna e, kụ nilahẹu su taumata rararodọ.

26Kụ kai ene nạung mětẹ̌tatahino si Amang."

27Mase Mawu Yesus něhengetang, "Patikụ sạbarange seng nisarakang i Amange si Siạ. Tawẹu makakiral᷊a Ahusẹ̌, sul᷊iung Amang. Tawẹu l᷊ai makakiral᷊a si Amang, sul᷊iung Ahusẹ̌, dingangu si sai-saịewe pělahekang i Amang kahiạeweng Ahusẹ̌ e.

28Děntako su anu-Ku i kamene kěbị apan něngkasaghedẹ̌ dingangu něngkawěhạ u wawawaěnge; Iạ e sarung mapangirul᷊eng kamene.

29Pěmpẹ̌tol᷊eko tita-Ku e dingangu pěmpangěndungko si Siạ e i kamene. U Iạ ini e kai masikome ringangu masanạ naung-Ku, kụ i kamene sarung makapěndang mal᷊unsemahẹ̌.

30U kal᷊awọu tita-Ku e makạl᷊uasẹ̌, dingangu wawawaěng Takụ pakipasaěng si kamene e mahaěng!"



 <<  Matius 11 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran