Alkitab Mobile SABDA
[VER] : [SANGIR]     [PL]  [PB] 
 <<  Matius 9 >> 

1Mawu Yesus simakẹ e su sakaeng, kụ liměbạe rano, kụ nẹ̌sul᷊e su soan'E.

2Paị sene taumata e němpanondạen tau nipeose su anun'E, rụdal᷊oka su těpihẹ̌. Tangu Mawu Yesus nakasilọe kasarian pangangimang i sire e, kụ i Sie něhengetangke su tau peosẹ̌ ene angkuěng, "Pakatarimạe naung u amang! Kal᷊awọu rosanu e seng niampungang."

3Manga mananětirong agama němpẹ̌bẹ̌bera su ral᷊ungu naung i sire angkuěng, "Tau ěndaịe kai mělẹ̌hodatẹ̌ Mawu Ruata e!"

4Mawu Yesus e masingkạu tiněnnan sire, kụ i Sie něhengetang, "Kai unụe i kamene měmpẹ̌tẹ̌tiněnna ral᷊akị?

5Sude něngalembon nẹ̌tatarang: mẹ̌berau, 'Dosanu e seng niampungang' arau, 'Pẹ̌bangungke, kụ dal᷊eng'?

6Arawe Iạ kai mapakasingkạ si kamene u su dunia ini e Ahus'u Taumata kai kawasa mangampung dosa." Tangu Mawu Yesus něhengetang su tau peosẹ̌ e, "Pẹ̌bangungke, sapuạe ral᷊okaěngu kụ kapul᷊ẹ e!"

7Tau peosẹ̌ e nẹ̌bangung dingangu napul᷊ẹ sarang bal᷊ene.

8Tangu taumata l᷊awọ nakasilọe hal᷊ẹ̌ ene, něngkatakụe kụ němpẹ̌dalọe Mawu Ruata watụ u seng nangonggọu kawasa kerene kasariane su taumata.

9Ene wọu e Mawu Yesus naněntangken soa ene. Kạpahundal᷊enge i Yesus nakasilọe maghaghělle bea sěngkatau mạiang su wal᷊em pěmamaehang bea e arenge i Matius, kụ něhengetang si sie, "Tol᷊eko Siạ!" Tangu i Matius nẹ̌buạe kụ timol᷊ẹ e Mawu Yesus.

10Piạ e Mawu Yesus kạkaěnge su wal᷊eng Matius, narěntạe lai i sire maghaghělle bea riọ natimu, ringangu apang lẹ̌ěnnaěngu taumata l᷊awọe kai taumata raral᷊aị, kụ nahungkaěng sěngkakaěng dingangu Mawu Yesus dingangkewelain manga murit'E.

11Piạ i sire tau Farisi nakasilo hal᷊ẹ̌ ene, nakiwal᷊ọe su manga murit'u Mawu Yesus, "Kawe unụe mananěntirong kamene kawe kụkaěng dingangu maghaghělle bea ringangu taumata warạdosa?"

12Mawu Yesus nakaringihẹ̌ kakiwal᷊on sire mase simimbang angkuěng, "Mal᷊ahuwekae tawe wahal᷊uas'u piạ mangangundang e, pianẹ e apan masasakị.

13Sẹ̌suieko měnsang apa mangal᷊eng ayet'u Winohẹ Susi ini: 'Iạ e kai měgẹ̌gausẹ̌, tatal᷊ěntụ, bal᷊inewe sasěmba binatang'. Batụ u Iạ diměnta wal᷊inewe kumui apam mal᷊aadilẹ̌ kaiso kawe apang barạdosa e."

14Bọu e manga tumatol᷊e si Yohanes Mananahani e němpẹ̌děnta su anum Mawu Yesus, kụ nakiwal᷊ou, "Kawe unụe i kami ringangu tau Farisi e měpẹ̌puasa wue, arawe manga murit'i Tuang kawe tala?"

15Mawu Yesus simimbang, "Kereapa ngae su tiněnnan kamene? Botonge sake su sal᷊iwangu pẹ̌kakawinge lumahunsusa kereu kaghiang esẹ e wědang ene sutal᷊oaran sire? Tantu tala wue! Kai hědowen su tempong kaghiang esẹ e al᷊akeng bọu anun sire. Kụ su tempo ene wuhụe i sire měmpẹ̌tělling.

16Tawẹ taumata měnděpel'u ririsẹ̌ buhu su lakụ těbe. Batụ u ririsẹ̌ ene kai měngahimběsọ dingangu makaghehẹ lakụ ene hakịu makakatapeng gehẹ e limembong kasariane.

17Kerene lai tawẹu makapěndal᷊ingu anggorẹ̌ buhue su ral᷊ungu wakuhẹ̌ pisị seng těbe. Batụ u wakuhẹ̌ ene e kai mạběse ringangu magholang, mase anggorẹ̌ e mạboso. Anggorẹ̌ buhue harusẹ̌ itaho su ral᷊ungu wakuhẹ̌ lai wuhu tadeạu i rẹ̌dua ene mapiawe kěbị."

18Piạ e Mawu Yesus kạpěhengetange su manga tumatol᷊e si Yohanes Měnanahani e, ute riměntạe sěngkatau těmbonang u wal᷊em pẹ̌kakal᷊iomanengang. I sie nẹ̌tumpěkuhẹ̌ su těngom Mawu Yesus dingangu nẹ̌bera, "Anạku wawine wuhu-wuhu nate. Kai karimạko i Tuang deng duměnta mědeạu makapěnělid'u l᷊iman'U e tadeạu i sie mẹ̌biahẹ̌ kapia."

19Ene Mawu Yesus dingangu manga murit'E měngkatewe nẹ̌buạ kụ timol᷊e si sie.

20Ene kạpahundal᷊enge kai piạ tau wawine kụ seng mapul᷊o dua su taunge karěngụe masakị dẹ̌dal᷊engangu raha, himaung si Yesus wọu l᷊ikude. I sie mětẹ̌tiněnna u, "Manịeng kětạeng manenggehẹ̌ kakingkaeng'E, iạ e mang sarung mapia." Mase i sie nanenggehe humbung kakingkaengu Mawu Yesus.

21(9:20)

22Su orasẹ̌ ene lai Mawu Yesus nẹ̌bihụe kụ nakasilo si sie, kụ nẹ̌bera u, "Pakatarimạ bue inang! Ual᷊ingu pangangimangu e nakapia si kau!" Ene tau wawine e nul᷊ẹ e wọu orasẹ̌ ene.

23Bọu e Mawu Yesus narangengke su wal᷊en těmbonang u wal᷊em pẹ̌kakal᷊iomanengange. Sarạeng i Sie nakasilo měmamusikẹ̌ u pěhampugang dingangu taumata l᷊awọ měmpẹ̌gẹ̌ganohạe,

24i Sie něhengetang si sire, "Sẹ̌bangko kěbị i kamene! Dariọ ini e tawe nate; i sie kětạeng mětẹ̌tikị." I sire kěbị němpěheghesẹ̌ Mawu Yesus.

25Kụ sarạeng taumata l᷊awọe nahunsẹ̌bang, tangu i Sie simuẹ̌ e su ral᷊ungu kamar'u rariọ e, mase nangumpaedẹ̌ limane. Tangu rariọ e nẹ̌bangungke.

26Habarẹ̌ ene e nasěsahe su kaguwạu wanua ene.

27Kutẹu, sarạeng i Yesus dimal᷊eng bọu ene, i Sie kai niwatukangu tau wuta ruang katau kapẹ̌kuine angkuěng, "Tal᷊ěntụkong kandua e Ahus'i Daud!"

28Sarạeng i Yesus simuẹ̌ su wal᷊e, tau wuta rarua e himaungke si Sie. Ene i Yesus nakiwal᷊ọe si rẹ̌dua, "I rua mangimang u Iạ makakaul᷊ewen dua wọu sakịe?" "Mangimang Tuang!" angkuěng i rẹ̌dua.

29Mase Mawu Yesus nanenggehe matan dẹ̌dua apid'u něhengetang, "Ual᷊ingu i rua mangimang, ute kariadịe kere lẹ̌harapeng i rua."

30Tangu i rẹ̌dua e někěllạe. Ene Mawu Yesus kai nẹ̌sẹ̌ding masěga-sěgadẹ̌ u kumbahang měhabar'u hal᷊ẹ̌ ene si sai-sai.

31Kaiso i rẹ̌dua e mang nahundal᷊eng nẹ̌dal᷊ahabar'u Mawu Yesus su kạguwạu wanua ene.

32Piạ i rẹ̌dua kạpahul᷊intụe, tangu piạko i anu mou nisawelangu rohkẹ̌ dal᷊akị niěntudẹ̌ su anung Yesus.

33Mawu Yesus nanokol᷊eng rohkẹ̌ dal᷊akị e, kụ i anu mou e nakawerạe. Taumata l᷊awọe něngkaherangke ringangu němpẹ̌bera u, "Kakakoạ kere ini e tawe kinasilo sarang sěnsul᷊e su Israel e!"

34Kai tau Farisi e němpẹ̌bera u, "kai těmbonang u rohkẹ̌ dal᷊akị e nangonggọu kawasa si Sie mẹ̌deạu manokol᷊ẹ̌ manga rohkẹ̌ dal᷊akị e."

35Kerene raral᷊engu Mawu Yesus bọu soa sěmbaụ sarang soa wal᷊ine, wọu kampong sěmbaụ sarang kampong bal᷊ine. I Sie mạněntiro su manga wal᷊em pẹ̌kakal᷊iomanengang, dingangu mělẹ̌habar'u Injilẹ̌ mạanun kararatuang u Mawu. I Sie mapakạpian taumata wọu kal᷊awọu haghin sakị dingangu kurangu wadang.

36Ene Mawu Yesus tụtal᷊ěntụ i sire, watụ u i sire měngkatewe nionganenge ringangu tawe makapẹ̌kapura, mẹ̌sul᷊ungkewen domba tạ měndal᷊ukade.

37Kụ i Yesus něhengetang su manga murit'E, "Paměnsakenge mal᷊awọ bue, arawe měmaměnsạe kawe mahal᷊i.

38Tangu pẹ̌dorongke su taghuangu waelẹ̌ e tadeạu měndoloh'u mamaměnsạ ipaměnsạ."



 <<  Matius 9 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran