1Bọu tampạ ene, Mawu Yesus napul᷊ẹ sěngkakapul᷊ẹ dingangu manga murit'E sol᷊ong soan sire.
2Kụ su ěllon Sabatẹ̌, i Sie nanětạe naněntiro su wal᷊em pẹ̌kakal᷊iomanengang. Sene kai piạ taumata mal᷊awọ. Ene i sire nakaringihe těntiron Mawu Yesus, i sire mangkewen němpẹ̌dal᷊inaụ. I sire němpẹ̌bera, "Kai wọu apa tau ěndaị nakaěbạ kěbị tamai ene? Kai kasingkạ kereapa si Sie? Kai kereapa i Sie měkoạ karal᷊inaụ?
3Karạ i Sie kawe basẹ̌ u kalu, anạ i Maria, kụ tuhang i Yakobus, i Yoses, i Yudas dingangi Simon? Ore, manga wawinene mal᷊aing měmpẹ̌tẹ̌tanạ sini." Ual᷊ingu ene i sire tawe něnarimạ i Sie.
4Mase Mawu Yesus něhengetangke si sire, "Sěngkatau nabi e lẹ̌adateng suapan tampạ tabeạu katewe su wanuane ringangu sutal᷊oarang anạ u sěmbaụ e ringangu walage."
5Kụ sene Mawu Yesus tawe nakapěkoạ munara makạdal᷊inaụ tabeạu katewe napakapian masasakị, pirang katau ringangu naněllid'u l᷊imane si sire.
6I Sie naral᷊ingung sire, kawe tawe mangimang. Bọu e Mawu Yesus limuhu manga kampong mạngěllikụe kạpaněntirone.
7I Sie kimui manga murit'E mapul᷊o dua e, mase rimoloh'i sire pẹ̌tahạduang katau kụ nionggotangu kawasa tadeạu i sire makapěnokol᷊ẹ̌ manga rohkẹ̌ dal᷊aị e.
8I Sie nẹ̌gěllịu těntiro kere ini si sire, "Kumbahang mẹ̌bawa manga apa-apa su raral᷊engang i kamene, tabeạu katewe tẹ̌king. Kumbahang měmpẹ̌bawa kaěng arau kawih'u siděka, arau roitẹ̌.
9Pěmpẹ̌sasapatu wue, kai manịeng tawe mẹ̌bawa laahusẹ̌ duam parẹ̌."
10I Sie mal᷊aing něhengetang, "Kereu i kamene rumangeng su wal᷊e sěmbaụ, ute katanạe sene sarang i kamene maněntangu soa ene.
11Kai kereu i kamene mahumpạe su tampạ sěmbaụ, kụ i sire sene tawe manarimạ dingangu tawe rumaringihẹ̌ si kamene, ute těntangke wanua ene. Kụ tontongko awul᷊ẹ̌ bọu laed'i kamene makoạ kere sasahidi si sire!"
12Tangu manga murit'u Mawu Yesus i sire mapul᷊o dua e nahundal᷊engke. I sire rimal᷊eng němpẹ̌kakekeng habarẹ̌ u taumata e apětẹ̌tobatẹ̌ bọu kal᷊awọu rosane.
13Manga murit'u Mawu Yesus e němpanokol᷊ẹ̌ kal᷊awọu manga rohkẹ̌ dal᷊aịe, namuhang lanang zaitun su masasakị, dingangu niapakaul᷊en sire.
14Manga habarẹ̌ mạanung kal᷊awọu apan seng nariadi kinaringih'u Ratu i Herodes, batụu arengu Mawu Yesus e seng timeleng suapan tampạ. Piạ taumata nẹ̌bera u, "i Yohanes Mananahani e seng nẹ̌biahẹ̌ kạpia! Kai ene hakịu i Sie piạ kawasane mẹ̌koạ karal᷊inaụ tamai ene."
15Arawe i sire wal᷊ine e měbẹ̌bera u, "i Sie kai i Elia." Piạ l᷊ai měbẹ̌bera u, i Sie kai nabi, mẹ̌sul᷊ungu sěngkatau nabi wọu tal᷊oarang tempo kal᷊imona.
16Piạ e i Herodes nakaringihẹ̌ ene, i sie nẹ̌bera u, "Mang kahěngangu ini e kai i Yohanes Mananahani kụ kạngerẹ e seng takụ pakịbusạ těmbọe. Ini i sie kai seng nẹ̌biahẹ̌ kapia!"
17Batụu kal᷊imonang ene, i Herodes nạung seng nangoro taumata piněnamẹ si Yohanes, kụ pinakitahungkụ. I Herodes nẹ̌koạ kerene ual᷊ingu i Herodias kawingu anạ u sěmbaụ e hala i Filipus. Batụu i Herodes kai seng nẹ̌kapapuěng dingangi Herodias,
18kụ su hal᷊ẹ̌ ene tangu i Yohanes kai seng piran sul᷊e měbẹ̌bera si Herodes kere ini, "Tawe wotonge i kau mẹ̌kapapuěng kawingu anạ u sěmbaụ u ene!"
19Kai ene sungkal᷊ene hakịu i Herodias nạung nangune si Yohanes kụ mapulu měmate si Yohanes, kai i sie tawe nakakoạ hal᷊ẹ̌ ene, batụu sẹ̌sahagheěng i Herodes.
20Batụu i Herodes kai seng něndoloh'u taumata pẹ̌děndiagạ pakapia-pia si Yohanes su tahungkụ, ual᷊ingu i sie kai mạtakụ i Yohanes. I sie masingkạu i Yohanes kai sěngkatau taumata naunge mapia ringangu matul᷊idẹ̌ kụ nidaroloh'u Mawu Ruata. Kụ kamageng i Yohanes mẹ̌bisara ute, i Herodes mal᷊aing puluang dumaringihẹ̌, maning i sie ikẹ̌kal᷊ipomponge.
21Pangěnsueěnge i Herodias nakaẹ̌bạe loahe su ěllom pẹ̌tatahěndungangu karariading Herodes. Su tempo ene i Herodes namangung sal᷊iwangu kěbị wẹ̌batone, těmbonangu manga mẹ̌sasekẹ dingangu manga matatěllangu wanuang Galilea.
22Su sal᷊iwang ene, anạ i Herodias mahuala taraịe simuẹ̌ nẹ̌sal᷊ai, kụ pẹ̌sasal᷊aine měngkai nakal᷊ahimpulu naung i Herodes dingangkewelai manga sakene. Tangu i Herodes nẹ̌berạe su rariọ mahuala ene, "I kau e mẹ̌tonengu a, pěhabare! Iạ e sarung měngonggọu ene si kau!"
23Mase i Herodes nẹ̌kědo su rariọ mahuala ene apid'u piạ salune. I Herodes nẹ̌berau, "Baẹbe apa rorongangue mang sarung takụ ionggọ, ore lai maning sěmbẹ̌ka wọu wanua pẹ̌parentaěngku e!"
24Tangu rariọ mahuala ene simẹ̌bangke kụ nakiwal᷊o si ninange, "Inang, apạ e kapiange takụ dorongang?" I ninange simimbang, "Pẹ̌dorongke těmbọ i Yohanes Měnanahani."
25Dariọ mahuala e měngkatewe lighạ nẹ̌sul᷊e sol᷊ong anung Herodes kụ nẹ̌bera, "Iạ mẹ̌dorong těmbọ i Yohanes Měnanahani kụ onggọ si siạ su orasẹ̌ ini lai ku taho su baki!"
26Sarang nakaringihẹ̌ dorong ene, tangu i Herodes měngkatewe apa masusa-susa naung e. Kaiso, i sie mang tawe makakoạ mangilěmmụ u rorong ene, ual᷊ingu i sie kai seng nẹ̌salu su těngon manga sakene.
27Kụ i sie měngkatewe něhanggosẹ̌ dimoloh'u sěngkatau l᷊ukade apẹ̌ngal᷊ạ těmbọ i Yohanes Měnanahani e. Tangu lukadẹ̌ ene simuẹ̌ e su tahungkụ, mase namusạ těmbọ i Yohanes.
28Bọu ene i sie nẹ̌bawa těmbọ ene su baki kụ nitẹ̌gone su rariọ bawine ene. Mase rariọ bawine ene saụ něnogor'u těmbọ ene si ninang e.
29Bọu e manga murit'i Yohanes nakaringihẹ̌ hal᷊ẹ̌ ene, i sire nahunděntạe němpangal᷊ạ maieti Yohanes mase nilẹ̌bing.
30Manga rarolohang kụ niroloh'u Mawu Yesus e němpẹ̌sul᷊e kapia kụ němpẹ̌komol᷊ẹ̌ dingangu Mawu Yesus. I sire němpẹ̌běke si Sie patikụewe apan seng nikoạ dingangu nitěntiron sire.
31Měngkai apa mal᷊awọ taumata měngkasongo ringangu měngkapul᷊ẹ, hakịu kal᷊ingung kumaěnge Mawu Yesus dingangu manga muritẹ̌ e tawẹ loahe. Tangu Mawu Yesus něhengetang su manga murit'E, "Bọete i kitẹ sol᷊ong tampạ marěmasẹ̌ mẹ̌těngkatěntani i kitẹ hala, tadeạu i kamene reng makapangirol᷊o kadodọ tempo."
32Tangu i sire němpẹ̌buạ e ringangu sakaeng sol᷊ong tampạ marěmasẹ̌.
33Kutẹu kai lawọ taumata seng nakasilo si sire němpaněntangu tampạ ene, kụ masingkạu i sai wue i sire. Kụ bọu kěbị soa su wanua ene, i sire měngkatewe mạhuntal᷊ang bọu rul᷊unge měmpẹ̌ngal᷊imona Mawu Yesus dingangu manga murit'E.
34Ene, Mawu Yesus tụtumpạe wọu sakaeng, i Sie nakasilo taumata lawọ. I Sie timal᷊ěntụ i sire, ual᷊ingu i sire kai kere domba tạ měral᷊ukade. Tangu i Sie nanětạe naněntirong hal᷊ẹ̌ lawọ si sire.
35Ene nawawěllọe, tangu manga murit'u Mawu Yesus němpẹ̌berạe si Sie, "Seng masarạ mahěbi, kutẹu tampạ ini e kawe maghea.
36Mapiawe i Tuang pěndoloh'i sire ini e aparal᷊eng, tadeạu i sire makawelliwe kaěng su manga weọ e arau manga kampong apan mạngělikụ ini e."
37Kai Mawu Yesus e simimbang, "I kamene e pěgěllị kaěng i sire." "Hu, kai i kami harusẹ̌ dumal᷊eng mamělli borotẹ̌ arẹ̌gan doitẹ̌ sal᷊aka dua hasụ su kal᷊ěpane waug'u kaěng i sire ini e?" kerene angkuěngu manga murit'u Mawu Yesus e.
38Mase Mawu Yesus nakiwal᷊ọ e, "Kai pirang baụ borotẹ̌ si kamene? Kěnangko pěmpẹ̌kakělla." Bọuten i sire němpẹ̌kakělla, ute i sire němpẹ̌bera u, "Piạ borotẹ̌ limambaụ dingangu piạ lai kinạ duambua."
39Mase Mawu Yesus nangoro si sire kěbị e apạkaiang pěkẹ̌kamonaěng su rěmpugẹ̌ melong.
40I sire měngkate nahungkaiang němpẹ̌kamonaěng. Kụ piạ u pẹ̌tahạ mahasụ, dingangu piạ l᷊ai pẹ̌tahạ l᷊imam pul᷊o su kataune pẹ̌sěngkamonaěng.
41Bọu ene Mawu Yesus něngal᷊ạ e borotẹ̌ limambaụ dingangu kinạ duambua ene, mase rimal᷊ingara sol᷊ong langị kụ nakitarimakasẹ su Mawu Ruata. Bọu ene, i Sie nangangompeng borotẹ̌ ene ringangu l᷊iman'E kụ nionggọ e su manga murit'E pakipahiạ su taumata l᷊awọ ene. Kụ kinạ duambua ene nipẹ̌papahiạ l᷊ai si sire kěbị.
42Tangu i sire nahungkaěngke sarang něngkal᷊aedẹ̌.
43Bọu ene lěmbeng kaěng e nịkakomol᷊u manga murit'u Mawu Yesus -- kal᷊awọe mapul᷊o dua su luwene napenẹ-penẹ.
44Kụ kal᷊awọu manga esẹ apan nahungkaěng borotẹ̌ e nạung piạu manga lima hiwu su kataune.
45Bọu e Mawu Yesus měngkatewe rimoloh'u manga murit'E nipẹ̌sakaeng piněngal᷊imona si Sie sol᷊ong Betsaida paị sěmběkan dano, arawe i Sie reng mạpakapul᷊ẹ u taumata lawọ e.
46Sarạeng bọu nẹ̌katạu taumata l᷊awọ e, Mawu Yesus simaka sol᷊ong bul᷊ude tadeạu mẹ̌kal᷊iomaneng.
47Ene nahěbi e, sakaengu manga murit'E ene seng su tal᷊oaran dano, arawe Mawu Yesus e wẹ̌dang su rul᷊unge.
48I Sie nakasilọete si sire měngkate marasai mẹ̌děndalung sakaenge watụ u somahẹ̌. Ual᷊ingu ene, mangạe su wěllạu pukul᷊ẹ̌ tatěllu ringangu pukul᷊ẹ̌ ěnnung mal᷊ukadẹ̌, i Sie němatụ si sire kụ dimal᷊eng su wowong akẹ. Kụ i Sie měngkate rimal᷊eng mẹ̌sul᷊ungu lumiu si sire.
49Kai sarạeng i sire nakasilo si Sie rụdal᷊eng su wowon akẹ e, ute i sire mạngiral᷊ingu i Sie kai himukudẹ̌,
50hakịu i sire němpẹ̌kiạ u katatakụ. U kai i sire kěbị e nakasilo si Sie kụ i sire něngkawintogẹ̌. Kai Mawu Yesus e lighạ namisara si sire, "Pakarěmmasẹ̌ko! Iạ e kai i Yesus. Abe kěngkatakụ!"
51Mase i Sie simakẹ e su sakaeng i sire, kụ anginge nal᷊ědạ e. Manga murit'E mangkewen dimal᷊inaụ tawẹ sihinge.
52Karal᷊inaụ su piạ borotẹ̌ limambaụ e, wědang ta nakạpuko pangangimangi sire. Mawěhạ baug'i sire makahěngang.
53Sarạeng narakị su sěmběkan dano e, i sire němal᷊ango su apengu Genesaret.
54Lěpase i sire natumpa wọu sakaenge, i sire nakakiral᷊a u narěntae kawe Mawu Yesus.
55Mase i sire měngkatewe nẹ̌tatal᷊ang suapang kạguwạu weọe ene, kụ nanětạe nanondan masasakị su těpihẹ̌ sol᷊ong anum Mawu Yesus. Kereu i sire makaringihẹ̌ u Mawu Yesus kai ene su tampạ sěmbaụ, i sire tamai manondang masasakị sene.
56Balạewe Mawu Yesus měnsang -- su weọ e sude su kampong, su soane arau su wawurasenge -- sene i sire mang duměnta maměllọu masasakịe su tal᷊uahe. Mase i sire měmpẹ̌dorong tadeạu masasakịe rembeng ipakawala měmpanenggehẹ̌ kakingkaenge manịeng tumbạu humbune. Kěbị apan němpanenggehẹ̌ e, něngkapia.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan