Alkitab Mobile SABDA
[VER] : [SANGIR]     [PL]  [PB] 
 <<  Markus 9 >> 

1"Kasingkạko!" angkuěngu Mawu Yesus. "Bọu tal᷊oarang kamene sini e piạ u tawe mate, těntal᷊ang deng ta nakạsilo Mawu Ruata nẹ̌parenta ringangu kawasa!"

2Ěnnungu ěllo samuring ene Mawu Yesus němaringangi Petrus dingangi Yakobus dẹ̌duang Yohanes tuarine, nẹ̌těngkatěntani sol᷊ong bul᷊ude sěmbaụ marangẹ. Kutẹu su pandaěng i sire Mawu Yesus e kai nẹ̌bal᷊ui ghahịe.

3Pakeange nẹ̌těngkawira kụkerong. Tawẹu sarang sěngkatau tahaunsạu dunia ini e kụ makawurẹ̌si kerene kawirane.

4Bọu e i sire těllu manga murit'E nakasilo Mawu Yesus mạhumbisara ringangi Elia rẹ̌duan Musa.

5Tangu i Petrus měngkatewe nẹ̌bera su Mawu Yesus, "Tuang Guru, kai apạe kapia su tampạ ini. Mapiawe i kami měndarisị selo tatěllu: sěmbaụ baug'i Tuang, sěmbaụ baug'i Musa, dingangu sěmbaụ lai e waug'i Elia."

6Tuhụ hinone i Petrus e wẹ̌ga wue měnsang apa ipẹ̌berane, batụu i sie ringangu ringange rarua e kai su katatakutang tạ sihinge.

7Bọu e piạ binawa něhěmbung si sire kụ bọu ral᷊ungu winawa ene kinaringihe tingihẹ̌ měbẹ̌berau, "Ini e kai Ahusẹ̌-Ku ikẹ̌kěndagẹ̌. Pěmpẹ̌daringihẹ̌ si Sie!"

8Masahawụ-sahawụ i sire měkẹ̌kakělla su kaihi arau koaneng i sire, kai mang tawẹu sarang sěngkatau kinasilo ringangi sire sene, sul᷊iun Mawu Yesus sẹ̌sane.

9Tangu piạ e i sire mạhunděsung bọu wul᷊udẹ̌, i Sie měgẹ̌gěllịu ingate si sire u, "Abe pěmpẹ̌běke su sarang sěngkatau apang kinasilong kamene těntal᷊ang Ahus'u Taumata e reng tawe nipẹ̌bangung bọu papatene."

10I sire mang mẹ̌tẹ̌tahěndung tatanata ene, kai su tal᷊oaran sire hala e, nanětạ e měkẹ̌kakereapa měnsang apa timona'm Mawu Yesus su "mapẹ̌bangung kapia wọu papate".

11Tangu i sire nakiwal᷊o si Sie, "Kawe unụe manga mananěntirong agama e měmpẹ̌bẹ̌bera u, i Elia e harusẹ̌ duměnta kal᷊imona?"

12Mawu Yesus simimbang, "I Elia e mambeng harusẹ̌ duměnta kal᷊amona e tadeạu mapěnạdiang kal᷊awọu kěbị e. Kai kereapa wue ngae Ahus'u Taumata? Kawe unụe su Winohẹ Susi e mạbawohẹ u i Sie sarung mẹ̌tatahangu sunsara l᷊awọ dingangu hinakanengu taumata e?

13Arawe Iạ maul᷊ị si kamene: i Elia e seng diměnta, kụ i sire němpẹ̌koạ si sie tuhụewe kapulun sire. Ene nẹ̌tatahino ringangu mạbawohẹ su Winohẹ Susi mạanun batangenge."

14Piạ e Mawu Yesus dingangi sire těllu murit'E narěnta kạpia sutal᷊oaran manga muritẹ̌ bal᷊inẹ e, i sire nakasilo taumata l᷊awọ sene. Mananěntirong agama pirang katau měmpẹ̌dẹ̌darendehẹ̌ dingangu manga murit'u Mawu Yesus e.

15Lěpasewe taumata l᷊awọ e nakasilo Mawu Yesus, i sire měngkatewe rimal᷊inaụ, mase nahuntal᷊ang němpaněnsomahẹ̌ si Sie.

16"Kai apạe ipědẹ̌darendeh'i kamene ringangu manga mananěntirong agama e?" angkuěngu Mawu Yesus su manga murit'E.

17Sěngkatau wọu tal᷊oaran taumata l᷊awọ e simimbang, "Tuang Guru, iạ kai mạngěntud'u anạku si Tuang. I sie kai němou ual᷊ingu niwal᷊iuangu rohkẹ̌ dal᷊akisẹ̌.

18Kamagengu i sie sampokang u rohkẹ̌ ene ute wadange ipětẹ̌těngkawěbahẹ̌ su ěntana, mohonge mẹ̌nẹ̌něbu, isine mẹ̌kẹ̌karerong, dingangu kạguwạu wadange mạtětogẹ̌. Iạ mẹ̌dorong su manga murit'i Tuang pěněnokol᷊u rohkẹ̌ dal᷊akị ene, kai i sire mang tawe nakapẹ̌koa ene."

19Tangu Mawu Yesus něhengetang si sire, "Balinewe mal᷊ongkọ i kamene ini e! I kamene e mambeng kahěngang-hěngang taumata ta měmpěngangimang. Delaing kạděngụe Iạ mẹ̌tanạ dingangi kamene dingangu mẹ̌kakědang ual᷊ingu i kamene? Bawạe rariọ ene ramahi!"

20I sire němpangěntuden dariọ e su anum Mawu Yesus. Lẹ̌pasewe rohkẹ̌ dal᷊akịe nakasilọe Mawu Yesus, i sie napakatẹ̌tog'u wadangu rariọ e, hakịu rariọ e nawatang kụ nẹ̌paral᷊unggi su ěntana. Mohonge piạ sẹ̌bune.

21Mase Mawu Yesus nakiwal᷊o si amangu rariọ e, "Seng kạděngụe i sie kere ini?" "Dongkeng i sie wẹ̌dang kadodọ!" angkuěng i amange.

22"Seng masau rohkẹ̌ dal᷊akịe mẹ̌deạu měmate si sie, mangondol᷊'i sie sarang dal᷊ungu putung arau sarang dal᷊ungu akẹ. Kai kereu i Tuang e wotonge makatul᷊ung, ute karimạko i Tuang e sadia tumal᷊ěntụ i kami ringangu mẹ̌tul᷊ung i kami e!"

23"Apa ungkuěngu? Kereu i Tuang botonge?" angkuěngu Mawu Yesus, "Patikụe wotonge, asal᷊eweng taumata e mangimang!"

24I Amangu rariọ e apidu nẹ̌kiạ, "Mawu, iạ e mạngimang, kaiso pangangimangkue kai lome. Tul᷊ungko iạ e tadeạu pangangimangku e mahuntinamba!"

25Ene Mawu Yesus nakasilou taumata lawọ e nanětạe riměnta němpẹ̌dahěmbung, ute i Sie něnokol᷊u rohkẹ̌ dal᷊akị ene nipẹ̌beraěng u, "Rohkẹ̌ bengelẹ̌ dingangu mou, Iạ e mẹ̌parenta si kau, sẹ̌bangke wọu rariọ ini kụ kumbahang-bahang sumuẹ̌ kapia su ral᷊unge!"

26Tangu rohkẹ̌ dal᷊akị e měngkatewe nẹ̌pal᷊ehe mase nipẹ̌kahimběsọ u wadangu rariọ e, bọu e simẹ̌bang bọu rariọ ene. Dariọ e pandaěng seng mẹ̌sul᷊ungu kasuang hakịu kal᷊awokange taumata e němpẹ̌berau, "I sie seng nate!"

27Kai Mawu Yesus měngkatewe něngumpaedẹ̌ l᷊imane kụ nẹ̌tul᷊ungi sie němangung. Kụ anạe lai nẹ̌bangung.

28Ene, sarạeng Mawu Yesus seng su wal᷊e, manga murit'E němpẹ̌haungke těntani su anun'E kụ nakiwal᷊o, "Kawe unụe i kami ta nakatokol᷊ẹ̌ rohkẹ̌ dal᷊akị ene?"

29Mawu Yesus simimbang, "Rohkẹ̌ dal᷊akị kerene tawe ikatokol᷊ẹ̌ baebe koateng kereapa tabeạu katewe ringangu kal᷊iomaneng."

30Mawu Yesus dingangu manga murit'E naněntangu tampạ ene kụ nanẹ̌pas'u raral᷊eng limiu wanuang Galilea. Mawu Yesus mạdiri kasingkateng u taumata měnsang kai suapa i Sie e,

31u i Sie kai kạpaněntirone manga murit'E. "Ahus'u Taumata e sarung isarakang su kawasan taumata," kerene angkuěngu Mawu Yesus, "kụ i Sie sarung pateěng, kai su katěllu ěllone i Sie sarung mẹ̌bangung!"

32Manga murit'E tawe nakaěnna apa itẹ̌těntirom Mawu Yesus, kai i sire matakụ makiwal᷊o si Sie.

33Ene i sire narěntạe su Kapernaum. Kutẹu sarangke seng su wal᷊e, Mawu Yesus nakiwal᷊ọ e su manga murit'E, "I kamene nạung kai měmpạhumbisarang apạe su raral᷊engang kanini?"

34I sire tawe němpẹ̌simbang, batụu kạpahundal᷊enge i sire kai mědẹ̌darendeh'u měnsang i sai kasěllahenge.

35Mawu Yesus naiang, kụ bọu e nẹ̌kui si sire mapul᷊o dua murit'E. I Sie něhengetang si sire, "I sai kụ mapulu makoạ kahumotongange, i sie harusẹ̌ makoạ kasamuriange kụ harusẹ̌ makoạ mẹ̌tatangkuang patikụ taumata."

36Bọu e Mawu Yesus něngal᷊ạ dariọ kadodọ sěngkatau, kụ nipararisị su těngon sire kěbị. Mawu Yesus limahěkụ dariọ ene kụ něhengetang su manga murit'E,

37"I sai měnarimạ u sěngkatau rariọ kere ini ual᷊ingu Iạ e, ute něnarimạ u Iạ. Kụ i sain něnarimạu Iạ, i sie wal᷊inewe tumbạu něnarimạu Iạ e, kaiso mal᷊aing něnarimạ i Sie kụ dimoloh'u Iạ e."

38Mase i Yohanes nẹ̌bera su Mawu Yesus, "Tuang Guru, i kami nakasilo piạ tau mělẹ̌liwuahẹ̌ setang su areng i Tuang. Kụ i kami nẹ̌sěding i sie, batụu i sie wal᷊inewe wọ'i kitẹ."

39Kai Mawu Yesus e kawe něhengetang, "Abe pẹ̌sěding i sie, u kai tawẹu sarang sěngkatau mẹ̌koạ karal᷊inaụ su ral᷊ungu arengku, kụ apid'u měngkai měndal᷊akịu Iạ e.

40U i sai tawe rumokạ si kitẹ e ute kai mělẹ̌lahẹu su sěmběkang kitẹ.

41Pẹ̌tahěndungke! I sai mạpanginung i kamene ual᷊ingu i kamene kawe tumatol᷊e Ratu Mananal᷊amatẹ̌, ute i sie mambeng těngadẹ̌ manarimạu wawal᷊ise."

42"I sai makawodaị sěngkatau wọu i sire rarodọ tamai ini e kụ tawe mangimang si Siạ, ěndokangbe watuangengu watung pěmaměhaseng kụ ikị su lehẹ e, kụ i sie iwahung su l᷊audẹ̌.

43Kereu limanue kai makarosa si kau, pentehe limanu ene! Mapiaěngbe i kau mẹ̌biahẹ̌ dingangu Mawu limanu sěmbẹ̌ka sul᷊ungu piạ limanu ruambẹ̌ka kụ masuẹ̌ su naraka, mangal᷊ene putung kakalẹ̌.

44[Sene putunge tawe masasẹ̌bu, ringangu ul᷊idẹ̌ e tawe l᷊umaate.]

45Dingangu kereu laed'u e kai makarosa si kau, pentehe laed'u ene. Mạpiaěngbe i kau mẹ̌biahẹ̌ dingangu Mawu Ruata e tạ laed'u sěmběka, sul᷊ungu piạ laed'u ruamběka kụ i kau iwahung su naraka.

46[Paị sene putunge tawe masasẹ̌bu ringangu ul᷊idẹ̌ e tawe l᷊umaate.]

47Kereu matanue kai makarosa si kau, loẹ e mata ene! Mapiaěngbe i kau sumuẹ̌ Dunia Wuhun Duata tạ mata sěmbẹ̌ka, sul᷊ungu piạ matanu ruamběka kụ i kau iwahung su naraka.

48Paị sene putung ta masasẹ̌bu ringangu ul᷊idẹ̌ e tawe l᷊umaate.

49Sěngkatau-sěngkataue sarung sahikangu putung, kerẹewe sasěmba sẹ̌sahikangu asing.

50Asinge apạewe mapia, kai kereu kawe malele, botonge saụ asingang ngae? Tangu karimạko i kamene makoạ kere asing. Pěmpẹ̌biahe sěngkapẹ̌biahẹ̌ su ral᷊ungu pẹ̌darame."



 <<  Markus 9 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel