Alkitab Mobile SABDA
[VER] : [SANGIR]     [PL]  [PB] 
 <<  Roma 15 >> 

1I kitẹ apan těnga-těngadẹ̌ maiaking su apang lẹ̌imangeng i kitẹ e harusẹ̌be pakasabarẹ̌ su apang kabaratangu taumata kụ lome pangangimange. Abe kawe kětạeng mapakạl᷊uasu watangeng i kitẹ hala.

2Su sěmběkane i kitẹ sěngkatau-sěngkatau mambeng mạpakal᷊uasu naungu l᷊awọ sěndinganeng i kitẹ, tadeạu pangangimang e mahuntinambang katoghase.

3Batụu i Kristus e tawe tumbạu měngẹ̌ngěnna tadeạu mapakapiam batangeng'E sẹ̌sane. Su ral᷊ungu Winohẹ Susi e mạbawohẹ kere ini: "Kal᷊awọu tatelorẹ̌ e kụ niapẹ̌timona si Kau e seng nanawo si siạ."

4Kěbị apam mạbawohẹ su ral᷊ungu Winohẹ Susi e kai tadeạu pạněntiro si kitẹ. Batụu těntiro nikatarimạ i kitẹ bọu Winohẹ Susi e makạkědang dingangu makạtoghasẹ̌ si kitẹ hakịu i kitẹ makapělẹ̌harapẹ̌ su Ruata.

5Karimạko Mawu Ruata kụ mạngonggọ u pẹ̌kakakědang dingangu lahiborẹ̌ su taumata e mẹ̌tul᷊ung i kamene mědeạu mẹ̌biahẹ̌ sěngkanaung matuhụ su kapulung Kristus Yesus.

6Dingangu sěngkanaung i kamene kěbị sěngkapẹ̌dalo Ruata, i Amangu Mawung kitẹ i Yesus Kristus.

7Batụu ene karimạko manga anạ u sěmbaụ měnarimạu sěmbaụ su wal᷊ine ringangu naung mal᷊uasẹ̌ kerẹewe lai i Kristus mal᷊aing mạnarimạ i kamene waụgu kawawantug'u Mawu Ruata.

8Kai pẹ̌tahěndungko, u i Kristus seng bọu nẹ̌tangkiang tau Yahudi pělahekang u Mawu Ruata e satia su ral᷊ungu měngganapẹ̌ manga kẹ̌don'E su manga i upung i kitẹ.

9Mawu Yesus mal᷊aing mapakariadin manga wansa wal᷊ine měmpẹ̌dalo Ruata ual᷊ingu kapian naung'E si sire. Su ral᷊ungu Winohẹ Susi mạbawohẹ kere ini, "Hakịu ene iạ sarung mẹ̌pudi si Kau sutal᷊oaran manga wansa e, iạ sarung mẹ̌kantarịu raralo waụgu areng'U."

10Piạ mạbawohẹ lai kere ini, "Pahul᷊uasẹ̌ko ringangu kawanuan Duata kụ pinilene, ei patikụ bansa."

11Dingangu ini lai, "Pěmpẹ̌dalo Ruata, ei patikụ bansa, kụ patikụ taumata pěmpẹ̌pudị si Sie!"

12Dingangu ini lai pinẹ̌beran Yesaya, "Bọu hěnton Isai sarung lumẹ̌to sěngkatau kụ sarung mẹ̌parěnta manga wansa; kụ kai si Sie pěharapeng u patikụ bansa ene."

13Mawu Ruata e kai tampạ pělẹ̌harapeng i kamene. Karimạko i Sie mamenẹ u naung i kamene ringangu kal᷊awọu ral᷊uasẹ̌ dingangu ramenaung, ual᷊ingu i kamene mạngimang si Sie, tadeạu ual᷊ingu kawasan Rohkẹ̌ u Ruata i kamene mangkeng mẹ̌dal᷊embom pělaharape su Ruata.

14Manga anạ u sěmbaụku! Iạ maiaking u měngkate apa l᷊awọ hal᷊ẹ̌ mapapia si kamene. I kamene mal᷊aing masingkạ u haghim patikụ e ringangu makạpaněntiro sěmbaụ su wal᷊ine e lai.

15Arawe su manga hal᷊ẹ̌ mạtuntụe, iạ mapẹ̌tẹ̌tahěndung si kamene pakaamumang su ral᷊ungu suratẹ̌ ini, batụu Ruata e seng nangonggọu tatal᷊ěntụ e si siạ munara ene.

16I Sie seng napakariading iạ nakoạ mẹ̌tatangkiang si Kristus Yesus tadeạu ikarolohẹ̌ su manga wansa wal᷊ine Yahudi. Dingangu iạ nakoạ kere imang kụ mělẹ̌habaru Injilẹ̌ bọu Ruata, tadeạu apan taumata kụ bal᷊ine Yahudi e měngkakoạ sasěmba su Ruata kụ ikatarimạ i Sie. Karimạko Rohkẹ̌ u Ruata e makakariading kamene makoạ sěmbaụ sasěmba makạl᷊ahimpulu si Sie.

17Kụ ual᷊ingu iạ seng nasěmbaụ dingang i Kristus Yesus, ute iạ botonge lumesạ u munaraku e waug'u Ruata.

18Iạ bahani mẹ̌bisara kerene kětạeng mạanung apan seng nịkakoạ i Kristus su ral᷊ungu iạ tadeạu apan taumata wal᷊ine Yahudi matuhụ su Ruata. Iạ e mẹ̌kẹ̌koạ ene ringangu kal᷊awọu wawera ringangkewelaing, kakanoạ,

19ipẹ̌sẹ̌sarětạu manga haghin tanda ringangu manga hal᷊ẹ̌ makạdal᷊inaụ, kěbị ene ual᷊ingu kawasang Rohkẹ̌ u Ruata. Injilẹ̌ mạanung Kristus e sen takụ nihabarẹ̌ kěbị su taumata nanětạ bọu Yerusalem sarang Ilirikum.

20Kapuluku e kai měhabar'u Injilẹ̌ bọu Mawu suapam piạ u tawe nakạdingihẹ̌ habar'i Kristus e. Batụu iạ madiri mělanging munara su watu pinẹ̌bukuang nipěllọu taumata wal᷊ine.

21Su ral᷊ungu Winohẹ Susi e mạbawohẹ, "Taumata apam bẹ̌dang tawe nakạdingihẹ̌ habaru mạanun Sie, ute sarungbe makasilo; dingangu i sire apam bědang tawe nakạdingihẹ̌ e sarungbe makaěnna."

22Kai ual᷊ingu ene hakịu iạ měngkai mạsahaghe mẹ̌tiwo si kamene.

23Arawe ini e munaraku su apan banua ene seng nauadipẹ̌. Pira-pira taung karěngụe iạ měngkate mapulu mẹ̌tiwo si kamene.

24Hědọeng kereu iạ sumahe soanu suraral᷊engku sarang Spanyol, kụ mal᷊owọko iạ deng makapẹ̌sombang i kamene kụ deng makapẹ̌dal᷊uasẹ̌ kạdodọ tempo ringang i kamene. Bọu ene iạ mẹ̌lẹ̌harapẹ̌ i kamene reng makatul᷊ung u iạ baugu raral᷊engku sarang Spanyolẹ̌ e.

25Arawe orasẹ̌ ini e iạ mapulu sarang Yerusalem tadeạu mẹ̌bawa lahuwụ baugu ral᷊ohon jamạat'u Mawu sene.

26Batụu apan jěmaatẹ̌ su Makedonia ringangu Akaya seng němpẹ̌gaghighilẹ̌ mẹ̌gěllịu lahụwụ baug'u manga anạ u sěmbaụ kasiang su tal᷊oaran jamạat'u Mawu su Yerusalem.

27Dingangu karal᷊uasu naung i sire němpěmutus'u mẹ̌deạu mẹ̌koạ ene. Mamben těngadẹ̌ i sire hinom mẹ̌tul᷊ung u manga anạ u sěmbaụ apang kasiang su Yerusalem ene; batụu kai wọu tau Yahudi e, kụ apam bal᷊ine Yahudi e sen nakatarimạ u kal᷊awọu al᷊amatẹ̌ bọu Ruata. Kụ apam bal᷊ine tau Yahudi e hinone lai mẹ̌tul᷊ungu apan tau Yahudi e ringangu kal᷊awọu al᷊amatẹ̌ bọu arětạe.

28Kereu iạ seng měngganapẹ̌ hal᷊ẹ̌ku ini, kụ manarakang u kakěndagẹ̌ kụ seng nakomol᷊ẹ̌ e si sire su Yerusalem, tangu iạ e kai makoạ sarang banuan Spanyol isahe wọu soang kamene.

29Kereu iạ duměnta su anung kamene, ute rụděntang al᷊amatẹ̌ mẹ̌dẹ̌dal᷊embo wọ'i Kristus baug'i kamene.

30Ual᷊ịem Mawung kitẹ Yesus Kristus, ringangu ual᷊ịeng kakěndag'u Rohkẹ̌ u Ruata, iạ mẹ̌dẹ̌dorong sěngapam botonge si kamene, karimạko i kamene mal᷊aing mẹ̌kal᷊iomaneng sěngkapẹ̌kal᷊iomaneng masěgadẹ̌ dingangku su Mawu Ruata waugu iạ.

31Pẹ̌kal᷊iomaneng mẹ̌deạu Ruata e měliung iạ bọu l᷊iman tau kapirẹ̌ apan su Yudea, ringangu mẹ̌deạu hal᷊ẹ̌ku mẹ̌bawa roitẹ̌ kakěndagẹ̌ su Yerusalem ikatarimạben dingangu naung mal᷊uasẹ̌ kahian dal᷊ohon jamạat'u Mawu sene.

32Ual᷊ingu ene, kereu iapakawalan Mawu iạ makakarěnta we anung kamene ringangu naung mal᷊uasẹ̌. Kụ iạ sarung mahiborẹ̌ dingang i kamene.

33Milumbạko Mawu Ruata e mangonggọu pẹ̌darame su taumata, mahundingang si kamene kěbị. Aming.



 <<  Roma 15 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran