Alkitab Mobile SABDA
[VER] : [SASAK]     [PL]  [PB] 
 <<  Ibrani 7 >> 

1Melkisedek niki raje lẽman Salem dait imam Allah Saq Maheagung. Sewaktu Ibrahim tulak lẽman perang ngalahang raje-raje, Melkisedek rauh nyambut ie dait ngicanin ie berkah.

2Beterus Ibrahim ngaturin Melkisedek sepersepulu lẽman napi saq ie rebut. (Pesẽngan Melkisedek artine, saq penembẽq, "Raje Keadilan" dait lantaran Ie raje lẽman Salem, make artine ẽndah "Raje Damẽ".)

3Mengenai Melkisedek niki ndẽq araq keterangan bahwe ie bedowẽ amaq atao inaq atao leluhur; ndẽq araq ẽndah keterangan mengenai kelahiranne, atao ninggalne. Ie pade maraq Bije saq asalne lẽman Allah; Ie Imam saq kekel.

4Jari, ite bau serioq lẽq deriki berembẽ agungne Melkisedek niki; Ie agung sehingge Ibrahim, bapaq leluhur bangsente, ngicanin ie sepersepulu lẽman selapuq harte saq ie mauq lẽman perang nike.

5Lẽq dalem Hukum Taurat, tetentuang bahwe imam-imam keturunan Lewi saq betugas bait sepersepulu lẽman dowẽ bande dait penghasilan umat Israel, nike semeton-semetonne mẽsaq timaq ie pade bareng-bareng keturunan Ibrahim.

6Melkisedek ndẽqne keturunan Lewi, laguq ie ẽndah nerimaq sepersepulu lẽman selapuq saq terebut siq Ibrahim, Melkisedek ẽndah ngicanin berkah tipaq Ibrahim saq setetune sampun bedowẽ janji-janji lẽman Allah.

7Mule ndẽqne bau tetilas bahwe dengan saq teberkahin nike bawaqan lẽman dengan saq ngicanin berkah.

8Imam-imam saq nerimaq bagian sepersepulu, nike manusie saq iniq ninggal. Laguq mengenai Melkisedek saq nerimaq bagian sepersepulu nike, menurut Kitab Suci tetep idup.

9Jari bau teparan, bahwe Lewi -- saq keturunanne bait bagian sepersepulu lẽman umat Israel -- bebayah ẽndah bagian nike langan Ibrahim.

10Timaqne Lewi ndẽqman tebijeang, laguq bau teparan ie sampun araq lẽq dalem awak Ibrahim leluhurne, sewaktu Melkisedek bedait kance Ibrahim.

11Siq pimpinan imam-imam Lewi, Hukum Taurat teicanin tipaq umat Israel. Sẽngaq imam-imam Lewi nike ndẽqne bau ngelaksaneang secare sempurne napi saq harus ie laksaneang, make harus araq imam lain, saq maraq Imam Melkisedek, dait ndẽqne lẽman golongan Imam Harun malik!

12Jari, lamun kedudukan imam-imam berobah, Hukum Taurat ẽndah harus berobah.

13Saq temaksut lẽq deriki mengenai sopoq dengan saq asalne lẽman suku lain, padahal lẽman suku niki ndẽqne uwah sopoq dengan juaq saq betugas jari imam.

14Selapuq dengan nenaoq bahwe Junjungante Saq Mulie asalne lẽman suku Yehuda; dait Musa ndẽq uwah nyebut suku nike sewaktu ie bebaos mengenai imam-imam.

15Hal saq teraosang niki jari sayan jelas malik, waktu araq sopoq imam lain saq maraq Melkisedek.

16Ie teangkat jari imam, ndẽqne atas dasar aturan-aturan manusie, laguq atas dasar idup saq ndẽqne iniq binase.

17Sẽngaq mengenai Ie araq kesaksian, "Deside imam selaẽq-laẽqne, menurut aturan Melkisedek."

18Jari, mangkin aturan saq laẽq sampun tebatalang, sẽngaq ndẽq kuat dait ndẽq araq manpaatne.

19Hukum Taurat ndẽqne bau jariang napi juaq jari sempurne. Keranaq nike mangkin ite teicanin sopoq pengharepan saq solahan; siq hal nike ite bau parek tipaq Allah.

20Dait ẽndah, selapuqne nike tebarengin siq sumpah lẽman Allah. Ndẽq araq sumpah maraq nike sewaktu imam-imam saq lain nike teangkat.

21Laguq Deside Isa teangkat jari imam kadu sumpah, sewaktu Allah bemanik lẽq Ie, "Tuhan sampun besumpah, dait Ie nẽnten gen ngerobah keputusan-Ne, 'Deside Imam selaẽq-laẽqne.'"

22Siq care niki ẽndah Deside Isa jari jaminan lẽman sopoq perjanjian saq solahan.

23Selain nike, luwẽq imam-imam saq lain, sẽngaq ie pade sopoq-sopoq ninggal sehingge ndẽq bau ngelanjutang jabatanne.

24Laguq Deside Isa idup selaẽq-laẽqne, dait jabatanne jari imam ndẽqne tegentiq siq dengan lain.

25Keranaq nike jari selaẽq-laẽqne Deside Isa bau nyelametang dengan-dengan saq parek ojok Allah langan Ie, sẽngaq Ie idup selaẽq-laẽqne jari Perantare ie pade.

26Jari, Deside Isa nike Imam Agung saq ite perluang. Ie suci; lẽq Ie nẽnten araq kesalaqan atao dose napi juaq. Deside Isa tekelin lẽman dengan-dengan bedose, dait tetaẽkang jangke ojok taoq saq atasan lẽman selapuq langit.

27Deside Isa nẽnten maraq imam-imam agung saq lain, saq sebilang jelo harus ngaturang kurban persembahan lantaran dose-dosene mẽsaq juluq, baruq lantaran dose-dose umat. Deside Isa ngaturang kurban cume sekali doang jari selaẽq-laẽqne, sewaktu Ie ngaturang diriq-Ne mẽsaq jari kurban.

28Hukum Taurat netepang dengan saq ndẽq sempurne jari imam agung. Laguq sesampun nike, lẽman hukum nike, Allah miaq janji kadu sumpah bahwe Allah ngangkat jari Imam Agung, Bije saq asalne lẽman Allah saq sampun sempurne selaẽq-laẽqne.



 <<  Ibrani 7 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel