Alkitab Mobile SABDA
[VER] : [SASAK]     [PL]  [PB] 
 <<  Wahyu 1 >> 

1Isi kitab niki mengenai wahyu saq teicanin siq Allah tipaq Deside Isa Almasih. Adẽq Almasih nyatayang hal nike tipaq hambe-hambe-Ne, nike hal-hal saq harus becat telaksane. Beterus Ie ngutus malaẽkat-Ne tipaq Yahya, hambe-Ne, jari jelasang hal-hal nike.

2Yahya sampun besaksi mengenai Manik Allah dait mengenai kesaksian saq teicanin siq Deside Isa Almasih, nike selapuq saq sampun ie serioq.

3Bahagie dengan saq baceang dait dengan saq dengahang berite nubuat kitab niki dait taat lẽq napi saq tetulis lẽq dalemne. Sẽngaq ndẽqne ngonẽq malik selapuqne niki gen telaksane.

4Tipaq kepituq jemaah lẽq daẽrah Asia Kodẽq. Umaq side pade rahmat dait sejahtere lẽman Ie saq araq mangkin, saq sampun araq lẽq jaman laẽq, dait saq masih araq lẽq waktu saq gen dateng. Lẽman tiang, Yahya dait lẽman kepituq roh saq araq lẽq arepan tahte Allah,

5dait lẽman Deside Isa Almasih, saksi saq setie. Ie saq penembẽq teidupang malik lẽman ninggal dait Ie penguase raje-raje dunie. Bagi Deside Isa saq ngasihin ite, dait siq ninggal-Ne Ie bẽbasang ite lẽman dose-dosente

6dait jariang ite sopoq kerajaan dait imam-imam, saq ngelayanin Allah, Bapa-Ne. Bagi Ie kemuliean dait kuase jangke selaẽq-laẽqne. Amin!

7Pade serioq Ie rauh lẽq dalem awan! Selapuq dengan gen serioq Ie, termasuk ẽndah ie pade saq sampun galah Ie. Selapuq bangse lẽq gumi gen ẽroq asẽq lantaran Ie. Tetu, nike pasti! Amin!

8"Tiang niki saq penembẽq dait saq penutuq, Manik Allah, Tuhan saq araq, saq sampun araq, dait saq araq selaẽq-laẽqne, Saq Mahekuase."

9Tiang Yahya, semetonde saq senasip kance side pade lẽq dalem kesusahan, dalem kerajaan dait lẽq dalem ketekunan jari ngantos kerauhan Deside Isa. Tiang tetetẽh ojok Pulao Patmos lantaran tiang beriteang Manik Allah dait kesaksian Deside Isa.

10Lẽq jelo Tuhan, tiang tekuasein siq Roh Allah, terus tiang dengah suare saq belẽq -- maraq suare terompẽt -- kedengahan lẽq mudi tiang.

11Basen suare nike, "Tulis lẽq dalem sopoq kitab napi saq side serioq, dait kirim tipaq pituq jemaah niki: Epesus, Smirna, Pergamus, Tiatira, Sardis, Piladelpia, dait Laodikia."

12Tiang ngẽngat andang mudi jari serioq sai nike saq ngeraos tipaq tiang. Terus tiang serioq pituq naẽ dilah saq tepiaq lẽman emas.

13Lẽq tengaq-tengaq naẽ-naẽ dilah nike nganjeng sopoq dengan saq penggitan maraq Bije Manusie. Ie ngadu jubah saq bẽlone jangke cokor-Ne. Lẽq dade-Ne Ie ngadu tutup dade emas.

14Sirah dait bulu-Ne putẽq maraq bulu dombe, putẽqne maraq salju. Penyermin-Ne nyale maraq api.

15Cokor-Ne nyale maraq tembage saq tetunuq. Suare-Ne maraq belabur saq belẽq gati.

16Gading-Ne saq kanan negel pituq bintang, dait lẽman cangkem-Ne sugul sopoq klẽwang bemangan due saq merang gati. Penjarupan-Ne besinar maraq jelo lẽq waktu tengari.

17Waktu tiang serioq Ie, tiang nyungkur lẽq arepan-Ne maraq dengan matẽ. Laguq Ie noloq gading-Ne saq kanan lẽq atas tiang beterus bemanik, "Ndaq takut! Tiang saq penembẽq dait saq penutuq.

18Tiang niki saq idup! Tiang sampun ninggal, laguq silaq serioq; Tiang idup jangke selaẽq-laẽqne. Tiang bekuase lẽq kematẽan, dait lẽq dunie dengan matẽ.

19Keranaq nike, tulis hal-hal saq side serioq, nike hal-hal saq araq mangkin niki, dait hal-hal saq gen telaksane ẽraq.

20Niki rahasie lẽman pituq bintang saq side serioq lẽq ime kanan Tiang, dait lẽman pituq naẽ dilah emas nike: Pituq bintang nike pare malaẽkat kepituq jemaah, dait pituq naẽ dilah nike kepituq jemaah nike."



 <<  Wahyu 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel