Alkitab Mobile SABDA
[VER] : [SIMALUNGUN]     [PL]  [PB] 
 <<  1 Korintus 15 >> 

Saksi-saksi Pasal Parpuhoon ni Kristus

1Nasiam sanina, hupaingat ma nasiam pasal Ambilan Na Madear, na dob huambilankon bani nasiam, na dob jinalo nasiam, na gabe hajongjongan nasiam,

2anjaha parhiteian nasiam maluah, anggo poltik panjolom nasiam bani na dob huambilankon bani nasiam; anggo na so soya do nasiam porsaya.

3Ai parlobei do hupadas bani nasiam, na dob hujalo sandiri, ai ma, na dob matei do Kristus halani dousanta domu hubani na tarsurat in.

4Na dob tartanom do Ia, anjaha ipapuho bani ari patoluhon, domu hubani na tarsurat in.

5Anjaha ipataridahkon do diri-Ni bani si Kepas, dob ai bani na sapuluh dua ai.

6Dob ai ipataridahkon do diri-Ni sahali bani lobih lima ratus sanina; buenan ope hunjai na manggoluh ronsi nuan, deba do na dob modom.

7Dob ai ipataridahkon do diri-Ni bani si Jakobus, dob ai bani haganup apostel in.

8Tapi i pudi ni haganupan ai, ipataridahkon do diri-Ni bangku, na tarhatahon tubuh bani na so panorangni.

9Ai ahu do sietekan humbani apostel in, na seng talup namin goranon apostel, halani na dob huparburu kuria ni Naibata.

10Tapi halani idop ni uhur ni Naibata do, ase sonon ahu nuan, anjaha seng soya idop ni uhur-Ni na hu bangku in, ai buenan do na huhorjahon humbani sidea haganup; sedo ahu tene, tapi idop ni uhur ni Naibata do na mangkasomani ahu.

11Atap ahu pe atap sidea, sonin do parambilanonnami, anjaha sonin do nasiam gabe porsaya.

Pangkorhon ni Parpuhoon ni Kristus

12Tapi anggo domma naambilankon Kristus, paboa na dob puho do Ia humbani na matei, mase ma adong deba i tongah-tongah nasiam na mangkatahon, na so adong parpuhoon humbani na matei?

13Tapi, anggo seng adong parpuhoon humbani na matei, Kristus pe seng puho humbani na matei.

14Tapi, anggo seng puho Kristus humbani na matei, jadi lumei ma ambilannami, anjaha lumei ma homa haporsayaon nasiam.

15Tardapot ma age hanami saksi palsu ni Naibata, halani isaksihon hanami pasal Naibata, na dob papuho Kristus, hape seng ipapuho, anggo na tongon do seng mulak manggoluh na matei.

16Ai anggo seng ipapuho na matei, seng tongon puho age Kristus.

17Tapi, anggo seng ipapuho Kristus in, soya ma haporsayaon nasiam, anjaha tong ope nasiam ibagas dousa nasiam.

18Anjaha na dob matei pe ibagas Kristus magou ma.

19Anggo sanggah manggoluh on do hansa mangarap hita bani Kristus, hita ma sisombuhan humbani haganup.

20Tapi domma puho Kristus humbani na matei, Ia do parlobei ni sagala na dob modom in.

21Ai songon marhitei sada jolma roh hamatean, sonai do marhitei sada jolma adong parpuhoon humbani na matei.

22Ai songon ibagas si Adam haganup matei, sonai do ibagas Kristus haganup ipagoluh.

23Tapi ganup ma mangihutkon parjojorni; parlobei Kristus, dob ai na bani Kristus bani parroh-Ni ai.

24Dob ai roh ma ujungni; ijai ma ondoskonon-Ni harajaon in bani Naibata anjaha Bapa, dob iparontihon sagala pamarentahan, kuasa ampa hagogohon.

25Ai maningon manrajai do Ia, ronsi ipatunduk haganup munsuh in hu toruh ni nahei-Ni.

26Munsuh na parpudi siparontihonon-Ni, ai ma hamatean.

27Ai haganup do patundukon ni Naibata hu toruh ni nahei-Ni. Tapi anggo ihatahon haganup do ipatunduk, torang ma ijai seng dihut Ia, na patundukkon haganup hu Bani.

28Tapi dob tunduk haganup ai hu Bani, gabe dihut ma Anak in sandiri unduk hubani sipatunduk haganup Bani, ase Naibata gabe haganup ibagas haganup.

29Anggo seng sonai, aha do guna ni pambahenan ni halak na padidihon dirini mangkopkop halak na matei? Ai anggo sabonar na so puho do na matei, mase ma padidihonon ni sidea dirini mangkopkop na matei?

30Anjaha hanami pe, mase ma pala tarononnami parmaraan ganup panorang?

31Narus-narus matei do ahu ganup ari; tongon, nasiam sanina, halani hamegahonku pasal nasiam, na adong bangku ibagas Kristus Jesus, Tuhanta in.

32Ai anggo mangihutkon hajolmaon do maringor ahu ampa binatang panoroh i Epesus, aha ma gunani ai bangku? Anggo seng puho na matei, mangan minum ma lah hita, ai matei do hita patar.

33Ulang nasiam kahou! Magou do biak na madear, anggo nahombari na masambor.

34Patut ma nasiam tarjolma, ulang be mardousa, ai adong do deba na so mananda Naibata. Laho pailahon nasiam do na huhatahon.

Pasal Badan ni Jolma na dob Puho humbani na Matei

35Tapi nini halak deba, “Sonaha ma parpuho ni na dob matei? Marbadan na sonaha ma sidea na roh ai?”

36E, ham na oto! Na sinaburhonmu ai, seng manggoluh ai, anggo seng matei lobei.

37Anjaha sanggah manabur ham, seng badan ni na sihol roh ai isaburhon ham, tapi sangkamata gandum do atap na legan.

38Tapi Naibata do mambere badan hujai, domu hubani rosuh ni uhur-Ni, bani ganup bonih ibere badanni bei.

39Seng sarupa ganup masam ni daging in, tapi legan do na bani jolma, legan na bani pinahan, legan na bani manuk-manuk, anjaha legan na bani dengke.

40Adong do badan parnagori atas anjaha adong do badan parnagori tongah on, tapi legan do sangap ni na i nagori atas, legan na i tanoh on.

41Legan do sondang ni mata ni ari, legan do sondang ni bulan, anjaha legan do homa sondang ni bintang-bintang. Ai bintang pe palegan-legan do sinondangni.

42Sonai do homa bani parpuhoon ni na dob matei. Isaburhon do na ra maseda, tapi ipapuho na so ra maseda.

43Tarsabur do ibagas hahirion, tapi ipapuho do ibagas hasangapon. Tarsabur do ibagas hagalekon, tapi ipapuho do ibagas hagogohon.

44Na isaburhon, ai ma badan pardagingon, ipapuho badan partonduyon. Anggo adong pardagingon, adong do age badan partonduyon.

45Domu hubani na tarsurat in, “Jolma na parlobei, ai ma si Adam, gabe hosah na manggoluh do. Si Adam na parpudi gabe Tonduy na pagoluhkon.”

46Tapi sedo badan partonduyon na parlobei, badan pardagingon do, dob ai pe ase badan partonduyon.

47Jolma na parlobei ai ma hun tanoh on, anjaha marbiak tanoh on, jolma na paduahon hun nagori atas do.

48Domu hubani biak ni na hun tanoh on do sagala na i tanoh on; anjaha domu hubani biak ni na hun nagori atas do sagala na i nagori atas.

49Anjaha songon na dob ipakei hita rumang tanoh on, sonai do pakeionta rumang na hun nagori atas.

Hasangapon ni Parpuhoon na Sihol Masa ampa Ojur-ojur

50Nasiam sanina, on do na huhatahon, seng tarbahen daging ampa daroh manean Harajaon ni Naibata, seng tartean na ra salpu on na totap ai.

51Tonggor ma, hupatugah ma bani nasiam sada rusia: “Seng haganup hita matei, tapi haganup do hita paubahon.”

52Sompong ibagas sangkidop mata, bani parsora ni tarompit na parpudi ai, ai marsora ma tarompit, gabe puho ma na matei hu hatongtongon, lanjar paubahon-Ni ma anggo hita.

53Ai maningon na totap ai do solukkononkon bani na ra salpu on, anjaha goluh na totap ai solukkononkon bani na ra matei on.

54Tapi dob isolukkon na totap ai bani na ra salpu on, anjaha dob isolukkon goluh na totap ai bani na ra matei on, ijai ma jumpah hata na tarsurat in, “Domma tarbondut hamatean hubagas hamonangan.”

55O hamatean, ija do hamonanganmu? O hamatean, ija do sorodmu?

56Sorod ni hamatean ai ma dousa, anjaha gogoh ni dousa ai ma titah.

57Tapi tarima kasih ma bani Naibata, na pamonang hita marhitei Tuhanta Jesus Kristus.

58Ai pe, nasiam sanina na hinaholongan, totap ma nasiam, ulang mubah-ubah, anjaha lambin surung ma ibagas horja ni Tuhan in, ai ibotoh nasiam, sedo na soya halojaon nasiam ibagas Tuhan in.



 <<  1 Korintus 15 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel