Alkitab Mobile SABDA
[VER] : [SIMALUNGUN]     [PL]  [PB] 
 <<  1 Raja-raja 10 >> 

Parroh ni Raja Naboru na hun Seba

1Jadi dob ibogei raja naboru na hun Seba barita ni raja Salomo ampa goran ni Jahowa, roh ma ia laho mangujisi marhitei sungkun-sungkun na bagas.

2Jadi das ma ia hu Jerusalem rap pakon bala buei tumang, sonai homa unta na mamboban na misbou marbagei-bagei, omas buei tumang pakon mata intan na maharga. Dob das ia hu bani si Salomo, ipatugah ma hu bani ganup na ibagas uhurni.

3Jadi ibalosi Raja Salomo ma ganup sungkun-sungkunni ai, seng dong na ponop bani raja ai, na so boi patorangonni bani.

4Jadi dob iidah raja naboru na hun Seba ai ganup hapentaran ni Raja Salomo pakon rumah na pinajongjongni ai,

5sipanganon na bani mejani, parhundul ni juakjuakni, pangidangi ni siparugas pakon pakeian ni sidea, sitahu anggurni, pakon galangan situtungon na ginalangkon bani Rumah ni Jahowa, jadi mali tonduy ma ia.

6Jadi nini ma hu bani raja ai, “Sintong do hape barita ai, na hubogei i tanohku pasal ham pakon hapentaranmu,

7tapi seng iparhatongon uhurhu lobei barita ai paima roh ahu hujon, anjaha matangku sandiri mangidah ai, hape, tonggor ma, satongahni pe lang na binaritahon ni halak ai bangku; i atasi hapentaranmu pakon artamu do hape barita na hubogei ai.

8Martuah ma na sipuang, martuah ma juakjuakmu on, na jongjong tongtong i lobeimu pabogei-bogei hapentaranmu.

9Pinuji ma Jahowa Naibatamu, na mardear ni uhur mangidah ham, na pabangkitkon ham bani paratas ni harajaon ni Israel! Halani holong ni uhur ni Jahowa mangidah halak Israel sadokah ni dokahni, ai do ase ipabangkit ham gabe raja, laho mandalankon uhum pakon hapintoran.”

10Jadi ibere ma hu bani raja ai saratus dua puluh talenta omas, na misbou-misbou buei tumang pakon mata intan na maharga; seng ongga be roh na misbou-misbou na sonai bueini, songon na binere ni raja naboru na hun Seba hu bani Raja Salomo.

11Sonai homa kapal ni Raja Hiram, na mamboan omas hun Opir, iboan do homa hun Opir hayu jati buei tumang pakon mata intan.

12Dob ai isuruh raja ai ma patureihon hun bani hayu jati ai parugas i rumah panumbahan pakon rumah ni raja ai, sonai homa husapi pakon sordam bani sipandoding; seng ongga roh barang taridah hayu na sonai, ronsi sadari on.

13Raja Salomo pe ibere do bani raja naboru na hun Seba ai ganup na hinarosuhkon ni uhurni pakon pangindoanni, sobali sibere-bere ni raja ai sandiri hu bani. Dob ai mulak ma ia hu tanoh ni sandiri rap pakon juakjuakni.

Hasangapon pakon Habayakon ni Raja Salomo

14Ia borat ni omas na roh hu bani Raja Salomo ibagas satahun onom ratus onom puluh onom talenta omas do,

15sobali omas, na dapotsi hun bani partiga-tiga pakon sohei ni boniaga ni partiga-tiga, pakon hun bani haganup raja ni Tanoh Arab ampa hun bani wakil na i nagori ai.

16Isuruh Raja Salomo ma na patureihon dua ratus gantar hun bani omas pitah, pala do onom ratus sekel omas ilampiskon bani sada gantar.

17Ipaturei do homa tolu ratus gantar-gantar na etek hun bani omas pitah, tolu kati omas do ilampiskon bani sada gantar-gantar; ipannahkon Raja Salomo ma ai bani rumah harangan Libanon.

18Ipaturei raja ai ma homa sada paratas bolon hun bani gading, anjaha ilampis do ai bani omas pitah,

19onom do talkah ni paratas ai, anjaha gepong do ulu ni paratas ai hampit pudi; bani siamun sambilou ni hundulan ai adong do tampeian ni tangan, anjaha adong do dua usihan ni singa jongjong i lambung ni tampeian ni tangan ai.

20Adong do homa sapuluh dua usihan ni singa i atas ni na onom talkah ai i siamun sambilou. Seng ongga ope ibahen halak na sonai ai bani harajaon na ijahanin pe.

21Haganup panginuman ni Raja Salomo hun bani omas do, anjaha haganup parugas ni rumah ibagas harangan Libanon hun bani omas pitah do; seng dong na hun bani pirak, ai songon na so maharga do pirak sanggah panorang ni Raja Salomo.

22Ai adong do kapal hun Tarsis bani raja ai i laut rap pakon kapal ni Raja Hiram; sahali tolu tahun roh do kapal Tarsis mamboan omas, pirak, gading, bodat pakon uou.

23Ase timbulan do Raja Salomo hun bani haganup raja ni tanoh on pasal habayakon pakon hapentaran.

24Haganup pangisi ni tanoh on marsura-sura sihol mangidah bohi ni Raja Salomo anjaha mambogei hapentaranni, na binere ni Naibata hubagas uhurni.

25Ganup sidea mamboan siluahni, parugas pirak pakon omas, pakeian, sinjata na marbagei-bagei, na misbou, huda pakon halode, ganup tahun.

26Anjaha ipatumpu-tumpu Raja Salomo ma gareta pakon bala siajak huda; adong do bani saribu ompat ratus gareta pakon sapuluh dua ribu bala siparhuda, na ninahkonni bani huta ianan ni gareta porang pakon i Jerusalem i lambung ni raja ai.

27Ipabuei raja ai ma pirak i Jerusalem songon batu bueini pakon hayu ares songon jambu na dong tubuh i tanoh hondot bueini.

28Ia harohan ni huda na bani raja ai hun tanoh Masir pakon hun Koa do; ialop saudagar ni raja ai do ai hunjai, igalar kontan.

29Marharga onom ratus sekel pirak do sada gareta iboli hun Masir, anjaha saratus lima puluh sekel harga ni sada huda; anjaha marhitei saudagar ni raja ai ijual ma ai hu bani raja-raja ni halak Het pakon halak Aram.



 <<  1 Raja-raja 10 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran