Nabi Jehu Manlumbahon Uhum bani Si Baesa
1Jadi roh ma hata ni Jahowa hu bani si Jehu, anak ni si Hanani, palumbahon si Baesa, nini ma,
2“Halani domma Hupatimbul ho hun bani orbuk, anjaha Hupabangkit ho gabe pambobai ni bangsang-Ku halak Israel, hape iirikkon ho do dalan ni si Jerobeam, anjaha iojur-ojur ho do bangsang-Ku halak Israel mardousa, laho papuho ringis-Ku marhitei hun bani dousa ni sidea,
3tonggor ma, siap tumang do bahenon-Ku si Baesa pakon ginomparni, usih hu bani ginompar ni si Jerobeam, anak ni si Nebat.
4Barang ise na matei hun bani si Baesa ibagas huta, maningon bois do panganon ni baliang, anjaha barang ise na matei i ladang, maningon bois do paguton ni manuk-manuk na i awang-awang.”
5Barita na legan ai ope pasal si Baesa, na binahenni pakon kuasani, ai lang tarsurat do ai ibagas buku Barita ni Raja-raja Israel?
6Dob ai modom ma si Baesa rap pakon ompungni, anjaha itanom ma ia i Tirsa, gabe si Ela, anakni ai ma bangkit raja manggantihsi.
7Ambah ni ai roh do hata ni Jahowa marhitei Nabi Jehu, anak ni si Hanani dompak si Baesa pakon ginomparni ai, ai ma halani haganup hajahaton, na hinorjahonni dompak Jahowa, ibagas na usih ai ia songon ginompar ni si Jerobeam, anjaha halani na siniapkonni ai ginompar ni si Jerobeam.
Si Ela Ibunuh si Simri
8Paduapuluh-onomtahunkon dob raja si Asa i Juda, bangkit raja ma si Ela, anak ni si Baesa manggomgom halak Israel i Tirsa, dua tahun dokahni.
9Tapi martahi-tahi do juakjuak ni si Simri, kopala ni na satongah gareta porangni mangimbangsi. Sanggah na marmabuk-mabuk ia minum anggur i rumah ni si Arsa, siramotkon rumah ni raja ai i Tirsa,
10masuk ma si Simri anjaha ibunuh ma ia matei paduapuluh-pitutahunkon dob raja si Asa i Juda, anjaha ia ma bangkit raja manggantihsi.
11Dob bangkit raja ia, dobkonsi hundul ia bani paratasni ai, ibunuh ma ganup ginompar ni si Baesa; seng dong tading ibahen age sada dalahi hun bani hade-hadeni barang huan-huanni.
12Sabonar siap do ibahen si Simri ganup ginompar ni si Baesa, romban hu bani hata ni Jahowa, na nilumbahon-Ni hinan hu bani si Baesa marhitei Nabi Jehu,
13halani haganup dousa ni si Baesa pakon halani dousa ni si Ela, anakni ai, na hinorjahon ni sidea ai, anjaha na niojur-ojur ni sidea halak Israel mardousa, gabe ipuhoi ringis ni Jahowa, Naibata ni Israel, marhitei gana-gana ni sidea ai.
14Barita na legan ai pasal si Ela pakon ganup na binahenni ai, ai lang tarsurat do ai bani buku Barita ni Raja-raja Israel?
Panrajaion ni si Simri
15Paduapuluh-pitutahunkon dob raja si Asa i Juda, bangkit raja ma si Simri pitu ari dokahni i Tirsa; tapi anggo bala ai sanggah mangkubu huta Gibeton do, ai ma na masuk hu bani halak Palistim.
16Jadi dob ibogei bala na i parsaranan ai hata na mangkatahon, “Martahi-tahi do si Simri, anjaha domma ibunuh raja ai, jadi ipabangkit ganup bala ni Israel ma si Omri, pambobai ni bala ai, gabe raja manggomgom Israel bani parsaranan ai.”
17Dob ai tangkog ma si Omri pakon ganup halak Israel hun Gibeton, gabe ihubu sidea ma Tirsa.
18Tapi dob iidah si Simri, na dob talu huta ai, masuk ma ia hu parbatar-bataran ni rumah ni raja ai, itutung ma rumah ni raja ai i babouni, gabe matei ma ia,
19halani dousani, na hinorjahonni ai, marhitei na mambahen sogam ni uhur ni Jahowa, pakon na mangirikkon dalan ni si Jerobeam ampa mangkorjahon dousa songon na hinorjahonni ai, gabe mardousa Israel ibahen.
20Barita na legan ai pasal si Simri pakon partahi-tahian na binahenni ai, ai lang tarsurat do ai ibagas buku barita ni Raja-raja Israel?
Panrajaion ni si Omri
21Marbolah dua do bangsa Israel ijia; satongah bangsa ai mangirikkon si Tibni, anak ni si Ginat, laho pabangkitkonsi gabe raja, na satongah nari mangirikkon si Omri.
22Tapi italuhon bangsa na mangirikkon si Omri do bangsa na mangirikkon si Tibni, anak ni si Ginat, jadi dob matei si Tibni, gabe si Omri ma bangkit raja.
23Patolupuluh-sadatahunkon dob raja si Asa i Juda, bangkit raja ma si Omri manggomgom Israel, sapuluh dua tahun dokahni; onom tahun do ia manrajai i Tirsa.
24Dob ai iboli ma Dolog Samaria hun bani si Semer marharga dua talenta pirak; ipajongjong ma sada huta i atas dolog ai, anjaha ibahen ma goran ni huta, na pinajongjongni ai, Samaria, mangirikkon goran ni si Semer, simada dolog ai hinan.
25Ihorjahon si Omri do sogam ni uhur ni Jahowa, anjaha jahatan do ia hun bani ganup jolma na i lobei ni.
26Ai mardalan do ia bani ganup dalan ni si Jerobeam, anak ni si Nebat, pakon bani ganup dousani ai, gabe mardousa halak Israel ibahen hinorhonni ai, anjaha ipapuho ringis ni Jahowa, Naibata ni Israel, marhitei gana-gana ni sidea ai.
27Barita na legan ai pasal si Omri, na binahenni pakon hagogohon na binahenni, ai lang tarsurat do ai bani buku barita ni Raja-raja Israel?
28Dob ai modom ma si Omri rap pakon ompungni, anjaha itanom ma ia i Samaria; jadi si Ahab, anakni ai ma gabe raja manggantihsi.
Panrajaion ni si Ahab. Mungkah ni Pambalosion bani Baal
29Patolupuluh-ualuhtahunkon dob raja si Asa i Juda, bangkit raja ma si Ahab, anak ni si Omri, manggomgom Israel i Samaria, dua puluh dua tahun dokahni.
30Ihorjahon si Ahab, anak ni si Omri ai do sogam ni uhur ni Jahowa, bueinan hun bani ganup jolma na i lobei ni.
31Maotiktu ope nini uhurni na mardalan bani dousa ni si Jerobeam, anak ni si Nebat ai. Ibuat ma si Isebel, boru ni si Et-Baal, raja ni halak Sidon bahen parinangonni; laho do ia homa mambalosi baal, anjaha marsombah hujai.
32Ipajongjong do sada anjapanjap bani baal, i rumah panumbahan ni baal, na pinaulini i Samaria.
33Ipadear si Ahab do homa sada sisombahon Ashera. Lobihan ope si Ahab mamuhoi ringis ni Jahowa, Naibata ni Israel, marimbang hun bani haganup raja ni Israel, na i lobei ni.
34Sanggah panorangni ipajongjong si Hiel na hun Betel do huta Jeriko. Matei ma si Abiram, bunga tubuhni, sanggah na mambahen onjolanni; matei ma si Segub, anakni sianggian, sanggah na padearhon horbanganni romban hu bani hata ni Jahowa, na hinatahon-Ni hinan marhitei si Josua, anak ni si Nun.
<< 1 Raja-raja 16 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel