Alkitab Mobile SABDA
[VER] : [SIMALUNGUN]     [PL]  [PB] 
 <<  1 Yohanes 3 >> 

Partinandaan ni Anak ni Naibata Marimbang Anak ni Sibolis

1Tonggor nasiam ma banggal ni holong ni uhur na binere ni Bapa in banta, gabe targoran do hita anak ni Naibata, anjaha in do hita tongon. Halani ai, lang itanda dunia on hita, halani seng itanda Ia.

2Nasiam hinaholongan, anak ni Naibata do hita nuan, anjaha seng talar ope, barang na gabe aha do hita, tapi ibotoh hita do, anggo dob talar Ia, usih ma hita songon-Si, ai idahonta ma Ia, sonaha Ia sasintongni.

3Anjaha ganup, na marpangarapan sonin Bani, ipapansing ma dirini, songon Ia na pansing ai.

4Ganup na mangkorjahon dousa, panlanggar do ai homa bani titah, ai dousa, ai ma panlanggaron bani titah.

5Ibotoh nasiam do, laho mambuat dousanta do Ia ase roh; seng adong dousa ibagas Ia.

6Ganup na marianan ibagas Ia, seng mardousa; ganup sipardousa lape ongga ididah Ia, anjaha itanda pe lang Ia.

7Nasiam dakdanakku, ulang ma ipaoto-oto halak nasiam. Na mangkorjahon hapintoron, ai do na pintor, songon Ia na pintor ai.

8Halak sihorjahon dousa ai ma humbani sibolis, ai humbani mulani do mardousa sibolis in. Halani on do ase ipatalar Anak ni Naibata, ai ma laho mansedahon horja ni sibolis.

9Ganup, na dob tubuh humbani Naibata, seng mardousa, ai marianan do totap bani bonihni ai. Seng tarbahensi mardousa, ai na dob tubuh do ia humbani Naibata.

10Hunjon do boi tandaon anak ni Naibata pakon anak ni sibolis, ganup na so mangkorjahon hapintoron seng humbani Naibata ai, sonai homa na so marholong ni uhur bani hasomanni.

Holong do Padiparhon Hita hu Hagoluhan; Domdom Mambahen Totap ibagas Hamatean

11Ai on do barita na binogei nasiam humbani mulani, ase marsihaholongan hita.

12Ulang ma songon si Kain, na roh humbani na jahat ai, gabe ibunuh anggini. Aha do halani ase ibunuh ia? Halani jahat horjani, tapi horja ni anggini ai pintor.

13Ulang ma longang uhur nasiam sanina, anggo idomdomi dunia on nasiam.

14Ibotoh hita do, na dob mandipar hita hun hamatean hu hagoluhan, halani holong uhurta bani hasoman. Na so parholong ni uhur, marianan do totap ibagas hamatean.

15Barang ise na mardomdom bani hasomanni, sibunuh jolma do ai, anjaha ibotoh nasiam do, na so marianan totap hagoluhan na sadokah ni dokahni bani sagala sibunuh jolma.

16Hunjon do itanda hita holong ni uhur in, ai ma marhitei na binere-Ni ai hosah-Ni mangkopkop hita. Hita pe patut do bereonta hosahta mangkopkop hasomanta.

17Anggo adong halak na bayak, anjaha ididah hurangan hasomanni, hape itutup labah ni uhurni dompaksi, ija ma boi totap marianan holong ni uhur ni Naibata ibagas ia?

18Nasiam dakdanakku, ulang ma hatanta pakon dilahta mangkaholongi, tapi marhitei pambahenan ma ampa hasintongan.

Malas ni Uhur na Roh humbani Tenger ni Uhur bani Naibata

19Hunjon ma botohonta, paboa humbani hasintongan hita, anjaha ipatenger hita uhurta i lobeini,

20sanggah na manosal uhurta ibagas, “Banggalan do Naibata humbani uhurta anjaha ibotoh haganup.”

21Nasiam hinaholongan, anggo seng isalahkon uhurta hita, marhinsah ni uhur do hita i lobei ni Naibata.

22Anjaha barang aha pe ipangindo hita, jaloonta do hun Bani, halani iramotkon hita titah-Ni, anjaha ihorjahon hita rosuh ni uhur-Ni.

23Anjaha on do titah-Ni, ase porsaya hita bani goran ni Anak-Ni Jesus Kristus, anjaha marsihaholongan hita, songon na dob tinonahkon-Ni ai banta.

24Halak na manramotkon titah-Ni, ai do na marianan ibagas Ia, anjaha Naibata ibagas ia. Anjaha hunjon do ibotoh hita, na dob marianan Ia ibagas hita, ai ma humbani Tonduy in, na dob binere-Ni banta.



 <<  1 Yohanes 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel