Alkitab Mobile SABDA
[VER] : [SIMALUNGUN]     [PL]  [PB] 
 <<  2 Korintus 6 >> 

Pandalankon ni Apostel Paulus bani Jabatanni

1Songon hasoman parhorja, ipalumba hanami ma nasiam, ase ulang soya panjalo nasiam bani idop ni uhur ni Naibata,

2ai nini do, “Bani panorang idop ni uhur do ho hutangihon, anjaha bani panorang haluahon do ho huurupi. Tonggor ma, sonari ma panorang idop ni uhur, tonggor ma, sonari ma panorang haluahon.”

3Seng mambahen partolsuan hanami atap bani aha pe, ase ulang hona risa jabatannami.

4Ibagas haganup do ipatuduhkon hanami dirinami songon juakjuak ni Naibata: Ibagas hasabaron banggal, ibagas hamarsikon, ibagas hasunsahan, ibagas hasosakan,

5ibagas na hona pukul, ibagas na tartutup, ibagas hageoron, ibagas halojaon, ibagas mangkar ni mata, ibagas parpuasaon,

6ibagas hasusion, ibagas habotohon, ibagas lumbang ni uhur, ibagas habasaron, ibagas Tonduy Na Pansing, ibagas holong ni uhur na so marsipahulah-hulah,

7ibagas hata hasintongan, ibagas hagogohon ni Naibata, ai ma marhitei sinjata hapintoron i siamun ampa i sambilou;

8marhitei na tarpuji ampa na hona parpahiri, marhitei hata-hata na masambor ampa hata na madear; songon halak na pakahouhon, hape parsintong do;

9songon na so tinanda, hape na tinanda do; songon na laho matei, hape tonggor ma manggoluh do; songon halak na niarsik-arsik, hape seng tarbunuh;

10songon na marhoru, hape tongtong do marmalas ni uhur; songon na miskin, hape buei do na ipabayak; songon na so marnadong, hape haganup do adong bani.

Ipangindo si Paulus Holong Pambalason humbani Kuria Korint

11Torang-torang do panluarnami bani nasiam, halak Korint, ungkab do uhurnami.

12Seng sompit uhurnami mangidah nasiam, tapi uhur nasiam do na sompit.

13Songon na bani anakku do hatangkon, “Balos na dos hujai ma homa bahen nasiam: Palumbang nasiam ma homa uhur nasiam!”

Pasal Goluh Hapansingon

14Ulang ma sapasangan nasiam pakon na so porsaya! Ai aha ma pardomuan ni hapintoron ampa na so uhum, anjaha aha ma parsaoran ni haliharon ampa hagolapan?

15Aha ma pardomuan ni Kristus ampa Belial? Aha ma hasadaon ni na porsaya ampa na so porsaya?

16Mintor ra ma mardomu rumah na mapansing ni Naibata ampa sisombah-sombahon? Ai hita do rumah na mapansing ni Naibata na manggoluh in, songon na hinatahon ni Naibata, “Sihol marianan do Ahu i tongah-tongah ni sidea anjaha mardalani, gabe Naibata ni sidea ma Ahu, anjaha sidea gabe bangsang-Ku.”

17“Halani ai, luar ma hanima hun tongah-tongah ni sidea, anjaha paholang hanima ma dirinima,” nini Tuhan in, “Ulang ma jamah hanima na butak, ase Hujalo hanima!”

18“Jadi gabe Bapa ma Ahu bannima, anjaha hanima gabe anak ampa boru Bangku,” nini Tuhan, Sigomgom haganup.



 <<  2 Korintus 6 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel