Ojur-ojur Patumpu Tumpak bani Kuria na i Jerusalem
1Tapi nasiam sanina, ipabotohkon hanami ma bani nasiam pasal idop ni uhur ni Naibata, na binere-Ni bani kuria-kuria na i Makedonia.
2Ai age pe ibagas parlajouan ampa sitaronon banggal sidea, tapi ibagas haganupan ai malas tumang do uhur ni sidea, gabe surung do halayakon ni sidea, age pe miskin tumang sidea.
3Ibere sidea do domu hubani na tarbahen sidea, husaksihon do ai, lobih humbani na tarbahen sidea tene, humbani rosuh ni sidea.
4Gogoh do ipindo sidea hun bannami, ase boi dihut sidea mandalankon horja idop ni uhur, laho mangurupi halak na mapansing ai.
5Anjaha lobih humbani na niarapkonnami, ai diri ni sidea do parlobei ibere sidea bani Tuhan in, pakon hu bannami, domu hubani rosuh ni Naibata,
6gabe iojur hanami ma si Titus, ase itoruskon i tongah-tongah nasiam horja idop ni uhur on, songon na dob pinungkahni hinan.
7Tapi songon bani haganup marhasurungan nasiam, ai ma bani haporsayaon, bani hata, bani habotohon, bani sagala haringgason, bani holong dompak hanami, sihol ma sonai hasurungan nasiam age bani horja idop ni uhur on.
8Sedo songon parentah hatangkon, tapi laho manguji sintong ni holong ni uhur nasiam do marimbang habujuron ni halak na legan.
9Ai ibotoh nasiam do idop ni uhur ni Tuhanta Jesus Kristus, na bayak hinan, gabe miskin halani nasiam, ase bayak nasiam halani sombuh-Ni ai.
10Ibagas pahara on sonon do pingkiranku, sihatahononku, “Dear ma ai bani nasiam, ai domma ipungkah nasiam tahun na salpu, sedo pitah na mandalankon, tapi dihut do na mansurahon.”
11Ase sonari pe dalankon nasiam ma homa in, ase songon porlu ni uhur laho manriahkon, sonai ma homa mandalankon, domu hubani na tarbahen.
12Ai anggo adong porlu ni uhur, sihamalaskononkon do ai domu hubani na adong, seng domu hubani na so adong.
13Artini ai sedo ase sonang na legan, hape susah nasiam; marsipadosan ma namin.
14Anggo sonari na lobih bani nasiam ma manggoki na hurang bani sidea, ase na lobih bani sidea manggoki na hurang bani nasiam, ase dos,
15songon na tarsurat in, “Na marnah na buei seng marlobih-lobih, anjaha na marnah na otik seng hurangan.”
Parsuruh bani si Titus
16Tapi tarima kasih ma bani Naibata, na mamberehon ringgas ni uhur na sonin hubagas uhur ni si Titus, laho mangkopkop nasiam.
17Na ra do ia ojuron, anjaha lambin hinsah do uhurni roh marayak nasiam humbani rosuhni sandiri.
18Anjaha rap pakonsi isuruh hanami do sanina in, na tarpuji bani ganup kuria in, halani Ambilan Na Madear in.
19Anjaha seng pitah ai, tapi na ipabangkit kuria in do ia mangkasomani hanami bani horja idop ni uhur on, na idalankon hanami bahen hasangapon ni Tuhan in ampa laho patuduhkon ringgas ni uhurnami.
20Ibahen hanami sonai, ase ulang adong na mangkata-hatai hanami pasal tumpak na banggal, na nidalankonnami,
21ai ipingkiri hanami do na madear, seng pitah i lobei ni Tuhan in, tapi dihut do homa i lobei ni jolma.
22Anjaha rap pakon sidea isuruh hanami do saninanami na legan, dob gati iuji hanami ringgas ni uhurni ibagas buei pahara, anjaha sonari lambin tambah do ringgas ni uhurni, halani banggal ni tenger ni uhurni bani nasiam.
23Ia si Titus, ai ma hasomanku anjaha hasoman sahorja bani nasiam, anjaha hasomannami ai, ai ma suruhan ni kuria-kuria, sipasangap Kristus.
24Ai pe, pataridahkon nasiam ma bani sidea holong ni uhur nasiam ampa pamujinami bani nasiam, i lobei ni kuria in!
<< 2 Korintus 8 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel