Partalu ni Jerusalem ampa Habuangan hu Babel
1Anjaha pasiahtahunkon dob bangkit raja ia, bani bulan sapuluh, ari sapuluh, roh ma si Nebukadnesar, raja ni Babel, rap pakon balani marporang dompak Jerusalem, anjaha ihubu sidea ma huta ai, ipauli sidea ma batar-batar inggot huta ai.
2Jadi tarhubu ma huta ai das ronsi pasapuluh-sadatahunkon, dob manrajai si Sedekia.
3Ari siah bulan ompat masa ma lohei na parah i huta ai, pala seng dong be ruti panganon ni bangsa parnagori in.
4Dob ai ibahen ma sada dalan halopusan ibagas tembok ni huta ai; maporus ma raja ai pakon ganup siimbang munsuh borngin-borngin hun horbangan na i holangkolang ni tembok na dua ai, na i lambung pohon ni raja ai, tapi ihubu halak Kasdim do huta ai inggot. Laho ma sidea dompak Arabah.
5Tapi iayak bala ni halak Kasdim do raja ai, anjaha dapot ma ia i pamah ni Jeriko; anjaha ganup balani ai merap ma hun lambungni.
6Itangkap sidea ma raja ai, anjaha iboan ma ia hu bani raja ni Babel i Ribla, na mandabuh uhum bani.
7Ibunuh sidea ma anak ni si Sedekia i lobei ni matani; tapi ipitungkon do mata ni si Sedekia haduasi, anjaha irantei ma ia. Sonai ma ia iboban hu Babel.
8Ari papituhon bulan lima, ai ma pasapuluh-siahtahunkon dob manrajai Raja Nebukadnesar, raja ni Babel, roh ma si Nebusaradan, kopala ni pangawal, juakjuak ni Raja Babel, hu Jerusalem.
9Itutung ma Rumah ni Jahowa, pakon rumah ni raja ai ampa ganup rumah na i Jerusalem; itutung ma ganup rumah na banggal.
10Iparreong ganup bala ni halak Kasdim, na rap pakon kopala ni pangawal ai ma tembok, inggot ni Jerusalem ai.
11Ia bangsa na teba ai, na tading ope ibagas huta ai, pakon sagala halak na lintun ai marayak raja ni Babel rap pakon na teba ai hun bani halak na mabuei ai, iboan si Nebusaradan, kopala ni pangawal ai ma ganupan ai hu habuangan.
12Tapi itadingkon kopala ni pangawal ai do deba hun bani halak sisombuhan na i nagori ai, gabe sihorjai pohon anggur ampa sihorjai juma.
13Anjaha iparrosak halak Kasdim ai do tiang tombaga na i Rumah ni Jahowa, pakon onjolan ampa bongbongan tombaga, na i Rumah ni Jahowa, lanjar iboan ma tombaga ai hu Babel.
14Sonai homa hudon, sonduk, pisou, mangkuk pakon sagala parugas hun bani tombaga, na pinakei marugas i rumah panumbahan, dihut do iboban.
15Sonai homa balanga panutungan ni dahupa pakon mangkuk pamispisan, sagala na hun bani omas pakon sagala na hun bani pirak, ibuat kopala ni pangawal ai do.
16Sonai homa tiang na dua ai pakon bongbongan na sada ampa onjolanni ai, na pinauli ni si Salomo bani Rumah ni Jahowa, sabonar na so tartimbang do buei ni tombaga ni ganup parugas ai.
17Sapuluh ualuh asta do gijang ni sada tiang, anjaha ulu ni tiang na i atas ni ai pe tombaga do; lima asta do gijang ni ulu ni tiang ai; adong do jala-jala pakon buah ni dalima inggot ulu ni tiang ai. Usih hujai do tiang na paduahon ai, pakon jala-jala ai.
18Anjaha iboan kopala ni pangawal ai do sintua ni Malim Seraya, pakon si Sefanya, malim paidua, ampa sitolu halak sijaga labah ai.
19Iboan do homa hunbagas huta ai sada halak siramotkon rumah, ai ma na mangopalai halak siparmunsuh, pakon lima halak hasoman sapanriah ni raja ai, na jumpah ibagas huta ai; sonai homa jurutulis ni sipambobai ni bala ai, na mandilo halak parnagori ai gabe tantara; sonai homa onom puluh halak hun bani bangsa parnagori ai, na jumpah ibagas huta ai.
20Iboan si Nebusaradan, kopala ni pangawal ai ma sidea hu raja ni Babel i Ribla.
21Ihatahon raja ni Babel ma sidea bunuhon i Ribla, i tanoh Hamat. Sonai ma parbuang ni Juda hun tanohni.
Si Gedalya Bangkit Manrajai
22Tapi pasal bangsa na tading ai ope i tanoh Juda, na tinadingkon ni si Nebukadnesar, raja hun Babel, ipabangkit ma si Gedalya, anak ni si Ahikam, anak ni si Safan manggomgom sidea.
23Jadi dob ibogei pambobai ni bala pakon bala ni sidea, na dob ipabangkit raja ni Babel si Gedalya, roh ma sidea marayak si Gedalya hu Mispa, ai ma si Ismael anak ni si Netania, pakon si Johanan, anak ni si Korea, pakon si Seraya, anak ni si Tanhumet halak Netopat ai, pakon si Jaasania anak ni halak Maahat ai, rap pakon halak hasoman ni sidea ai.
24Dob ai marbulawan ma si Gedalya hu bani sidea pakon hu bani halak hasoman ni sidea ai, nini ma, “Ulang ma nasiam mabiar mangidah gamot-gamot ni halak Kasdim; marianan ma nasiam i nagori on, anjaha balosi nasiam ma raja ni Babel, jadi sonang ma nasiam.”
25Tapi papitubulankon roh ma si Ismael, anak ni si Netania, anak ni Elisama, hun bani ginompar ni raja ai, rap pakon sapuluh halak hasomanni, gabe idorab anjaha ibunuh sidea ma si Gedalya pakon halak Jahudi ampa halak Kasdim na rap pakonsi i Mispa.
26Dob ai bingkat ma ganup rayat ai, na etek na banggal, pakon pambobai ni bala ai, maporus ma sidea hu Masir, ai mabiar do sidea hu bani halak Kasdim.
Dapotan Idop ni Uhur si Joyakin
27Dob ai patolupuluh-pitutahunkon dob tarbuang si Joyakin, raja ni Juda, ari dua puluh pitu, bulan sapuluh dua, iidopi si Evil-Merodak, raja ni Babel ma si Joyakin raja ni Juda bani tahun parlobei ni parrajaionni, gabe ipadarat ma ia hun tutupan.
28Basar do ia hu bani, anjaha gijangan do ibahen paratas ni hun bani paratas ni raja-raja na rap pakonsi i Babel.
29Bulih do tanggalonni pakeian tutupanni ai, anjaha sapanganan do ia tongtong rap pakon raja ai sadokah manggoluh ia.
30Anjaha siap arian do ibere raja ai bani bohalni, na dob tinotapkon hinan, barang sadia na porlu bani, sadokah manggoluh ia.
<< 2 Raja-raja 25 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel