Si Jehu gabe Raja ni Israel
1Dob ai idilo si Elisa ma sahalak hun bani susian ni nabi, nini ma hu bani, “Gonditi ma binongeimu, anjaha boan ma guri-gurimu na marisi minak ibagas tanganmu, anjaha laho ma ho hu Ramot-Gilead.
2Anggo das ma ho hujai pindahi ma ijai si Jehu, anak ni si Josafat, anak ni si Nimsi; masuk ma ho anjaha hatahon ma ia jongjong hun tongah-tongah ni hasomanni, anjaha arahkon ma ia hu kamar partongah-tongah.
3Dob ai buat ma guri-guri na marisi minak, anjaha useihon ma hu uluni, anjaha hatahon ma, sonon do hata ni Jahowa, ʻHuminaki ma ham gabe raja manggomgom Israel!ʼ Dob ai ungkab ma labah ai, anjaha maporus ma ho, ulang marsaran-saran.”
4Dob ai laho ma anak garama, susian ni nabi ai, hu Ramot-Gilead.
5Jadi dob das ia, tonggor ma, hundul-hundul ma jumpahsi pambobai-pambobai ni bala ijai, anjaha nini ma, “Adong do hata sihatahononku bamu, ham puanglimanami!” Dob ai nini si Jehu ma, “Hu bani ise hun bannami on?” Jadi nini ma, “Hu bamu, ham puanglimanami!”
6Jadi jongjong ma ia anjaha masuk hu rumah ai. Dob ai iuseihon anak garama ai ma minak ai hu bani uluni, anjaha nini ma hu bani, “Sonon do hata ni Jahowa, Naibata ni Israel, ʻAhu do maminaki ho gabe raja manggomgom bangsang-Ku, ai ma Israel.
7Maningon siap do bahenonmu ginompar ni si Ahab, tuanmu ai, ase Hubalaskon hu bani si Isebel daroh ni jabolon-Ku, ai ma nabi-nabi, pakon daroh ni haganup jabolon ni Jahowa.
8Maningon siap do ganup ginompar ni si Ahab; sasapkonon-Ku do hun bani si Ahab sagala dalahi, na poso pakon na magodang i Israel.
9Maningon siap do bahenon-Ku ginompar ni si Ahab, usih songon ginompar ni si Jerobeam, anak ni si Nebat, anjaha songon ginompar ni si Baesa, anak ni si Ahia.
10Anjaha maningon bois do si Isebel panganon ni baliang i ladang ni Jesreel, anjaha ise pe lang na mananomsi.ʼ” Dob ai iungkab ma labah ai lanjar maporus ma ia.
11Dob luar si Jehu hu bani juakjuakni, nini sidea ma hu bani, “Damei do? Mase roh halak na podouan in bamu?” Jadi nini ma mambalosi sidea, “Itandai nasiam do dalahi ai pakon hasahaponni?”
12Nini sidea ma, “Seng tongon ai; patugah ham ma bannami!” Jadi nini ma, “Sonon do hatani hu bangku, ʻSonon do hata ni Jahowa: Huminaki do ho gabe raja ni Israel.ʼ”
13Jadi tarolos ma sidea ganup mambuat pakeianni bei, anjaha ipaherbang ma ai i toruh ni bahen tutup ni talkah ni andar ai, isompul sidea ma tarompet anjaha isurakkon ma, “Domma bangkit raja si Jehu!”
14Jadi ibahen si Jehu, anak ni si Josafat, anak ni si Nimsi ai ma partahi-tahian mangimbang si Joram. Tapi anggo si Joram pakon haganup halak Israel marjaga-jaga do i Ramot-Gilead dompak si Hasael, raja ni Aram.
15Anjaha domma mulak hinan Raja Joram laho patambarhon dirini hun bani ugah, na binahen ni halak Aram bani, sanggah na marporang ia dompak si Hasael raja ni Aram. Dob ai nini si Jehu ma, “Anggo sonai ma uhur nasiam, ulang ma lopas nasiam age sahalak laho hun huta on patugahkon na masa on hu Jesreel.”
Parmatei ni si Joram pakon si Ahasya
16Dob ai inaiki si Jehu ma garetani, anjaha laho ma ia hu Jesreel, ai ijai do tibal si Joram. Anjaha si Ahasya pe, raja ni Juda, domma tuad manonggor si Joram.
17Tapi jongjong ma parjaga ai i atas manara i Jesreel, anjaha dob iidah roh bala ni si Jehu, nini ma, “Huidah do roh sada hulanan ni bala!” Dob ai nini si Joram ma, “Buat ma sada parhuda anjaha suruh ma ia manjumpahkon sidea lanjar manungkun, ʻDamei do?ʼ”
18Jadi bingkat ma sahalak siajak huda manjumpahkonsi, anjaha nini ma, “Sonon do hata ni raja in, ʻDamei do?ʼ” Jadi nini si Jehu ma, “Aha porluni bam damei atap lang? Husor hudamu, irikkon ahu!” Dob ai marsahap ma sipanjaga ai, nini ma, “Domma das namin suruhan ai bani sidea, tapi seng mulak ia.”
19Dob ai isuruh ma siajak huda na legan, na mangkatahon bani sidea, dob das ia, “Sonon do hata ni raja ai, ʻDamei do?ʼ” Jadi nini si Jehu ma, “Aha porluni bam damei atap lang? Husor hudamu irikkon ahu!”
20Dob ai ipatugah siparjaga ai ma use, nini ma, “Das do namin suruhan ai bani sidea, tapi seng mulak ia. Songon pangajak ni halak na mabuk do pangajakni.”
21Nini si Joram ma, “Pasang gareta!” Ipasang ma garetani, dob ai bingkat ma si Joram, Raja Israel, rap pakon si Ahasya, Raja Juda, ganup bani garetani bei, luar ma sidea manjumpahkon si Jehu, gabe pajumpah ma sidea pakonsi i ladang ni si Nabot, halak Jesreel ai.
22Jadi dob iidah si Joram si Jehu, nini ma, “Damei do Jehu?” Nini ma mambalosi, “Sonaha ma pardameini, sadokah inunut inangmu si Isebel mangkorjahon parbangkison pakon ujar-ujaran?”
23Dob ai ipahusor si Joram ma hudani sihol maporus, anjaha nini ma hu bani si Ahasya, “Partahi-tahion do hape Ahasya!”
24Tapi isintak si Jehu ma panahni, ipanah ma si Joram gabe hona ma holangkolang ni sasapni anjaha itolpus lingkitni ai ma pusu-pusuni, gabe tompas ma ia ibagas garetani ai.
25Nini si Jehu ma hu bani si Bidekar, juakjuakni ai, “Angkat nasiam ma ia anjaha gijigkon ma ia hu ladang ni si Nabot, halak Jesreel ai, halani ingat ma, sanggah na margareta ondi hita rap, i pudi ni si Ahab, bapani ondi, sanggah na nilumbahon ni Jahowa hata on pasalsi,
26ʻTongon, halani domma Huidah nantuari daroh ni si Nabot pakon anakni, nini Jahowa, maningon balaskonon-Ku do in bam i ladang on.ʼ Halani ai buat ma ia, gijigkon ma ia hu ladang ai, romban hu bani hata ni Jahowa.ʼ”
27Dob iidah si Ahasya, Raja Juda ai, maporus ma ia dompak Bet-Hagan. Tapi iayak si Jehu ma ia, anjaha nini ma, “Ia pe maningon bunuhon do!” Ipanah sidea ma ia i atas garetani i tangkogan Gur, dohorhon Jibleam. Maporus ma raja ai hu Megiddo, gabe matei ijai.
28Dob ai igaretahon juakjuakni ma ia hu Jerusalem, anjaha itanom ma ia bani tanomanni rap pakon ompungni i huta ni si Daud.
29Pasapuluh-sadatahunkon dob raja si Joram, anak ni si Ahab, ijai ma mulai si Ahasya manggomgom Juda.
Parmatei ni si Isebel
30Jadi das ma si Jehu hu Jesreel. Dob ibogei si Isebel ai, ipajenges ma matani, iugasi ma jambulanni, anjaha manungkir-nungkir ma ia hun jandela.
31Jadi dob imasuki si Jehu horbangan ai, nini si Isebel ma, “Damei do, Simri, sibunuh tuanni?”
32Dob ai mangkawah ma ia dompak jandela ai, anjaha nini ma, “Ise do hampit ahu? Ise do?” Jadi dob mangkawah dua tolu halak juakjuak ni raja ai dompaksi,
33nini ma, “Dabuhkon nasiam ma ia hunjin hu toruh!” Jadi idabuhkon sidea ma ia hu toruh, gabe marbirsak ma deba hun bani darohni ai hu tembok pakon hu bani huda ai, gabe idogei-dogei huda ai ma ia.
34Dob sonai laho ma ia hu rumah mangan minum, dob ai nini ma, “Torih nasiam ma lobei naboru pinapaan ni Naibata ai, anjaha tanom nasiam ma ia, ai boru ni raja do ia.”
35Tapi dob laho sidea sihol mananomsi namin, hape seng dong jumpah sidea be sobali tangkurakni pakon tapak-tapak ni naheini ampa tanganni.
36Dob mulak sidea patugahkon ai bani si Jehu, gabe ibalosi ma, “Sonai do hata ni Jahowa, na dob nilumbahon-Ni hinan marhitei juakjuak-Ni si Elias, halak Tisbi ondi, sanggah na hinatahon-Ni, ʻManingon i ladang ni Jesreel bois panganon ni baliang daging ni si Isebel,
37anjaha bangkei ni si Isebel ai, maningon gabe hubang ma ai i Jesreel, gabe seng tarhatahon halak be: On do si Isebel.ʼ”
<< 2 Raja-raja 9 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel