Hata Parpudi hun bani si Daud
1On ma hata na parpudi hun bani si Daud, “Nini si Daud anak ni si Isai ma, ai ma halak na pinatimbul daoh hu atas, ai ma halak na mininakan ni Naibata ni si Jakob, halak parpsalm, haudungan i Israel;
2Tonduy ni Jahowa do marsahap ibagas ahu, anjaha ibagas pamanganku do hata-Ni.
3Domma marsahap Naibata ni si Jakob, nini Batu Gingging ni Israel do hu bangku, ʻBarang ise na sintong panrajaionni bani jolma, na manrajai ibagas biar mangidah Jahowa,
4marsinalsal ma ia songon sindar sogod-sogod, songon mata ni ari bani langit na so marhombun, na mambahen martumbor poyon-poyon hun tanoh dob salpu udan.ʼ
5Ai lang sonai do tene parjongjong ni ginomparhu i lobei ni Jahowa? Ai domma ibahen padan sisadokah ni dokahni bangku, iatur ibagas haganup anjaha iramotkon. Halani ai mintor lang ma tumpakan-Ni haganup, bahen haluahon pakon siharosuhkononkon bangku?
6Tapi anggo halak na so margagan, songon suga-suga na niambungkon do sidea haganup, seng dong halak na ra manjamah;
7nai ma, seng dong na ra manjamah sidea, anggo seng mamakei bosi pakon pordah ni tanja, anjaha bois sidea imosogi ibagas apuy.
Puanglima ni si Daud
8On do goran-goran ni puanglima ni si Daud: Si Isbaal, halak Hakmoni, kopala ni tolu halak pambobai; idiharhon do tanjani dompak ualuh ratus halak na binunuhni santorap.
9Dob ia, ai ma si Eleasar, anak ni si Dodo, halak Ahohi; sada hun bani pambobai sitolu halak ai do ia. Rap pakon si Daud do ia i Pas-Dammim, sanggah na roh halak Palistim, na roh martumpu hujai laho marporang, sanggah na mundur ai halak Israel,
10martahan do anggo ia, anjaha itampuli ma halak Palistim das bani na loja tanganni, das bani na longkot tanganni ai bani podang ai; hamonangan banggal do na binahen ni Jahowa sadarini ai. Dob ai marmulakan ma halak simbuei ai mangirikkonsi, mambuati ugas-ugas ni na binunuh ai mando.
11Dob ai si Samma, anak ni si Age, halak Harar. Bani na sahali martumpu ma halak Palistim i Lehi, adong do ijai sanlambar juma gok dali. Sanggah na mundur ai halak simbuei hun lobei ni halak Palistim,
12gabe roh ma ia jongjong hu tongah-tongah ni juma ai martahankon ai, anjaha ibunuhi ma halak Palistim ai; sonai ma ibere Jahowa sada hamonangan bolon.
13Sahali roh ma tolu halak hun bani na tolu puluh halak kopala-kopala ai marayak si Daud hu liang Adullam, sanggah parmulaan ni pariama, anjaha tudu do marsaran bala ni halak Palistim i hondot Refaim.
14Bani parbatar-bataran do ijia si Daud, anjaha bala ni halak Palistim i Betlehem do ijia.
15Tubuh ma sir ni uhur ni si Daud, jadi nini ma, “Ise ma na ra mambere bah inumonku hun parigi na i Betlehem, na i lambung ni horbangan ai?”
16Dob ai ilondas na tolu puanglima ai ma parsaranan ni halak Palistim ai, anjaha itahui ma bah hun parigi na i Betlehem dohorhon horbangan ai, anjaha iboan ma ai das hu bani si Daud; tapi seng ra ia manginum ai, iuseihon do ai bahen galangan bani Jahowa,
17anjaha nini ma, “Daoh ma in hun bangku, ham Jahowa, mambahen na sonin. Mintor inumonku ma daroh ni halak na laho mangasamkon hosahni? Halani ai seng ra ia manginum ai. Ai ma na binahen ni na tolu puanglima ai.”
18Ia si Abisai, anggi ni si Joab, anak ni si Seruya, kopala ni sitolu puluh halak pambobai ai do ia; idiharhon do tanjani dompak tolu ratus halak laho mambunuh sidea, gabe tarambilan ma ia i tongah-tongah ni na tolu puluh halak ai.
19Ia do simurmuran hun bani na tolu puluh halak ai, halani ai ia do gabe kopala ni sidea; tapi seng ope songon sitolu halak ai ia.
20Si Benaya pe, anak ni si Joyada, sahalak na pangkar anjaha sibuei pambahenan do ia, parhuta Kabsel. Ibunuh do dua puanglima ni Moab; tuad do ia bani sada godung laho mamunuh sada singa sanggah musim salju.
21Ia do homa na mamunuh sada halak Masir, na ganjang bolon. Adong do tanja bani tangan ni halak Masir ai; tapi tuad ma si Benaya manjumpahkonsi mamboan sada tungkot, irampas ma tanja ai hun tanganni, anjaha ibunuh ma ia marhitei tanjani ai sandiri.
22Ai ma na binahen ni si Benaya, anak ni si Joyada, mambahen sangap ia i tongah-tongah ni puanglima na tolu puluh halak ai.
23Sangap do ia i tongah-tongah ni na tolu puluh halak ai, tapi seng ope anggo songon sitolu halak ai. Jadi ibahen si Daud ma ia gabe kopala ni pangawal.
24Masuk hu bani na tolu puluh halak ai do si Asahel, anggi ni si Joab; si Elkanan anak ni si Dodo, hun Betlehem;
25si Sama hun Harod; si Elika, hun Harod;
26si Heles, hun Pelet; si Ira, anak ni si Ikes, hun Tekoa;
27si Abieser, hun Anatot; si Sibikai, hun Husa;
28si Salmon, hun Ahoah; si Maharai, hun Netopa;
29si Heleb, anak ni si Baana, hun Netopa; si Ittai, anak ni si Ribai, hun Gibea-Benyamin;
30si Benaya, hun Piraton; si Hidai hun habungan Gaas;
31si Abialbon, hun Bet-Araba; si Asmawet, hun Bahurim;
32si Elyaba hun Saalbon; si Jasen halak Gun; si Jonatan,
33anak ni si Samma, hun Harar; si Ahiam anak ni si Sarar, hun Harar;
34si Elifeled, anak ni si Ahasbai, hun Mahaka; si Eliam, anak ni si Ahitopel hun Gilo;
35si Hesro, hun Karmel; si Parai, hun Arab;
36si Yigal anak ni si Natan, hun Soba; si Bani, hun Gad;
37si Selek, halak Ammon; si Naharai hun Beerot, siusung sinjata ni si Joab, anak ni si Seruya;
38si Ira, hun Jattir, si Gareb hun Jattir,
39si Uria, halak Het; tolu puluh pitu halak ganupan.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel