Alkitab Mobile SABDA
[VER] : [SIMALUNGUN]     [PL]  [PB] 
 <<  2 Samuel 9 >> 

Si Daud pakon si Mepiboset

1Nini si Daud ma manungkun, “Adong ope nani tading-tadingan ni Raja Saul, ase hupatuduhkon bani idop ni uhur, halani si Jonatan?”

2Jadi adong ma sada juakjuak i rumah ni si Saul hinan, na margoran si Siba, gabe tardilo ma ia hulobei ni si Daud. Dob ai nini raja ai ma hu bani, “Atene, ho do na margoran si Siba?” Nini ma mambalosi, “Ahu ma da, jabolonmu!”

3Nini raja ai ma, “Atene, adong ope tading-tadingan ni si Saul, ase hubahen bani idop ni uhur na hun bani Naibata?” Nini si Siba ma mambalosi raja ai, “Adong ope sada anak ni si Jonatan, repat do naheini duasi.”

4Dob ai nini raja ai ma hu bani, “Ija do ia?” Nini si Siba mambalosi raja ai, “Tonggor ma, i Lodebar do ia, tondok bani si Makir, anak ni si Ammiel.”

5Dob ai isuruh Raja Daud ma suruhanni laho mangalopi hun rumah ni si Makir, anak ni si Ammiel na hun Lodebar.

6Jadi dob das si Mepiboset anak ni si Jonatan, anak ni si Saul hu bani si Daud, manrogop ma ia manombahsi. Tapi nini si Daud ma, “Mepiboset!” Nini ma mambalosisi, “Ijon do ahu, jabolonmu!”

7Nini si Daud ma hu bani, “Ulang ma ho mabiar, ai sihol bahenonku do bam idop ni uhur, halani si Jonatan bapamu ondi, anjaha sihol paulakonku do bam ganup tanoh ni si Saul ompungmu ondi, anjaha rapkon ahu ma ho tongtong mangan.”

8Jadi marsombah ma ia, lanjar nini ma, “Ise ma ahu jabolonmu on, ase pala ma dompakkononmu baliang na matei songon ahu on?”

9Dob ai idilo raja ai ma si Siba, juakjuak ni si Saul, anjaha nini ma hu bani, “Sagala na bani si Saul pakon na bani rumahni hinan domma hubere hu bani anak ni tuanmu.

10Halani ai maningon horjahononmu do tanoh ai bani, ho pakon anakmu ampa jabolonmu, anjaha patumpu ma gogohni, ase adong hagoluhon ni anak ni tuanmu. Ia si Mepiboset, anak ni tuanmu, maningon rapkon ahu ma ia tongtong mangan. Adong do bani si Siba sapuluh lima anak pakon dua puluh jabolon.”

11Dob ai nini si Siba ma dompak raja ai, “Songon na pinarentahkon ni tuanku, raja in hu bani jabolonni, maningon sonai do bahenon ni jabolonmu on.” Ase rap mangan ma si Mepiboset ampa si Daud, songon sada hun bani anak ni raja ai.

12Adong do bani si Mepiboset sada anak na etek-etek, na margoran si Mika. Tapi ganup na marianan i rumah ni si Siba jabolon ni si Mepiboset do.

13Ase marianan i Jerusalem ma si Mepiboset ai tongtong do ia rap mangan pakon raja ai; tapi repat do naheini.



 <<  2 Samuel 9 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran