Alkitab Mobile SABDA
[VER] : [SIMALUNGUN]     [PL]  [PB] 
 <<  Amos 3 >> 

Humbani Naibata do Hata Panjahaion

1Tangar nasiam ma hata on na hinatahon ni Jahowa pasal nasiam, alo nasiam halak Israel, pasal ganup bangsa in, na huarahkon luar hun tanoh Masir,

2“Pitah hanima do na Hutandai humbani sagala bangsa na i tanoh on, halani ai balaskonon-Ku ma bannima sagala hajahatonnima ai.

3Mintor tumaram ma odor dua halak mardalan anggo seng parlobei mardos ni uhur sidea?

4Mintor tumaram ma maraum singa ibagas harangan anggo seng dong sorohanni? Mintor tumaram ma pamalingon ni anak ni singa sorani humbagas liangni, anggo seng dong na jumpahsi?

5Mintor tumaram ma madabuh manuk-manuk bani tirangkap i tanoh, anggo seng dong sigiutini? Mintor tumaram ma tolkas siding ai hun tanoh, anggo seng dong dapotsi?

6Mintor tumaram ma hona sompul tarompit ibagas huta, lang gobir halak? Mintor tumaram ma masa parmaraan ibagas huta, na so binahen ni Jahowa?

7Tongon tene, seng dong ipamasa Tuhan Jahowa, anggo lang palobei ipatalar rusia-Ni bani nabi, juakjuak-Ni ai.

8Maraum singa, ise na so mabiar? Marsahap Tuhan Jahowa, ise ma na so manjahai?

Uhum Halani Hagedukon ni Israel

9Pabogeihon nasiam ma hubani benteng-benteng na i Assur ampa hubani benteng-benteng na i tanoh Masir, anjaha hatahon ma, “Martumpu ma nasiam hu atas dolog ni Samaria, anjaha idah nasiam ma hageoron bolon na ibagas ai, ampa pandorunon na i tongah-tongahni.

10Seng ibotoh sidea be mambahen na pintor,” nini Jahowa; “Ipajunjun sidea do panamunon ampa hagedukon ibagas benteng-benteng ni sidea.”

11Halani ai sonon do nini Tuhan Jahowa, “Munsuh ma manginggoti tanoh on, anjaha patoruhonni ma humbam partahananmu, anjaha ayobonni ma benteng-bentengmu.”

12Sonon do hata ni Jahowa, “Songon parpaluah ni parmahan hun babah ni singa dua hae-hae barang sangkibul pinggol, sonai do paluahon halak Israel, na hundul i suhi-suhi ni podoman ampa i atas ni tutup podoman na lambut.

13Tangar anjaha saksihon hanima ma in dompak rumah ni si Jakob,” nini Tuhan Jahowa, Naibata Zebaot.

14“Bani ari panguhum-Hu bani Israel halani hajahaton ni sidea ai, uhumon-Ku ma anjapanjap ni Betel, ponggolhonon-Ku ma ijai tanduk ni anjapanjap ai anjaha dabuh hu tanoh.

15Parsedaon-Ku ma rumah musim borgoh ampa rumah musim milas, magou ma rumah gading, anjaha masabkonon-Ku ma rumah-rumah bolon ai,” nini Jahowa.



 <<  Amos 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel