Alkitab Mobile SABDA
[VER] : [SIMALUNGUN]     [PL]  [PB] 
 <<  Bilangan 13 >> 

Parkahap na Sapuluh Dua Halak

1Dob ai nini Jahowa ma hubani si Musa,

2“Suruh ma dalahi mangkahapi tanoh Kanaan, na sihol layak-layakonon-Ku hubani halak Israel; humbani ganup marga mar sasaompung suruhonmu sahalak, ganup ai kopala do i tongah-tongah ni sidea.”

3Dob ai isuruh si Musa ma sidea hun halimisan Paran, romban hubani hata ni Jahowa, ganupan sidea kopala do i tongah-tongah ni halak Israel.

4Anjaha on ma goran ni sidea, “Si Sammua, anak ni si Sakkur humbani marga Ruben;

5si Safat, anak ni si Hori humbani marga Simeon;

6si Kaleb, anak ni si Jepunne humbani marga Juda;

7si Igeal, anak ni si Josep humbani marga Isasar;

8si Hosea, anak ni si Nun humbani marga Efraim;

9si Palti, anak ni si Rafu humbani marga Benjamin;

10si Gadiel, anak ni si Sodi humbani marga Sebulon;

11si Gadi, anak ni si Susi humbani marga Josep, ai ma humbani marga Manase;

12si Ammiel, anak ni si Gemali humbani marga Dan;

13si Setur, anak ni si Mikael, humbani marga Asser;

14si Nahbi, anak ni si Wafsi, humbani marga Naftali;

15si Gehuel, anak ni si Mahi, humbani marga Gad.

16Ai ma goran-goran ni dalahi, na sinuruh ni si Musa mangkahapi tanoh ai, tapi anggo si Hosea anak ni si Nun, igoran si Musa do ia si Josua.

17Jadi sanggah na sinuruh ni si Musa sidea laho mangkahapi tanoh Kanaan ai, nini ma hubani sidea, “Tangkog ma nasiam hu tanoh na hampit dangsina ai, tangkog ma nasiam homa hu tanoh pardologan.

18Papangkei nasiam ma atap sonaha do tanoh ai ronsi bangsa na marianan ijai, barang na gogoh do atap na galek, barang na otik do atap na buei;

19anjaha atap sonaha do tanoh na niianan ni sidea ai, barang na dear do atap na bajan, anjaha atap sonaha do huta na niianan ni sidea ai, barang lampolampo do ai barang huta na marbatar-batar;

20barang na lambutan do tanoh ai barang dorging, barang tubuhan hayu atap lang. Tenger ma uhur nasiam, anjaha boan nasiam ma humbani buah ni tanoh ai. Tudu do ijai panorang mambuat limbuah ni hayu anggur.”

21Dob ai tangkog ma sidea anjaha ikahapi ma tanoh ai singgan ni halimisan Sin das hu Rehob, das hu dalan na laho hu Hamat.

22Tangkog do sidea homa dompak tanoh dangsina, anjaha das sidea hu Hebron; ijai do si Ahiman, si Sesai pakon si Talmai, anak ni si Enak jumpah sidea. Ia Hebron pitu tahun do parlobei itombei humbani Zoan na i tanoh Masir.

23Dob ai das ma sidea hu habungan Eskol, anjaha itagil sidea ma ijai saraungan buah ni anggur, anjaha ipausungkon ma ai hubani dua halak na marlanja-lanja; iboan sidea ope buah ni dalima pakon hayu ara.

24Lanjar targoran do ianan ai habungan Eskol, halani buah ni anggur na saraungan ai, na tinagil ni halak Israel ijai.

Parmulak ni Parkahap

25Jadi dob salpu ompat puluh ari mulak ma sidea humbani na mangkahapi tanoh ai.

26Mulak ma sidea hubani si Musa pakon si Aron pakon hubani ganup tumpuan ni halak Israel, hu halimisan Paran, hu Kades; iboan sidea do barita hubani sidea pakon hubani ganup tumpuan ai, anjaha ipatuduh ma hubani sidea buah ni tanoh ai.

27Ibaritahon sidea ma hubani si Musa, “Domma das hanami hu tanoh, sinuruhmu sikahapannami, tanoh habaoran ni dadih pakon manisan ni lobah, anjaha on ma buahni ai.

28Tapi na gogoh tumang do bangsa na marianan i tanoh ai, hutani pe marbatar-batar do anjaha bolon-bolon, anjaha ididah hanami do homa anak ni si Enak ijai.

29Halak Amalek marianan hampit dangsina, anjaha halak Het, Jebusi pakon Amori marianan i dolog, anjaha halak Kanaan marianan i topi laut ampa dohorhon Jordan.”

30Tapi ipatenger si Kaleb do uhur ni bangsa ai i lobei ni si Musa, nini ma, “Tangkog ma hita torus anjaha soluk hita ma tanoh ai; ai tolap do hita patundukkon ai.

31Tapi nini dalahi na rap tangkog pakonsi ma, “Seng tarbahen hita tangkog mandorab bangsa ai, ai gogohan do sidea hun banta.”

32Dob ai ipararat sidea ma barita na masambor pasal tanoh na kinahapan ni sidea ai, nini ma, “Tanoh na binontas, na kinahapan ai, ai ma tanoh na mansundutkon pangisini, anjaha bangsa na nididahnami ijai, dalahi na ganjang tumang do.

33ididah hanami do homa ijai raksasa, anak ni si Enak, ai ma ginompar ni raksasa, hira balang do hanami ninuhurnami, sonai do homa ninuhur ni sidea.”



 <<  Bilangan 13 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel