Pangurasion Marhitei Abuan ni Lombu Sigerger
1Dob ai nini Jahowa ma hubani si Musa pakon hubani si Aron,
2“On ma aturan ni titah na tinonahkon ni Jahowa, hatahon ma halak Israel, ase itogu sidea bam sada lombu boru-boru sigerger na so marbutak barang marsining, anjaha na so ongga ampei pasangan bani.
3Anjaha maningon ondoskononmu ma ai hubani Malim Eleasar, itogu ma ai hu darat ni parsaranan ai, anjaha isayat i lobei ni.
4Buaton ni Malim Eleasar ai ma deba humbani darohni ai marhitei jari-jarini, anjaha ipispiskon ma deba humbani daroh ai dompak lampolampo partumpuan ai pitu hali.
5Itutung ma lombu ai i lobei ni; bobakni, sibukni, pakon darohni rap pakon ginagatni maningon tutungon do;
6dob ai buaton ni malim ai ma hayu ares pakon hisop ampa bonang sigerger anjaha igijigkon ma ai hu tongah-tongah ni panutungan ni lombu ai.
7Dob ai taptapan ni malim ai ma pakeanni anjaha paridionni angkulani ibagas bah, dob ai bulih ma ia masuk hu parsaranan ai, tapi maningon butak do ia ronsi bodari.
8Halak na manutung lombu ai pe, maningon taptaponni do pakeanni bani bah, anjaha paridionni angkulani ibagas bah, anjaha maningon butak do ia ronsi bodari.
9Anjaha ipatumpu sada dalahi na dob niuras ma abuan ni lombu ai, anjaha inahkon ma ai hu darat ni parsaranan ai bani sada ianan na pansing; anjaha isimpan ma ai ijai bani halak Israel bahen pulungan ni bah pangurasion, ai galangan pardousaon do ai.
10Anjaha dalahi na dob patumpuhon abuan ni lombu ai maningon taptaponni ma pakeanni anjaha butak ma ia ronsi bodari, anjaha gabe aturan na totap ma ai bani halak Israel ampa bani halak panginsolat, na manginsolat i tongah-tongah ni sidea.
11Barang ise na manjamah bangkei ni halak na dob matei, maningon butak ia pitu ari dokahni;
12maningon urasonni dirini bani bah ai bani ari patoluhon pakon bani ari papituhon, ase pansing ia; tapi anggo seng iurasi dirini bani ari patoluhon pakon bani ari papituhon, seng anjai borsih ia.
13Barang ise na manjamah halak na dob matei, bangkei ni sada halak na dob matei, anjaha seng iurasi dirini, na pabutak ianan ni Jahowa do ia ai, anjaha maningon siapkononkon jolma sisonai ai hun tongah-tongah ni halak Israel, halani na so pinispiskon ai bah pangurasion ai bani; gabe butak do tong ia, longkot ope tong habutakon ai bani.
14On ma aturan anggo matei sada halak ibagas lampolampo, ʻGanup na masuk hubagas lampolampo ai, anjaha ganup na ibagas lampolampo ai, maningon butak do pitu ari dokahni.ʼ
15Anjaha sagala gusi, na so marlangkob na sinangkut, butak do ai.
16Anjaha barang ise na manjamah i ladang sada halak na matei binahen ni podang barang bangkei ni sada jolma barang holiholi ni sada jolma barang sada tanoman, maningon butak ia pitu ari dokahni.
17Maningon buaton ni sidea do bani jolma na butak ai humbani abuan ni galangan pardousaon na dob tinutung ai, anjaha tambahkononkon hujai sada guri-guri bah na mardalan.
18Dob ai buaton ni sada dalahi na pansing ma hisop anjaha isornopkon ma ai hubagas bah ai, anjaha ipispiskon ma ai hubani lampolampo ai pakon bani ganup parugas ampa jolma na ibagas ai, pakon hubani jolma na manjamah holiholi ni na matei barang halak na binunuh, barang bangkei barang tanoman;
19maningon pispison ni halak na susi ai do halak na butak ai bani ari patoluhon pakon papituhon, anjaha bani ari papituhon maningon urasonni do ia humbani dousani, anjaha taptaponni ma pakeanni anjaha maridi ia ibagas bah, gabe pansing ma ia bodari.
20Tapi barang ise halak na butak, hape lang ra ia manguras dirini humbani dousa, maningon siapkononkon do ia hun tongah-tongah ni kuria in, ai ianan hapansingon ni Jahowa do binutakanni ijai; halani na so pinispiskon ai bah pangurasion ai bani, butak do ia.
21Anjaha aturan na totap ma in sadokah ni dokahni bannima; jolma na mamispiskon bah pangurasion ai pe, maningon taptaponni do pakeanni; anjaha barang ise na manjamah bah pangurasion ai, maningon butak ia ronsi bodari.
22Anjaha barang aha pe na jinamah ni halak na butak ai, maningon butak do ai, anjaha barang ise na manjamah na butak ai, maningon butak do ia ronsi bodari.”
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel