Sambatni
1Ia ahu, sanggah tahun parlobei dob raja si Darius, halak Madai ai, jongjong do ahu i lambungni mangurupi anjaha mampargogohisi.
2Sonari pe patugahonku ma bam na tarsurat ibagas buku hasintongan ai, “Tonggor ma, bangkit do use tolu halak raja i Persia, tapi na paompatkon ai bayakan do ai marimbang haganup sidea ai. Dob gabe margogoh ia halani habayakonni, iharah ma haganup laho mangimbang harajaon Gorik.”
3Jadi timbul ma sada raja na markuasa, na manrajai sada harajaon na bolag, na mandalankon rosuh-rosuhni.
4Tapi anggo timbul tumang ma ia, mabolah ma harajaonni ai anjaha hona bagi mangihutkon deisa na ompat in; seng bani ginomparni ondos ai, anjaha seng songon gomgoman na ginomgomanni hinan be ai, ai maningon parsedaon do harajaonni ai anjaha halak na legan ma gabe simada ai.
5Dob ai lambin margogoh ma raja na i dangsina ai, tapi sada humbani puanglimani gabe gogohan do hun bani, anjaha gabe banggal do harajaonni ai.
6Dob piga-piga tahun mambahen parpadanan ma sidea; roh ma boru ni raja na hun dangsina ai mangayaki raja na i utara ai mambahen pardameian, tapi seng tarjolomisi kuasani, anjaha ginomparni pe seng manahan; hona ondoskon do ia, sonai homa na pataruhkonsi, anakni sada ampa na mambuatsi.
7Bani panorang ai ipabangkit raja do sada halak humbani sindohor ni boru ni raja ondi manggantih bapani; roh ma ia mamorang bala ai anjaha imasuki ma benteng ni harajaon parutara ai, ipatuduhkon ma gogohni bani sidea lanjar ipatunduk.
8Iboan ma hu Masir naibata-naibata ni sidea rap pakon gana-gana tinuang ni sidea, ugas-ugas pirak ampa omas na maharga gabe taban-taban; anjaha seng be iporang raja parutara ai ibagas piga-piga dokah.
9Dob ai roh ma raja parutara ai mammasuki harajaon pardangsina ai, tapi mulak sonin do ia hu tanohni.
10Dob ai roh ma anakni marugas laho marporang, ipatumpu ma balani marhulan-hulan; laho ma ia, irungkub ma ai songon bah banggal anjaha ilontas; iulaki ma use mamorang ai das bani benteng-bentengni.
11Marah ma raja pardangsina ai, bingkat ma ia laho marporang dompak raja na i utara ai. Jadi ipatumpu ma balani marhulan-hulan, tapi talu anjaha ripas do balani ai.
12Dob hona taluhon na marhulan-hulan ai, gijang ma uhurni; marlaksa-laksa do ibunuh, tapi seng torus monang ia.
13Ai iulaki raja parutara ai do pajongjong bala, bueinan marimbang na parlobei ai; dob salpu piga-piga tahun roh ma ia marhasoman bala na banggal ampa buei parsadiaan.
14Bani panorang ai buei ma na marbalik manlawan raja pardangsina ai; halak na jungkat pe humbani bangsamu manlawan do laho manggoki pangungkabon ai, tapi ipatunduk do sidea.
15Anjaha roh ma raja parutara ai, ipajongjong ma hubuan anjaha italuhon ma sada huta na pinatoguh. Ia bala pardangsina ai seng manahan sidea, age bala pilihanni ai; tongon, seng adong kuasa na manahan jongjong.
16Jadi ibahen na roh mangimbangsi ai ma domu hu bani rosuh-rosuhni anjaha seng dong na tahan jongjong i lobeini; imasuki ma tanoh na majenges in, anjaha tunduk ma in hutoruh ni tanganni.
17Dob ai isurahon uhurni ma sihol pajonamkon kuasani bani haganup gomgomanni; ibahen ma pardearan hu bani, ibere ma boruni gabe jolmani, laho mansedahonsi; tapi seng saud anjaha seng jadi sura-surani ai.
18Dob salpu ai idompakkon ma hubani nagori-nagori na i topi ni laut, anjaha patundukonni do buei hunjai; tapi roh ma sada puanglima parontihon asup-asupni ai, hubani tene mangonai bahenonni asup-asupni ai.
19Dob ai itujuhon ma bohini dompak benteng-bentengni na i tanohni sandiri, tapi jomba ma ia anjaha dabuh, anjaha lanjar seng jumpah be.
20Dob ai bangkit ma gantihni sada halak, na marsuruh sada halak sipatumpu guguan hu nagori na majenges ai; tapi seng pala piga dokah bois ma ia, sedo binahen ni ringis atap porang.
21Bangkit ma na manggantihsi sada halak na mahiri, na so patut namin haondosan ni harajaon ai; na so niagak ni uhur do ia roh, gabe ibuat ma harajaon ai bani marhitei akal-akal.
22Talu do i lobeini sagala bala na roh marhulan-hulan ai mandorabsi, sonai homa kopala ni parpadanan ai.
23Anjaha dob ibahen parjanjian pakonsi idalankon ma sipaoto-oto; jadi lambin margogoh ma ia marhitei jolma na otik.
24Na so panagaman masuk ma ia hu nagori na tang sibayakan, idalankon do na so binahen ni bapani atap ompungni; ibagihon do i tongah-tongah ni sidea rampasan, taban-taban ampa ugas-ugas. Ibahen ranggian mambuat benteng-benteng, tapi tongkin hansa.
25Jadi ipabulat ma gogohni pakon uhurni mamorang dompak raja na i dangsina marhasoman bala na buei; raja na hun dangsina pe roh ma marporang marhasoman bala na buei anjaha na gogoh, tapi seng tahan ia, halani partahi-tahian na binahen hu bani.
26Gari halak na tong rap mangan pakonsi parsedahonsi, gabe hona pardakdak ma balani, anjaha buei tumang rasei.
27Ia raja na dua ai, na masambor do ipingkiri sidea bei; rap mangan pe sidea marsioto-otoan do, tapi seng manjadi; ai ujung ni ai, sihol masa ope ai bani panorang na dob binuhul.
28Anjaha mulak ma ia hu nagorini mamboan buei arta, tapi uhurni sihol manlawan parpadanan na mapansing ai do. Ipasaud ma ai, dob ai mulak ma ia hu tanohni sandiri.
29Bani panorang na binuhul mulak ma ia, anjaha imasuki ma tanoh dangsina ai, tapi anggo sahali on seng songon na parlobei ondi be.
30Ai roh ma kapal hun Kittim manlawansi, gabe mabiar ma ia lanjar mulak; manringis ma ia gabe ipapuas ma ai dompak parpadanan na pansing in, anjaha manriah ma ia pakon halak na dob manadingkon parpadanan na pansing in.
31Roh ma balani pabutakkon ianan na pansing in ampa bentengni, anjaha iparontihon ma galangan ari-ari. Ipajongjong sidea ma gana-gana hagigi, na majangin ai.
32Ibahen ma marbalik halak silanggar parpadanan ai marhitei hata lemes-lemes; tapi anggo bangsa na mananda Naibata, totap do jongjong anjaha marsijoloman.
33Anjaha halak na pentar i tongah-tongah ni bangsa ai mambahen buei halak maruhur, age pe rasei sidea ibahen podang, apuy, tutupan ampa na hona rampas, ibagas piga-piga dokah.
34Sanggah laho talu sidea dapot partolongan do sidea otik, tapi buei do halak na marsipakulah-kulah mangihutkon sidea.
35Deba humbani halak na pentar ai rasei do, laho papitahkon sidea, paborsihkon ampa paputihkon, das bani panorang parujungan; ai maningon masa ope na sonai das bani panorang na dob binuhul.
36Ibahen raja ai do domu hubani rosuh ni uhurni, ipagijang anjaha ipatimbul do dirini i atas ni sagala naibata, anjaha jungkat do parsahapni dompak Naibata Sitimbulan in. Sai monang do ia, paima gok ringis ai, ai barang aha na dob tinontuhon maningon saud do.
37Seng parduli ia bani naibata ni ompungni, atap naibata na hinaholongan ni naboru; seng parduli ia bani naibata na legan, ai ipagijang do dirini i atas ni haganupan ai.
38Tapi gantih ni ai, ipasangap do naibata ni benteng-benteng; ipasangap do sada naibata na so tinanda ni ompungni, marhitei omas, pirak, batu intan ampa sibere-bere na maharga.
39Ibahen ma naibata na legan ai gabe parondosan ni benteng-benteng na toguh ai; halak na mambalosisi ipasangap do ai; ipabangkit do sidea manrajai buei halak, anjaha ibagihon do bani sidea nagori ai bahen upah.
40Bani panorang marayak ujungni marsidoraban ma ia pakon raja na i dangsina; roh ma raja na hun utara ai mandorabsi songon halisungsung, marhitei gareta porang ampa siparhuda ampa buei kapal, roh ma ia mammasuki nagori-nagori, irungkub anjaha ilontas ma ai.
41Das do ia hu tanoh na marmulia ai. Marlaksa-laksa do halak na rasei bahenonni, tapi maluah do hun tanganni anggo on: Edom pakon Moab ampa sabagian banggal humbani halak Amon.
42Ipagostong do tanganni manlawan nagori-nagori ai, anjaha seng maluah tanoh Masir hun bani.
43Gok bani do sagala arta omas, pirak ampa haganup arta na maharga i Masir; Libia pakon Etiopia pe mangihut do hu bani.
44Tapi tarsonggot ma ia bahenon ni barita na hun hapoltakan ampa na hun utara, jadi bingkat ma ia ibagas gila laho manraseihon ampa mamboiskon buei halak.
45Jadi ipasuk ma lampolampo harajaonni ai i holangkolang ni laut ai ampa dolog na mapansing na marmulia ai; tapi jumpah ma ajalni, sahalak pe lang dong na mangurupisi.”
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel