Alkitab Mobile SABDA
[VER] : [SIMALUNGUN]     [PL]  [PB] 
 <<  Filipi 2 >> 

Martoruh ni Uhur songon Kristus

1Anggo adong apoh-apoh ibagas Kristus, pakon ojur-ojur ibagas holong ni uhur, pakon parsaoran ni Tonduy, pakon ontou ni uhur, ampa idop ni uhur,

2goki nasiam ma malas ni uhurhon: Sada ma paruhuron nasiam, sada ma haholongon nasiam, sauhur, sapingkiran ma nasiam!

3Ulang ma maruhur haut atap marhasangapon na lumei, tapi ibagas toruh ni uhur hira nasiam ma hasoman nasiam lobihan humbani nasiam sandiri!

4Ulang ma na porlu bani nasiam paruhurhon nasiam, tapi dihut ma na bani hasoman!

5Songon paruhuron ni Kristus Jesus ma paruhuron nasiam!

6Age pe marrupa Naibata Ia, sedo songon nirampas ihira uhur-Ni usih-Ni ai bani Naibata,

7tapi ipalumei do diri-Ni anjaha ipakei rupa ni jabolon, gabe usih bani jolma do Ia, anjaha rumang jolma jumpah Bani.

8Ipatoruh do diri-Ni, na gabe pambalosi do Ia ronsi matei, pala matei tarsilang.

9Halani ai do ase ipagijang Naibata Ia, anjaha ilayak-layakkon Bani sada goran na mangatasi sagala goran,

10ase manowod anjaha marsombah ibagas goran ni Jesus sagala na i nagori atas pakon na i atas tanoh on, age na i toruh ni tanoh,

11anjaha sagala pamangan marhatongonkon, Jesus Kristus do Tuhan, bahen hasangapon ni Naibata Bapa.

Mamorluhon Goluh Partonduyon

12Ai pe nasiam na hinaholongan ni uhurhu, songon totap ni pambalosion nasiam na saindokah, lang pitah sanggah i lambung nasiam ahu, tapi tarlobih ma nuan, sanggah daoh ahu. Marhasoman biar pakon gobir ma haporluhon nasiam haluahon nasiam,

13ai Naibata do mangkorjahon ibagas nasiam sura-sura ampa na pasaudkon ai mangihutkon rosuh ni uhur-Ni.

14Bani sagala pambahen nasiam, ulang ma nasiam marungut-ungut barang maruhur sangsi,

15ase ulang adong sihataon bani nasiam, tapi pitah ma, gabe anak ni Naibata, na so martikas i tongah-tongah ni sundut na geduk anjaha siparbalik, ijin ma nasiam marsinondang songon bintang i dunia on,

16marsijoloman bani hata hagoluhan in, bahen puji-pujian bangku bani ari ni Kristus, paboa na so soya parlumbaonku anjaha sedo na so marguna halojaonku.

17Ai porini iduruskon darohku gabe galangan ampa parsombahon mangkopkop haporsayaon nasiam, malas anjaha megah do uhurhu rap pakon nasiam haganup.

18Sonai ma homa malas ma uhur nasiam, anjaha marmalas ni uhur ma nasiam rap pakon ahu.

Ibagahkon si Paulus Marsuruh si Timoteus

19Tapi arap do uhurhu ibagas Tuhan Jesus, podas ma si Timoteus suruhonku bani nasiam, andohar marhinsah ni uhur age ahu, anggo domma hubogei sonaha pasal nasiam.

20Ai seng adong be hasomanku na marparuhuron songonsi, na ra mansarihon nasiam humbani uhur na bujur.

21Ai haganup do sidea mangindahi na porlu bani dirini bei, seng be na porlu bani Kristus Jesus.

22Pasal hataluponni ibotoh nasiam do, songon anak rap pakon bapa marhorja do ia pakon ahu bani Ambilan Na Madear in.

23Arap do uhurhu mintor suruhonku do ia, ijin hubotoh, sonaha pasal langkahku.

24Tapi tenger do uhurhu ibagas Tuhan in, ahu sandiri pe podas do roh.

25Anjaha domma huputuskon porlu do marsuruh bani nasiam si Epaproditus, sanina in, hasomanku sahorja ampa saparuntolon, na sinuruh nasiam mamboan na porlu bangku,

26ai masihol do ia bani nasiam haganup, anjaha rusak do ia, halani tarbogei bani nasiam naboritni ai.

27Anjaha tongon parah hinan do naboritni, pala narus matei; tapi maidop do uhur ni Naibata mangidahsi, seng pitah mangidahsi tene, dihut do mangidah ahu, ase ulang mardapot-dapot pusok ni uhurhu.

28Domma hupapodas marsuruhsi, ase marmalas ni uhur nasiam mangidahsi, anjaha ahu pe hun lumbang uhurhu.

29Ai pe, malas ma panjalo nasiam bani ibagas Tuhan in, anjaha sangap ma bahen nasiam halak na sonin.

30Ai halani horja ni Kristus narus do ia matei, anjaha iajamkon do hosahni laho manggoki pangidangion nasiam bangku.



 <<  Filipi 2 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel