Alkitab Mobile SABDA
[VER] : [SIMALUNGUN]     [PL]  [PB] 
 <<  Imamat 2 >> 

Pasal Galangan Sipanganon

1“Barang ise manggalangkon galangan sipanganon bani Jahowa, maningon itak na lumat do galanganni ai; useihononni ma hujai minak anjaha nahkononni hu atasni hamonan;

2dob ai boanonni ma ai hubani anak ni si Aron, malim ai. Buatonni ma hunjai sampohul itak na lumat pakon minak ai ampa ganup hamonan ai; tutungon ni malim ai ma ai bahen galangan pardingatan i atas ni anjapanjap ai, gabe galangan apuy, uap na misbou bani Jahowa.

3Tapi na teba humbani galangan sipanganon ai, rupei ni si Aron pakon sagala anakni ai ma ai; ai ma parbagianan na pansing sahalian humbani galangan apuy bani Jahowa.

4Anggo sihol galangkononmu galangan sipanganon na dob ipatongka i tataring, maningon humbani itak na lumat do ai, pakon humbani kue na so niigaran marhasoman minak pakon humbani ruti na so niigaran na marlapu minak ma ai.

5Anggo galangan sipanganon na ginoreng i balanga do galanganmai, maningon humbani itak na lumat, na so niigaran do ai anjaha marlapu bani minak.

6Maningon topikanmu do ai etek-etek, anjaha useihononmu hujai minak; galangan sipanganon ma ai.

7Anggo galangan sipanganon na ilompa ibagas hudon do galanganmai, maningon humbani itak na lumat, marsaor minak do bahenonmu ai.

8Maningon boanonmu do galangan sipanganon na ipaturei humbani pulungan on hubani Jahowa; maningon boanon do ai bani malim ase ia use mamboan hu anjapanjap.

9Maningon buaton ni malim ai do galangan pardingatan humbani galangan sipanganon ai, anjaha maningon tutungonni do ai i atas anjapanjap ai; ai ma galangan apuy, uap na misbou bani Jahowa.

10Tapi na teba humbani galangan sipanganon ai, rupei ni si Aron pakon anakni ma ai, ai ma parbagianan na pansing sahalian humbani galangan apuy bani Jahowa.

11Sagala galangan sipanganon na sihol galangkononmu bani Jahowa, seng bulih marnamigar bahenonmu; ai sagala na migar barang manisan seng bulih tutungonmu bahen galangan apuy bani Jahowa.

12Bahen galangan limbuah boi do boanonmu ai bani Jahowa, tapi seng bulih galangkonon ai bani anjapanjap bahen uap na misbou.

13Maningon garamonmu do ganup galangan sipanganonmu, seng bulih tartading bahenonmu garam parpadanan ni Naibatamu bani galangan sipanganonmu; maningon marhasoman garam do ganup galangkononmu galanganmu.

14Anggo igalangkon ho galangan sipanganon humbani limbuah hubani Jahowa, maningon boanonmu do buyur ni omei na nirondang ibagas apuy anjaha na niduda bahen galangan sipanganon humbani limbuah.

15Maningon bahenonmu minak hu atasni, anjaha maningon nahkononmu homa hamonan hu atasni; galangan sipanganon ma ai.

16Dob ai maningon tutungon ni malim ai ma galangan pardingatan humbani omei na niduda pakon humbani minak ampa haganup hamonan ai bahen galangan apuy bani Jahowa.”



 <<  Imamat 2 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran