Aturan Deba Nari Pasal Galangan Pardousaon
1“Anggo mardousa sada halak, marhitei na mambogei hata pamuraion, anjaha ia saksi, atap ia sandiri na mambogei ai atap adong na pabotohkon bani, hape seng ipatugah, mangonai ma salah ai bani.
2Atap anggo ijamah sada halak sada barang na mabutak, ai ma bangkei ni binatang na mabutak, atap bangkei ni pinahan na mabutak, atap bangkei ni gilok-gilok na mabutak, age seng ibagas botohni, butak do ia halani ai anjaha marsalah.
3Atap anggo tarjamahsi habutakon ni jolma, atap habutakon na ijahanin pe ai, gabe butak do ia bahenonni ai; age seng ibagas botohni ai lobei, gabe ibotoh use, parsalah ma ia ijai.
4Atap anggo adong sada halak, na tarlanjur bibirni mangkatahon bija laho mangkorjahon na masambor atap na madear, pasal haganup tene na tarlanjur ibijahon jolma, age seng ibagas botohni ai lobei, gabe ibotoh use, parsalah ma ia ibagas ai.
5Anggo marsalah sada halak ibagas ai, maningon sopotkononni do na dob mardousa ia ibagas ai,
6anjaha boanonni ma galangan pardousaonni hubani Jahowa halani salah na binahenni ai, sada boru-boru humbani pinahan etek, sada anak ni biribiri atap sada hambing, anjaha malim ai do mambahen pardearan bani halani dousani ai.
7Tapi anggo seng sungkup gogohni patukkon sada biribiri, maningon boanonni bahen galanganni hubani Jahowa, halani dousa na binahenni ai, dua kuhuy barang dua anak ni asas, sada bahen galangan pardousaon, na sada nari bahen galangan situtungon.
8Anjaha maningon boanonni do ai hubani malim ai, ase igalangkon na parlobei ai bahen galangan pardousaon; maningon puloskononni do uluni hampit tangkuhukni, tapi seng bulih rotap ai.
9Dob ai pispiskononni ma deba humbani daroh ni galangan pardousaon ai hu dingding ni anjapanjap ai, tapi daroh na teba ai, tiriskononni ma hu dasor ni anjapanjap ai, ai ma galangan pardousaon.
10Dob ai maningon galangkononni do na paduahon ai bahen galangan situtungon, mangihutkon aturan, anjaha malim ai ma mambahen bani pardearan halani dousa na binahenni ai, jadi dapotan hasasapan ni dousa ma ia.
11Tapi anggo seng sungkup gogohni patukkon dua kuhuy barang dua anak ni asas, maningon boanonni do bahen galanganni halani dousa na hinorjahonni ai, saparsapuluh efa itak na lumat bahen galangan pardousaon, seng bulih nahkononni minak hujai, barang bahenonni hamonan huatasni, halani galangan pardousaon do ai.
12Maningon boanonni ma ai hubani malim, anjaha buaton ni malim ai ma sampohul hunjai bahen rupei pardingatan, anjaha tutungonni ma ai i atas ni anjapanjap bahen galangan apuy bani Jahowa, ai ma galangan pardousaon.
13Sonai ma bahenon ni malim ai pardearan bani halani dousa na hinorjahonni ibagas sada pahara ondi, ase dapotan hasasapan ni dousa ia; na lobih ai, rupei ni malim do ai, songon galangan sipanganon ai.”
Galangan Parsalahan
14Dob ai nini Jahowa ma hubani si Musa,
15“Anggo adong sada halak na mangorui anjaha na mardousa, dompak na ijahanin pe na pinapansing ni Jahowa, tapi seng ituntun, maningon boanonni do bahen galangan parsalahanni hubani Jahowa, sada biribiri tunggal na so martikas humbani pinahan etek, ansa taksiranmu domu bani sekel pirak, mangihutkon sekel bani ianan na pansing in, ai ma galangan parsalahan.
16Anjaha barang sadiha na nioruanni marhiteihon ni dousani humbani ugas na pansing ai maningon pasuangonni do, anjaha maningon tambahanni saparlima hunjai anjaha bereonni ai hubani malim, jadi malim ai ma mambahen pardearan bani, gabe dapotan hasasapan ni dousa ma ia.
17Anggo mardousa sada halak gabe ihorjahon na so bulih bahenonni namin mangihutkon titah ni Jahowa, age seng ibotoh ai, parsalah do ia ibagas ai, jadi maningon mangonai papa hu bani,
18gabe maningon boanonni ma hubani malim humbani pinahan etek, sada biribiri tunggal na so martikas domu hubani taksiranmu bahen galangan parsalahan, anjaha malim ai ma mambahen pardearan bani halani hakahouon na so niutuskonni ai, anjaha dapotan hasasapan ni dousa ma ia.
19In ma galangan parsalahan, halani na dob marsalah ia bani Jahowa.”
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel