Alkitab Mobile SABDA
[VER] : [SIMALUNGUN]     [PL]  [PB] 
 <<  Kisah Para Rasul 14 >> 

Si Paulus ampa si Barnabas i Ikonium

1I Ikonium pe masuk do sidea hu rumah parguruan ni Jahudi, anjaha sonai do homa ambilanni, gabe buei tumang ma na porsaya, halak Jahudi age halak Gorik.

2Ia halak Jahudi, na so ra porsaya, ipajobu-jobu anjaha ipamilas sidea ma uhur ni halak sipajuh begu-begu dompak sanina-sanina ai.

3Hun dokah do sidea ijai, marhinsah ni uhur do sidea marambilan, mangunsagahkon Tuhan in, na mambere tanda ampa halongangan sibahenon ni sidea, laho manaksihon hata idop ni uhur in.

4Marbolah dua ma pangisi ni huta ai, na deba hampit halak Jahudi, anjaha na deba nari hampit apostel ai.

5Jadi manriah ma halak sipajuh begu-begu, halak Jahudi ampa kopala-kopalani sihol manggosam ampa manggijigi sidea.

6Dob tarbogei ai bani sidea, gabe lintun ma sidea hu huta na i nagori Likaonia, ai ma huta Listra ampa Derbe ampa huta-huta na ingot hujai;

7ijai pe iambilankon sidea do Ambilan Na Madear in.

Sada na Repat Ipamalum i Listra; Hona Pargijig si Paulus

8Jadi adong ma sada halak i Listra, na hundul-hundul, seng margogoh naheini, repat humbani partubuhni, seng ongga boi ia mardalan.

9Ibogei do si Paulus marambilan. Ikawahkon si Paulus ma ia anjaha ididah, na porsaya do ia, boi malum naboritni ai,

10gabe ipagogoh ma sorani mangkatahon, “Pintor ma onjolhon naheimin!” Jadi mintor jongjong ma ia anjaha mardalan.

11Jadi dob ididah na mabuei ai na binahen ni si Paulus ai, ipagogoh sidea ma sorani, nini sidea ma ibagas hata Likaonia, “Domma susur banta naibata marrupa songon jolma!”

12Igoran sidea ma si Barnabas Naibata Sois, anjaha si Paulus Naibata Hermes, halani ia siparsahap.

13Anjaha malim-malim ni Sois ai pe, na pinajongjong bani rumah panumbahan i lobei ni huta ai, iboan sidea ma lombu jonggi ampa bunga hu horbangan ai, laho manggalang rap pakon halak na mabuei ai.

14Mambogei ai Apostel Paulus ampa si Barnabas, irigati sidea ma hiouni, marlintun ma sidea manjumpahkon halak na mabuei ai, anjaha idilohon ma,

15“Nasiam hasoman, aha do na binahen nasiam on? Jolma do age hanami, na marpangahapan songon nasiam, na mamboan Ambilan Na Madear bani nasiam, ase mulak nasiam humbani naibata nasiam na lang in hubani Naibata na manggoluh, na manompa langit, tanoh, laut ampa haganup isini.

16Ipaturut do bani sundut na dob salpu haganup bangsa-bangsa marsidalani dalanni,

17tapi age pe sonai, isaksihon do diri-Ni marhitei dear layak, ai ibere do bani nasiam udan hun langit ampa partahunan na madear, anjaha ipasabou do uhur nasiam marhitei sipanganon ampa malas ni uhur.”

18Age sonai hata ai, mahol do tarlanglangi sidea halak na mabuei ai laho manggalang bani sidea.

19Tapi roh do hujai halak Jahudi na hun Antiokia ampa Ikonium; iojur-ojur ma halak na mabuei ai, gabe ipargijig sidea ma si Paulus anjaha isarad hu darat ni huta ai, anjaha iagan sidea, domma matei ia.

20Tapi dob maringgot roh susian ai hu bani, jongjong ma ia, anjaha masuk ma hu huta ai. Patarni ai laho ma ia pakon si Barnabas hu Derbe.

Mulak si Paulus ampa si Barnabas hu Antiokia na i Siria

21Dob iambilankon sidea Ambilan Na Madear i huta ai, anjaha buei do iajari sidea na gabe susian, mulak ma sidea hu Listra, Ikonium ampa Antiokia,

22laho patoguhkon uhur ni susian ai, anjaha mangojur sidea ase totap marhaporsayaon, nini sidea ma, “Maningon bontasonta do buei sitaronon laho masuk hubagas harajaon ni Naibata.”

23Dob ipabangkit sintua bani sidea bani ganup kuria, marhasoman tonggo ampa puasa, iondoskon ma sidea bani Tuhan, na hinaporsayaan ni sidea.

24Jadi ibontas sidea ma nagori Pisidia, gabe das ma hu Pampilia.

25Anjaha dob ihatahon sidea hata in i Perge, tuad ma sidea hu Atalia.

26Hunjai ma sidea marparau hu Antiokia; ijai do hinan iondoskon sidea hubani idop ni uhur ni Naibata, laho mangkorjahon horja na hinorjahon ni sidea ai.

27Anjaha dob das sidea, ipatumpu sidea ma kuria ai, anjaha ibaritahon sidea ma haganup na binahen ni Tuhan in marhitei sidea, ampa sonaha pangungkap ni Tuhan in labah haporsayaon bani sipajuh begu-begu.

28Anjaha hun dokah do sidea ijai rap pakon susian ai.



 <<  Kisah Para Rasul 14 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel