Alkitab Mobile SABDA
[VER] : [SIMALUNGUN]     [PL]  [PB] 
 <<  Lukas 11 >> 

Iajari Jesus Susian-Ni Martonggo

1Martonggo ma Jesus santorap bani sada ianan, anjaha salpuhonsi ai, nini sahalak susian-Ni ma hu Bani, “Tuhan, ajari Ham ma hanami martonggo, songon na binahen ni si Johannes hubani susianni.”

2Jadi nini ma hubani sidea, “Anggo martonggo hanima, sonon ma hatahon hamina, Ham Bapanami, sai pinapansing ma goran-Mu. Sai roh ma harajaon-Mu.

3Bere Ham ma bannami hagoluhannami siganup ari.

4Sasap Ham ma dousanami, ai hanami pe isasap hanami do haganup na marsalah dompak hanami. Anjaha ulang ma bobai Ham hanami hu parlajouan.”

5Lanjar nini ma dompak sidea, “Ise hun bennima, na marhuan-huan bani sada halak, gabe laho ia tongah borngin hu bani mangkatahon, ?Ambia, bere lobei bangku tolu kibul rutimin,

6ai roh do hasomanku hun pardalanan, anjaha seng dong sipanganon berehononku bani.?

7Jadi marbalos ma ia hun bagas, nini ma, ?Ulang sunsahi ahu! Domma tutup labah, anjaha domma modom dakdanakku rap pakon ahu. Seng tarbahen ahu be jongjong laho mamberehon ai bam.?

8Huhatahon ma bannima: Anggo lang ra puho ia laho mambere ai bani, halani parhuan-huanon, tapi lang tarbahensi lang puho, laho mambere sagala na porlu bani, halani hajungilonni mangindo.

9Halani ai huhatahon ma bannima, pangindo hanima ma, sai na bereon do bannima; pindahi hanima ma, sai na jumpahan do hanima, anjaha hartuki hanima ma, sai na ungkabon do bannima!

10Ai sai na manjalo do sagala na mangindo, sai na jumpahan do sagala na mangindahi, anjaha sai na ungkabon do bani sagala na mangkartuki.

11Ise humbani nasiam bapa, na mambere batu bani anakni anggo ipangindo ruti, atap ulog anggo ipangindo dengke,

12atap gansip golang anggo ipangindo tolur?

13Gari nasiam na jahat mambotoh mambere na madear bani anak nasiam, samintolah Bapa nasiam na i nagori atas ai ma lang bereon-Ni Tonduy Na Pansing bani sagala na mangindo hun Bani?”

Ipamalum Jesus Sada Halak na Setanon; Ipatorang Hunja Roh ni Kuasa-Ni

14Santorap iusir Jesus ma sada setan silongah. Jadi dob mandarat setan ai, marsahap ma na longah ai, gabe longang ma halak na mabuei ai.

15Tapi deba humbani sidea mangkatahon, “Marhitei Beelsebul, raja ni setan do iusir setan-setan ai.”

16Na legan use mangindo tanda hun langit laho manlajou-Si.

17Tapi itanda Jesus do pingkiran ni sidea, gabe ihatahon ma bani sidea, “Maseda do sagala harajaon na marsalisih samah dirini anjaha marsirumbakan ma rumahni.

18Anjaha anggo marsalisih sibolis samah dirini, mintor sonaha ma pardong ni harajaonni ai? Ihatahon nasiam tene, Huusir setan ai marhitei Beelsebul!

19Tapi, anggo Huusir setan-setan mangunsagahkon Beelsebul, ise ma ipangunsagahkon anak nasiam laho mangusirsi? Ai pe sidea ma na manguhumi nasiam.

20Tapi anggo Huusir setan-setan marhitei tangan ni Naibata, na dob sogop ma Harajaon ni Naibata bani nasiam.

21Anggo ijagai sada halak na gogoh, siparsinjata na sirsir rumahni, sonang ma ugas-ugasni.

22Tapi anggo roh mandorabsi sigogohan humbani anjaha italuhon ia, buatonni ma humbani sagala sinjata hatengeran ni uhurni ai, anjaha bagi-bagihononni ma ai.

23Na so mangkasomani Ahu, imbang-Ku do ai, anjaha na so hasoman-Ku patumpuhon, na mangerap do ai.”

Parmulak ni Tonduy na Butak Bani Sada Jolma

24Anggo mandarat tonduy na mabutak humbani sada jolma, idalani ma ianan na horah, laho mangindahi parsaranan, tapi halani seng dong jumpahsi nini ma, “Mulak ma ahu bani ianan na dob hutadingkon ondi.”

25Jadi, dob roh ia, domma isapu anjaha ipajagar jumpahsi.

26Dob ai laho ma ia, iarahkon ma pitu setan na legan sijahatan hun bani, jadi imasuki ma ai laho marianan ijai, gabe bajanan ma parlahou ni jolma ai bani ujungni marimbang mungkahni.

27Sanggah na mangkatahon ai Ia, marsora na gogoh ma sada naboru hun tongah-tongah ni jolma na mabuei ai, nini ma hu Bani, “Martuah ma na manubuhkon anjaha na painumkon Ham!”

28Tapi nini ma, “Martuah ma na mambogei hata ni Naibata anjaha na marimbagaskon ai!”

Tanda ni Nabi Jona; Limbaga Pasal Mata

29Jadi sanggah na lambin martumpu ai halak na mabuei ai, ipungkah ma mangkatahon, “Na jahat do na sasundut on. Tanda do ipangindo, tapi seng bereon tanda bani sidea sobali tanda ni si Jona.

30Ai songon si Jona gabe tanda bani parhuta Ninipe, sonai ma Anak ni Jolma in bani na sasundut on.

31Na jongjong do magira bani paruhuman ai raja naboru na hun dangsina dompak bangsa on, laho manguhumi sidea, ai roh do ia hun ujung ni tanoh on, laho mambogei hapentaron ni si Salomo. Tonggor ma, lobihan do on marimbang raja Salomo.

32Na jongjong do magira bani paruhuman ai halak Ninipe dompak na sasundut on laho manguhumi in, ai ipaubah sidea do uhur ni sidea mambogei ambilan ni si Jona. Tonggor ma, lobihan do on marimbang si Jona.

33Seng dong halak na mannahiti lampu anjaha inahkon ai bani ianan na ponop barang hu toruh ni tapongan, tapi hu atas ni sagakan do ai ibahen, ase ididah halak na roh sinalsalni ai.

34Palita ni daging do mata. Anggo jorgit matamu, lihar ma ganup angkulamu, tapi anggo sambor do, golap ma angkulamu.

35Ai pe, jaga ma, ase ulang golap sondang na ibagas ham in.

36Ase anggo lihar do haganup angkulamu, seng dong na golap ijai, gabe lihar ma haganupan ai, songon sanggah marsinalsal suluh bamu.”

Ipabursik-bursik Jesus Halak Parisei ampa Sibotoh Surat

37Sanggah na marsahap ai ope Ia, iarahkon sada halak Parisei ma Ia mangan; jadi masuk ma Ia lanjar hundul ma.

38Tapi longang do Parisei ai, halani ididah, lang palobei marburih Ia laho mangan.

39Jadi nini Tuhan in ma hu bani, “Anggo nasiam Parisei, darat ni panginuman ampa pinggan do ipaborsih nasiam; tapi uhur nasiam parbagas ai gok uhur haut do ampa hajahaton.

40Ee, hanima na oto! Sitompa pardaratni, ai lang Ia do homa sitompa parbagasni?

41Tapi bere ma na ibagas ai songon silayak-layak, gabe borsih ma haganup bennima.

42Tapi bursik ma hanima Parisei, ai igalar hanima do parsapuluhan ni hosaya, longa ampa lowoh simaratah, tapi seng parduli hanima bani uhum ampa holong na humbani Naibata. Sihorjahononkon do on, tapi ulang ma tading na legan.

43Bursik ma hanima Parisei, ai iharosuhkon hanima do hundul bani hundulan lobei-lobei i parguruan ampa bani hata tabi i tongah tiga.

44Bursik ma hanima, ai usih do hanima bani tanoman na so tanda, gabe idogei halak, na so pambotohanni.”

45Jadi marbalos ma sahalak sibotoh titah, nini ma hu Bani, “Ham Guru, marhitei hata-Mu ai dihut do hanami sambor ibahen Ham.”

46Jadi nini ma, “Bursik ma age hanima sibotoh titah, ai ipaporsankon hanima do bani jolma siporsanon na so tarboan, tapi hanima sandiri seng ra manggiut ai age marhitei jari-jari tumang.

47Bursik ma hanima, ai ipauli hanima do tanoman ni nabi-nabi, hape ompungnima do mambunuh sidea.

48Ase isaksihon hanima do pambahenan ni ompungnima, anjaha iharosuhkon hanima do pambahenan ni sidea ai; sidea do na mambunuh nabi-nabi ai, hanima paulihon tanoman ni sidea.

49Halani ai nini hapentaran ni Naibata do, ?Suruhon-Ku do bani sidea nabi ampa apostel, bunuhon anjaha pardakdakon ni sidea ma deba hunjai,

50ase Hubalaskon bani na sasundut on daroh ni haganup nabi ampa apostel, na dob durus humbani tombei ni tanoh on,

51mamungkah humbani daroh ni si Abel das hubani saroh ni si Sakaria, na tarbunuh i holangkolang ni anjapanjap ampa rumah panumbahan.? Sintong do hatang-Kon bannima, ?Luluhononku do in bani na sasundut on.?

52Bursik ma hanima sibotoh titah, ai irampok hanima do anakkunsi ni habotohon. Hanima sandiri seng masuk, anjaha halak na sihol masuk, ilanglangi hanima do.”

53Ase dob misir Jesus hunjai, ipungkah sibotoh surat ampa Parisei ma manggompangi-Si pangkei-pangkei, anjaha marbagei-bagei ma na isungkunkon sidea hu Bani;

54igompangi sidea do Ia, andohar hona Ia marhitei hata-Ni.



 <<  Lukas 11 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran